فۋتبولدان 21 جاسقا دەيىنگىلەر اراسىنداعى ەۋروپا چەمپيوناتىنىڭ ىرىكتەۋ كەزەڭىنە قاتىسىپ جاتقان قازاقستان جاستار قۇراماسى الماتىداعى ورتالىق ستاديوندا سولتۇستىك ماكەدونيانى قابىلداپ, ءىرى ەسەپپەن جەڭىلىپ قالدى.
بۇل ماتچتا جەڭىسكە جەتۋ ەكى قۇراما ءۇشىن دە ماڭىزدى بولاتىن. ويتكەنى ءۇش ۇپاي ولجالاعان قۇراما تۋرنير كەستەسىندە ەكىنشى ورىنعا كوتەرىلىپ, كارىقۇرلىق چەمپيوناتىنا قاتىسۋعا ءبىر تابان جاقىندايتىن. سوندىقتان ەكى ەلدىڭ فۋتبولشىلارى جەڭىسكە جەتۋ ءۇشىن ايانىپ قالعان جوق. فۋتبول ماماندارى ءبىر جىل بۇرىن سولتۇستىك ماكەدونيادا 1:1 ەسەبىمەن تەڭ ويناعان جەرلەستەرىمىز ءوز ەلىمىزدە ەش قيىندىقسىز جەڭىسكە جەتەدى دەپ بولجاعان-دى. الايدا جاستارىمىز كۇتپەگەن جەردە 4:1 ەسەبىمەن جەڭىلىپ, جانكۇيەرلەردى جەرگە قاراتتى. قازاقستان قۇراماسىنان جالعىز گولدى ورالحان ومىرتاەۆ سوقتى. جەڭىلىپ جاتقان ويىندا قازاقستاندىق فۋتبولشىلار «ەرلىكتەرىمەن» كوزگە تۇسكەنىن دە ايتا كەتەيىك. مىسالى, گول اۆتورى ومىرتاەۆ پەن قورعاۋشى راۋان ورىنباسار قىزىل قاعاز الىپ, الاڭنان قۋىلسا, ارتۋر شۋشەناچەۆ 11 مەترلىك ايىپ دوبىنان گول سوعا المادى.