مەملەكەت باسشىسى قاسىم-جومارت توقاەۆ ءوزىنىڭ سايلاۋالدى باعدارلاماسىندا پرەزيدەنتتىك جاستار كادرلىق رەزەرۆىن قۇرۋ قاجەتتىلىگى تۋرالى ايتقان بولاتىن. بۇل تاپسىرما ويداعىداي ورىندالىپ, ەل باسقارۋ ىسىنە ارالاساتىن تاڭداۋلى جاستاردىڭ قاتارىنا قوسىلۋعا ۇمتىلعان 13 مىڭ ازاماتتىڭ اراسىنان بابى مەن باعى كەلىسكەن 300 جاس وتانداسىمىز ىرىكتەلگەن ەدى. ۇلت بولىپ ۇكىلەگەن سول 300 ازاماتتىڭ اراسىندا «تۇرعىن ءۇي-كوممۋنالدىق شارۋاشىلىعىن جاڭعىرتۋ مەن دامىتۋدىڭ قازاقستاندىق ورتالىعى» اق باسقارما توراعاسىنىڭ ورىنباسارى نۇربەك سەرىكوۆ تە بار.
بۇل قىزمەتكە جاس مامان ناق وسى پرەزيدەنتتىك جاستار كادرلىق رەزەرۆىنىڭ مۇشەلەرىن قولداۋ اياسىندا كەلگەنىن ايتا كەتۋ قاجەت. وعان دا وزىندىك سەبەپ بار. ماسەلەن, مەملەكەت باسشىسى قاسىم-جومارت توقاەۆ جىل باسىندا پرەزيدەنتتىك جاستار كادرلىق رەزەرۆىنە وتكەن ازاماتتارمەن كەزدەسۋدە وسى جىلى رەزەرۆتەگى 100 ادامدى جاۋاپتى قىزمەتكە تاعايىنداۋ, الداعى جىلداردا كادرلىق رەزەرۆتىڭ الەۋەتىن تولىق پايدالانۋ جوسپارعا قويىلعانىن العا تارتقان بولاتىن. «بۇگىنگى جاستار – مەملەكەتتىك باسقارۋ جۇيەسىنىڭ بولاشاعى. ارقايسىڭىزدان ەلدى دامىتۋعا تىڭ سەرپىن بەرەتىن جاڭا يدەيا مەن ناتيجەلى جۇمىس كۇتەمىز. الداعى ۋاقىتتا سىزدەردى مەملەكەتتىك ورگاندار مەن ۇلتتىق كومپانيالارعا جاۋاپتى قىزمەتكە جىبەرەمىز», دەدى ق.توقاەۆ.
بۇل رەتتە, پرەزيدەنت كادرلىق رەزەرۆكە ءوتۋ – جوعارى لاۋازىمدى قىزمەتكە ورنالاسۋ عانا ەمەس, ۇلت ءۇشىن, ەل ءۇشىن, حالىق ءۇشىن ايانباي تەر توگۋ ەكەنىن دە ەسكەرتكەن ەدى. ء«بىزدىڭ ماقساتىمىز سىزدەردى لاۋازىمدى قىزمەتكە تاعايىنداۋ عانا دەپ ويلاماڭىزدار. بۇل – ەلدى وركەندەتۋگە بەل بۋعان, سول ءۇشىن بار كۇش-جىگەرىن جۇمسايتىن ازاماتتارعا ارنالعان جوبا. باستى مىندەت – تالانتتى جاستاردىڭ قازاقستاندى جاڭا بەلەستەرگە كوتەرۋىنە مۇمكىندىك بەرۋ. ەڭ باستىسى – تۋعان ەلىڭدى شەكسىز قادىرلەۋ جانە وعان ادال قىزمەت ەتۋ», دەپ ەسكەرتتى مەملەكەت باسشىسى. ياعني بۇل جوبا رەزەرۆتەگى جاستار ءۇشىن ءتيىمدى الەۋمەتتىك ليفتكە اينالادى دەۋگە بولادى.
ەلىنە ەڭبەگىن ءسىڭىرۋدى مۇرات ەتكەن نۇربەك نۇرجان ۇلى ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتى, س.سەيفۋللين اتىنداعى قازاق اگروتەحنيكالىق ۋنيۆەرسيتەتى, سولتۇستىك ورال (رەسەي) مەملەكەتتىك اگرارلىق ۋنيۆەرسيتەتى, پرەزيدەنت جانىنداعى مەملەكەتتىك باسقارۋ اكادەمياسى سىندى بىرقاتار جوعارى وقۋ ورىندارىندا ءبىلىم الدى. ەڭبەك جولىن قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى اگەنتتىگى تۇرعىن ءۇي قۇرىلىسى دەپارتامەنتىنىڭ تۇرعىن ءۇي قۇرىلىسى باعدارلاماسىن ىسكە اسىرۋ باسقارماسىنىڭ ساراپشىسى قىزمەتىندە باستاپ, ودان كەيىن ينۆەستيتسيالار جانە دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ سۋمەن جابدىقتاۋ جانە سۋ بۇرۋ باسقارماسىنىڭ ءتۇرلى قىزمەتتەرىندە جۇمىس ىستەدى. وتكەن جىلدىڭ مامىرىنان باستاپ يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى كوممۋنالدىق شارۋاشىلىق باسقارماسىنىڭ باسشىسى بولىپ قىزمەت ەتتى.
وتىزعا تولماي وردا بۇزعان ازاماتتىڭ قارىم-قابىلەتىن وسىدان-اق اڭعارا بەرىڭىز. الايدا نۇربەك نۇرجان ۇلى وسى جەتكەن جەتىستىكتەرىمەن شەكتەلىپ قالعان جوق. وتكەن جىلى پرەزيدەنتتىك جاستار كادرلىق رەزەرۆىنە قاتىسىپ, باعىن سىناپ كورۋگە بەل بۋدى. «مەن دە رەزەرۆكە ىرىكتەۋگە قاتىسقان 13 مىڭ ۇمىتكەردىڭ قاتارىندا بولدىم. ءبىر-ەكى كۇندە قاجەتتى قۇجات جيناپ, ونلاين رەجىمىندە تاپسىردىم. بۇل رەتتە, مەن ۇيىمداستىرۋشىلاردىڭ جۇمىسىنا العىسىمدى بىلدىرگىم كەلەدى. جوباعا قاتىسۋشىلار ءۇشىن ىرىكتەۋ جۇمىسى بارىنشا ىڭعايلى ۇيىمداستىرىلدى. بىرىنشىدەن, بارلىق تەستىلەۋ, پرەزەنتاتسيالىق جوبانى ۇسىنىپ, قورعاۋ جۇمىستارى ونلاين ءوتتى. تەحنيكالىق قيىنشىلىقتار بولعان كەزدە ماعان ارنايى مامان ءتۇسىندىرىپ, كومەكتەستى. ەكىنشىدەن, «الەۋەتتى باعالاۋ» ساتىسى وزدىگىمەن وتكەن-وتپەگەن قاتىسۋشىلارعا ءارى قىزىقتى, ءارى پايدالى بولدى دەپ ويلايمىن. باعالاۋدىڭ ناتيجەسى ءوزىڭدى دامىتۋ جوسپارىنىڭ نەگىزى بولا الادى. ياعني, ۇمىتكەر باعالارى تومەن پارامەترلەردى ودان ءارى جەتىلدىرۋ بويىنشا جۇمىس ىستەيدى. بارلىق تەستىلەر زاڭنامانى ەمەس, بىلىكتىلىكتى ءارتۇرلى اسپەكتى بويىنشا باعالايدى. ءبىرىنشى تەست سان جانە ماتىنگە دەگەن تالدامالىق قابىلەتتىلىكتى سارالايدى. ودان ءارى باعالاۋ دەڭگەيى تەرەڭدەيدى, ءتىپتى جوباعا قاتىسۋشىنىڭ ادامگەرشىلىك قابىلەتى تاۋەلسىز ساراپشىلارمەن باعالانادى», دەيدى ن.سەرىكوۆ اعىنان جارىلىپ.
جاستار كادرلىق رەزەرۆى جاس ماماندارعا مەملەكەتتىك باسقارۋ جانە كۆازيمەملەكەتتىك سەكتور جۇيەسىندە باسشىلىق لاۋازىمدارعا ورنالاسۋعا مۇمكىندىك بەرەدى. باسشى لاۋازىمدارعا بوس ورىندار پايدا بولعان جاعدايدا پرەزيدەنتتىك جاستار كادرلىق رەزەرۆى رەزەرۆتە تۇرعان ادامداردىڭ كانديداتۋراسىن قارايدى. بۇل ءوز كەزەگىندە ىنتالاندىرىلعان جاستارعا قىزمەتتە ءوسۋ ساتىلارىن پايدالانۋ مەن ولاردىڭ مۇلدەم باسقا سالالارعا ءوز ۇلەسىن قوسۋعا مۇمكىندىك بەرەدى. «ىرىكتەلگەن جاستارمەن جەكە تانىسقان سوڭ, مەن ولاردىڭ وتە تالاپتى, ىنتالى جانە ەڭبەكقور ادامدار ەكەنىنە كوز جەتكىزدىم. كوبىسى سول كەزدىڭ وزىندە ايتارلىقتاي جەتىستىكتەرگە جەتكەن بولاتىن. رەزەرۆتە تۇرعان ادامداردىڭ قۇرامى ءارتۇرلى, وندا مەملەكەتتىك قىزمەتتەن, ورتالىق جانە جەرگىلىكتى اپپاراتتاردان كەلگەندەر دە بار. كۆازيمەملەكەتتىك سەكتور مەن جەكە بيزنەس وكىلدەرى دە از ەمەس. ءبىر سوزبەن ايتقاندا, الۋان ءتۇرلى قىزمەت سالالارى قامتىلعان», دەيدى ن.نۇرجان ۇلى.
نۇربەكتىڭ ايتۋىنشا, تاعايىنداۋلار كەزىندە رەزەرۆتە تۇرعان ادامدارمەن پرەزيدەنت جانىنداعى مەملەكەتتىك باسقارۋ اكادەمياسىنىڭ بازاسىندا بىلىكتىلىكتى ارتتىرۋ بويىنشا تۇراقتى جۇمىس جۇرگىزىلەدى. سونداي-اق رەزەرۆتە تۇرعان ادامداردى سالالىق پروبلەمالاردى شەشۋ بويىنشا وزىندىك «مي ورتالىقتارىن» (Think tanks) قۇرۋ ءۇشىن ۇكىمەت جانىنداعى جوبالاۋ وفيستەرىنە جانە سالالىق جۇمىس توپتارىنا تارتادى.
«پرەزيدەنتتىك جاستار كادرلىق رەزەرۆىنە تۇرىپ, سونىڭ ارقاسىندا بىرنەشە مەملەكەتتىك ورگاندار مەن كاسىپورىنداردان بوس لاۋازىمدارعا بىرقاتار ۇسىنىستار الدىم. مەنىڭ بىلىكتىلىك تالاپتارىما سايكەس ۇسىنىستار كوپ ءتۇستى. سولاردىڭ ىشىندە, «تۇرعىن ءۇي-كوممۋنالدىق شارۋاشىلىعىن جاڭعىرتۋ مەن دامىتۋدىڭ قازاقستاندىق ورتالىعى» اق باسقارما توراعاسىنىڭ ورىنباسارى دەگەن ۇسىنىس مەن ءۇشىن ەڭ قولايلى بولدى. سەبەبى مەن تۇرعىن ءۇي-كوممۋنالدىق شارۋاشىلىعى سالاسىنداعى جۇمىستى جالعاستىرا الامىن دەپ ويلادىم. سونىمەن قاتار مەن جەتەكشىلىك ەتەتىن باعىتتار قىزىعۋشىلىعىمدى تۋعىزدى. بۇل سالاداعى ماڭىزدى جۇمىستار مەنىڭ ءبىلىمىم مەن تاجىريبەمدى ايتارلىقتاي تولىقتىرادى. تۇرعىن ءۇي-كوممۋنالدىق شارۋاشىلىق سالاسىنداعى كەيىنگى رەفورمالاردى ەسكەرە وتىرىپ, بۇل تاعايىنداۋ وسىنداي ءىرى وزگەرىستەر كەزىندە مەن ءۇشىن ءبىر مەزگىلدە ۇلكەن سىن بولعانىن دا جاسىرمايمىن. سەبەبى, بۇل رەفورمالاردى ىسكە اسىرۋدىڭ ماڭىزدىلىعى تۋرالى مەملەكەت باسشىسى بيىلعى 1 قىركۇيەكتەگى قازاقستان حالقىنا جولداۋىندا اتاپ وتكەن بولاتىن», دەيدى باسقارما توراعاسىنىڭ ورىنباسارى.
نۇربەكتىڭ ايتۋىنشا, تۇرعىن ءۇيدى باسقارۋ جانە كۇتىپ-ۇستاۋ ماسەلەلەرىندە ءالى دە اۋقىمدى جۇمىستار اتقارىلاتىن كورىنەدى. ول ءۇشىن ەسەلى ەڭبەك پەن قارىمدى قابىلەت قاجەت. ال بۇل قاسيەتتەردىڭ بارلىعىن نۇربەك نۇرجان ۇلىنىڭ بويىنان تابۋعا بولادى. سوندىقتان 13 مىڭ ادامنىڭ اراسىندا ۇزدىكتەر قاتارىنان كورىنىپ, ۇلكەن ءۇمىت ارقالاعان ازامات بۇل سالادا دا تاباندى ەڭبەك ەتۋدى كوزدەپ وتىر. «وسى سالانى جەتىلدىرۋ بويىنشا جۇمىسىمدى جالعاستىرامىن دەگەن جوسپارىم بار», دەيدى نۇربەك.