بۇگىن پەتروپاۆل قالاسىنىڭ ورتاسىنداعى اباي كوشەسىندەگى 59-شى ءنومىرلى توعىز قاباتتى ءۇيدىڭ التىنشى قاباتىنداعى 2 بولمەلى ۇيدەن ءورت شىعىپ, قالالىقتاردى ۇلكەن ابىگەرگە سالدى. ءورت تۋرالى دابىل 16 ساعات 13 مينوتتە تۇسكەن, ال ورتسوندىرۋشىلەر التى مينوتتە جەتتى.
ءورت سوندىرۋگە №3-ءشى ءورتسوندىرۋ ءبولىمىنىڭ بولىمشەسى مەن قالانىڭ №1-ءشى ارناۋلى ءورتسوندىرۋ بولىمىنەن 8 دانا تەحنيكا مەن 26 ادام قاتىستى. كاسىبي شەبەرلىكتەرىنىڭ ارقاسىندا ورتسوندىرۋشىلەر ءتىلسىز جاۋدى 12 مينوتتە قۇرىقتاپ ۇلگەردى. وسى از عانا ۋاقىتتىڭ ىشىندە بيىك ۇيدەن 78 ادام ەۆاكۋاتسيالاندى, ونىڭ 18 جاس بالالار. ءورتتىڭ ىشىندە تىكەلەي قالعان ەكى ادام قۇتقارىلدى. سونىڭ ىشىندە 1973 جىلى تۋعان 2-ءشى توپتاعى مۇگەدەك وزدىگىنەن جۇرە المايتىن بولعاندىقتان ورتسوندىرۋشىلەر ونى زەمبىلمەن الىپ شىقتى. بىراق جىگىتتىڭ جاعدايى اۋىر, ونىڭ دەنەسىنىڭ 75 پايىزىن ءورت شالعان. قازىر ول اۋرۋحانادا اۋىر حالدە جاتىر.
ال ءورتتىڭ كەزىندە وشىرىلگەن جارىقتىڭ كەسىرىنەن ليفتە تۇتقىندالىپ قالعان ازامات كىرەبەرىستەگى تۇتىنگە تۇنشىعىپ, السىرەپ قالعان ەكەن. ورتسوندىرۋشىلەر ونى 7-ءشى جانە 8-ءشى قاباتتاردىڭ اراسىندا توقتاپ قالعان ليفتەن ەسىگىن بۇزىپ, زورعا الىپ شىقتى. العاشقى كومەك كورسەتىلگەننەن كەيىن جىگىت ەسىن جيناپ, اۋرۋحاناعا بارۋدان ءوزى باس تارتتى. ء«تۇتىن كىرەبەرىسكە تولىپ كەتكەندىكتەن ونىڭ جاعدايى اۋىر حالگە جەتكەن. سوندىقتان ورتسوندىرۋشىلەر ءليفتىڭ ەسىگىن سۇيمەنمەن بۇزۋعا ءماجبۇر بولدى. ەسىك اشىلعان بويدا ءبىزدىڭ جىگىتتەر ونىڭ باسىنا اۋا بەرەتىن قۇتقارۋشى كاپيۋشون كيگىزىپ, ەسىن جيناتتى. سونىمەن بىرگە پسيحولوگيالىق كومەك تە جاسالدى. ءوز وزىنە كەلگەن سوڭ ازامات ءوز اياعىمەن ءجۇرىپ, اۋرۋحاناعا بارعىسى كەلمەدى», دەدى ءبىرىنشى ءورت ءسوندىرۋ ءبولىمى باستىعىنىڭ ورىنباسارى, وسى ءورتتى سوندىرۋگە باعىنىشتىلارىن جۇمىلدىرعان ازاماتتىق قورعانىس مايورى مارات نۇرعاليەۆ.
سونىمەن بىرگە ول ء ورتسوندىرۋ ماشيناسىنىڭ ۇيگە جاقىن كەلۋىندە قيىنشىلىق بولعانىن جەتكىزدى. ويتكەنى, ءۇيدىڭ ماڭىنداعى اۋلادا جەكەمەنشىك جەڭىل ماشينالار تولىپ تۇرعان. «سول سەبەپتى اۆتوساتىنى دا قويۋعا مۇمكىنشىلىك بولمادى», دەدى ول.
كىرەبەرىستىڭ ءىشى تۇتىنگە تولىپ كەتكەن جاعدايدا جۇمىس ىستەگەن ورتسوندىرۋشىلەر وزدەرىن ناعىز كاسىبي ماماندار رەتىندە كورسەتتى. باسقا ادام بۇل كىرەبەرىسكە باس تا سۇعا الماس ەدى. ورتسوندىرۋشىلەر كەلگەن بويىندا ايماقتى جىپپەن قورشاپ, وزگە ادامداردىڭ زارداپ شەگۋىنە بولمايتىنداي ەتتى. بۇل ۋاقىتتا باسقا قىزمەتكەرلەر ءورت شىققان ۇيدە قالعان ادامداردى شىعارۋمەن اينالىستى. ال ءورتتىڭ نەگىزگى وشاعىن سوندىرۋگە قالعان ورتسوندىرۋشىلەر جۇمىلدىرىلدى. وسىنداي ىڭعايسىز جاعدايداعى ۇلكەن ءورتتىڭ 12 مينوتتە سوندىرىلگەندىگىنىڭ ءوزى – ناعىز كاسىبي شەبەرلىكتى كورسەتىپ تۇر.
قازىر ءورتتىڭ شىعۋ سەبەپتەرى انىقتالۋدا. الدىن الا جاسالعان بولجامعا قاراعاندا ول مۇگەدەك ادامنىڭ توسەكتە تەمەكى تارتقاندىعىنان بولۋى مۇمكىن.
پەتروپاۆل