قۇرلىقتىق حوككەي ليگاسىندا (قحل) باق سىنايتىن ەلوردانىڭ «بارىس» كلۋبى ەكى اپتالىق كارانتيننەن شىعىپ, مۇزايدىنعا ورالدى. ۇزىلىستەن كەيىنگى ءبىرىنشى ويىندا سانكت-پەتەربۋرگتىڭ سكا كلۋبىن قابىلداپ, بۋلليت سەرياسىندا باسىم ءتۇستى.
وسىدان ەكى اپتا بۇرىن «بارىستىڭ» بىرقاتار ويىنشىسى مەن باپكەرلەر قۇرامى كوروناۆيرۋس ىندەتىنە شالدىعىپ, ەكى اپتالىق كارانتينگە جابىلعان ەدى. وسىلايشا, 14 كۇندىك «دەمالىس» العان ەلوردا كومانداسى «بارىس ارەنا» مۇزسارايىندا وتكەن ويىنعا وتە تىڭ جانە جاقسى دايىندىقپەن كەلگەنى بايقالدى. باسەكە باستالعان بەتتە ويىن تىزگىنىن قولعا العان «بارىس» سايىپقىراندارى ءبىرىنشى كەزەڭنىڭ وزىندە سكا قاقپاسىنا قاتارىنان ەكى شايبا سوقتى. گول اۆتورلارى – انتون ساگادەەۆ (14-مينۋت) پەن كوماندا كاپيتانى داررەن ديتس (19-مينۋت). ۇزىلىسكە دەيىن سانكت-پەتەربۋرگ ۇجىمى ەسەپ ايىرماسىن قانشا قىسقارتۋعا تىرىسقانىمەن, وعان «بارىستىڭ» قىراعى قاقپاشىسى حەنريك كارلسسون مۇمكىندىك بەرگەن جوق.
ەكى شايبا ايىرماشىلىعىمەن العا شىققان سوڭ ازداپ ەركىنسىپ كەتكەن «بارىستى» سكا حوككەيشىلەرى ەكىنشى كەزەڭدە سابالارىنا ءتۇسىردى. ويىننىڭ 29-مينۋتىندا يۆان موروزوۆ مەرگەندىگىمەن كوزگە تۇسسە, ءۇشىنشى 20 مينۋتتىقتا دا ەكى دۇركىن گاگارين كۋبوگىنىڭ يەگەرلەرى ءبىر شايبا سوعىپ, تابلوداعى كورسەتكىشتى 2:2-گە جەتكىزدى. شايبا اۆتورى – ەۆگەني تيمكين.
نەگىزگى ۋاقىت پەن وۆەرتايمدا تەڭ تۇسكەن سوڭ, جەڭىمپاز كوماندانىڭ ەسىمى بۋلليت سەرياسىندا انىقتالدى. بەس شايبانىڭ ۇشەۋىن قاقپاعا ءدال باعىتتاعان «بارىس» حوككەيشىلەرى جەڭىسكە جەتتى. تاعى ءبىر ايتا كەتەرلىگى, «بارىس» كەيىنگى بەس جىلدا ءبىرىنشى رەت سكا كلۋبىنان باسىم ءتۇسىپ وتىر. بۇعان دەيىن جەرلەستەرىمىز 2015 جىلدىڭ 28 قازانىندا ەلوردادا وتكەن باسەكەدە سانكت-پەتەربۋرگ كومانداسىنان 4:2 ناتيجەسىمەن باسىم تۇسكەن ەدى. وسى ۋاقىتقا دەيىن «بارىسپەن» وتكەن بارلىق ماتچتا سكا-نىڭ مەرەيى ۇستەم بولعان.
ماتچتان كەيىن ويىن تۋرالى پىكىر بىلدىرگەن «بارىستىڭ» باس باپكەرى يۋري ميحايليس ۇزىلىستەن كەيىن ويناۋ قيىن بولسا دا, حوككەيشىلەر مۇزايدىنعا تەك جەڭىس ءۇشىن شىقتى دەيدى.
– ويىن ءبىز ءۇشىن قيىن بولدى. ءبىرىنشى كەزەڭدە باسىم تۇسكەنىمىزبەن, ەكىنشى جانە ءۇشىنشى كەزەڭدە قارسىلاسقا ەسە جىبەردىك. ارينە, قاشاندا ۇزىلىستەن كەيىن ماتچ وتكىزۋ قيىن. سوعان قاراماستان تاباندىلىق كورسەتىپ, جەڭىسكە جەتكەن كومانداما ريزامىن. جىگىتتەر كوپ كۇش جۇمسادى. مۇزايدىنعا شىققان بارلىعىنا كوڭىلىم تولدى, اسىرەسە حەنريك كارلسسوندى ەرەكشە اتاپ وتكىم كەلەدى. ول بۇگىن وتە جاقسى وينادى. دەسە دە, ويىندا تەحنيكالىق قاتەلىك كوپ بولعانىن جاسىرمايمىن. الداعى ۋاقىتتا وسى قاتەلىكپەن جۇمىس ىستەيتىن بولامىز. ءار ويىن سايىن جاقسى قىرىمىزدان كورىنىپ, جانكۇيەرلەردى جەڭىسىمىزبەن قۋانتامىز دەگەن ويدامىن.
بيىلعى تۇراقتى بىرىنشىلىكتە «بارىس» وسىمەن ءۇشىنشى جەڭىسىنە قول جەتكىزدى. جەتى تۋردان كەيىن ەلوردا كومانداسى قحل-دىڭ «شىعىس» كونفەرەنتسياسىنداعى تۋرنير كەستەسىندە 9 ۇپايمەن توعىزىنشى ورىندا كەلەدى. ال سكا بيىلعى ماۋسىمدا بەسىنشى مارتە جەڭىلىستىڭ كەرمەك ءدامىن تاتۋعا ءماجبۇر بولدى. دەسە دە, 8 ويىندا جەڭىسكە جەتكەن سانكت-پەتەربۋرگ ۇجىمى «باتىس» كونفەرەنتسياسىندا ەكىنشى ورىندا تۇر.
«بارىس» كەلەسى ويىنىن ەرتەڭ سىرت ايدىندا ەكاتەرينبۋرگتىڭ «اۆتوموبيليست» كلۋبىمەن وتكىزەدى.