تەننيستەن پاريجدە ءوتىپ جاتقان «رولان گارروس» ءتۋرنيرىنىڭ ەكىنشى اينالىمىندا باق سىناعان ءۇش بىردەي وتانداسىمىز قارسىلاستارىنان جەڭىلىپ, جارىستى ەرتە اياقتاۋعا ءماجبۇر بولدى.
ءبىرىنشى بولىپ كورتقا شىققان يۋليا پۋتينتسەۆا الەمدىك رەيتينگتە 131-ورىندا تۇرعان ارگەنتينالىق ناديا پودوروشكامەن كەزدەسىپ, ءۇش سەتتە (6:3, 6:1, 6:2) جەڭىلىپ قالدى. ەرلەر اراسىنداعى باسەكەنىڭ العاشقى اينالىمىندا الەمدىك رەيتينگتە 15-ورىندا تۇرعان يتاليالىق فابيو ءفونينيدى جەڭگەن ميحايل كۋكۋشكين ەكىنشى كەزەڭدە رەيتينگتە 105-ورىندا تۇرعان يسپانيالىق پەدرو مارتينەس پورتەرومەن كەزدەستى. بۇل باسەكەدە قازاقستاندىق تەننيسشىنىڭ ويىنى مۇلدەم جۇرگەن جوق. جەرلەسىمىز ءۇش سەتتە (6:3, 6:1, 6:0) ەسە جىبەردى.
سونىمەن قاتار الەمنىڭ 9-راكەتكاسى فرانتسيالىق گاەل ءمونفيستى ۇتىپ, سەنساتسيا جاساعان الەكساندر بۋبليك ەكىنشى كەزەڭدە الەمنىڭ 46-راكەتكاسى يتاليالىق لورەنتسو سونەگونى جەڭە المادى. ءۇش سەتكە سوزىلعان ماتچتا جەرلەسىمىز 6:7, 1:6, 5:7 ناتيجەسىمەن جول بەردى. وسىلايشا, بۇگىنگە دەيىن ءتورت تەننيسشىمىز «رولان گارروس» جارىسىمەن قوش ايتىستى. ەندىگى بار ءۇمىت ەلىمىزدىڭ ءبىرىنشى راكەتكاسى ەلەنا رىباكينادا. ەكىنشى اينالىمدا ول فرانتسيا وكىلى فيونا فەررومەن كەزدەسەدى.