اپات ايتىپ كەلمەيدى عوي. ايتىپ كەلگەننىڭ وزىندە ونىڭ الدىن الاتىن قال-قاۋقارىمىز بىردە بولعانىمەن, بىردە بولا بەرمەيدى. قانداي دا ءبىر تابيعي, نە بولماسا تەحنوگەندىك اپاتقا تاپ بولا قالساق سانامىز سان-ساققا جۇگىرىپ, الدەكىمنەن الدەقانداي كومەك كۇتەمىز.
مۇندايدا ءوزىمىز سەكىلدى ەت پەن سۇيەكتەن جاراتىلعان ناعىز باتىرلار قول ۇشىن سوزار ەدى. ولار – ازاماتتىق قورعانىستىڭ الدىڭعى شەبىندە جۇرگەن توتەنشە جاعدايلار قىزمەتىنىڭ ماماندارى, بەيبىت كۇننىڭ باتىرلارى. بۇل كۇشتىك قۇرىلىمنىڭ ىرگە قالاعانىنا دا بيىل شيرەك عاسىر تولىپ وتىر.
بۇگىنگىنىڭ اقيقاتى – وسى! توپان سۋ جايىلسا, توتەپ بەرەتىن, ءتىلسىز جاۋ بوي بەرمەي بارا جاتسا, اپتىعىن اۋىزدىقتاي الاتىن قالقانىمىز بار. بىراق بۇل سالا دا ۇدايى دامۋدى, تۇلەۋ مەن تۇرلەنۋدى قاجەت ەتەدى. ونسىز دا, ازاماتتاردىڭ قۇقىعى مەن قاۋىپسىزدىگىن قامتاماسىز ەتۋدەن قولى بوسامايتىن ىشكى ىستەر مينيسترلىگىن ارتىق وكىلەتتىكتەن ارىلتاتىن كەز كەلدى. نەگە؟ سەبەبى عىلىمى مەن ءىلىمى, اسىرەسە زاماناۋي تەحنيكاسى دامىعان ءححى عاسىر – تابيعي جəنە تەحنوگەندى اپاتتار ءداۋىرى سانالادى. سوندىقتان اتالعان اپاتتارعا وسى ازاماتتىق قورعانىس سالاسىنداعى جەكە ۆەدومستۆومىز بولماي توتەپ بەرۋ اسا قيىن.
وسى ماسەلەگە مەملەكەت باسشىسى قاسىم-جومارت توقاەۆ «جاڭا جاعدايداعى قازاقستان: ءىس-قيمىل كەزەڭى» اتتى بيىلعى قازاقستان حالقىنا جولداۋىندا دا ايرىقشا ءمان بەرىپ وتىر. پرەزيدەنت بۇل سالانىڭ ماڭىزىن العا تارتا وتىرىپ «ىشكى ىستەر مينيسترلىگى قۇرىلىمىن قايتا قاراپ, ونى سالادان الشاق مىندەتتەردەن ارىلتۋ كەرەك. بۇل ماڭىزدى ۆەدومستۆو جۇمىسىنىڭ تيىمدىلىگىن ارتتىرادى. ءبىزدىڭ تابيعي جəنە تەحنوگەندى اپاتتار دəۋىرىنە قادام باسقانىمىزدى ەسكەرىپ, توتەنشە جاعدايلار مينيسترلىگىن قايتا قۇرۋ قاجەت دەپ سانايمىن», دەگەن بولاتىن.
مەملەكەت باسشىسىنىڭ حالىققا جولداۋى جاريالانعاننان كەيىن ارادا ءبىر اپتادان ارتىق ۋاقىت وتكەندە جاڭا مينيسترلىكتىڭ قۇرىلعانى تۋرالى حاباردار بولدىق. وسى جىلدىڭ 9 قىركۇيەگىندە قاسىم-جومارت توقاەۆتىڭ «قازاقستان رەسپۋبليكاسىنىڭ توتەنشە جاعدايلار مينيسترلىگىن قۇرۋ تۋرالى» جارلىعى جارىق كوردى.
ءيا, جولداۋدا بەرىلگەن تاپسىرمانى جۇزەگە اسىرۋدىڭ جۇيەلى جۇمىسى جولعا قويىلدى. وسىلايشا, بيىلعى 11 قىركۇيەكتە پرەزيدەنت توتەنشە جاعدايلار ءمينيسترى قىزمەتىنە بۇعان دەيىن ىشكى ىستەر ءمينيسترىنىڭ ورىنباسارى لاۋازىمىن اتقارعان يۋري ءيليندى تاعايىنداۋ تۋرالى جارلىققا قول قويدى.
الايدا بۇل ۆەدومستۆونى جوق جەردەن پايدا بولدى دەپ ايتۋعا تاعى اۋىز بارمايدى. ايتايىق, ەلىمىزدە بىرنەشە رەت قۇرىلىپ, بىرنەشە رەت مارتەبەسى اۋىسقان ورگانداردى ەسكە تۇسىرە قالساق, الدىمەن وسى ازاماتتىق قورعانىس سالاسى ويعا ورالار ەدى. كەڭەس وكىمەتى ىدىراپ, ەگەمەن ەل بولعانىمىزدان بەرگى جىلداردا توتەنشە جاعدايعا جاۋاپتى ورگان كوميتەت تە, اگەنتتىك تە, ءتىپتى جەكە مينيسترلىك تە بولىپ ۇلگەردى.
قوش. بايىرعى وكىلەتتىلىگى وزىنە قايتىپ ورالعان جاڭا ۆەدومستۆونىڭ ەندىگى جەمىسى مەن جەڭىسى الداعى جىلداردا تاجىريبەسىمەن ءتانتى ەتكەن يۋري ءيليننىڭ ەسىمىمەن بايلانىستى بولماق. الدا اۋقىمدى جۇمىستار كۇتىپ تۇر. ەلدەگى تىنىشتىق پەن تۇراقتىلىقتى تۇعىردان ءتۇسىرىپ الماۋ ءۇشىن دە بىلەك سىبانا ارەكەت ەتۋ قاجەت. سەبەبى بۇل سالانىڭ قىزمەت اۋانى اسا كەڭ. الۋان ءتۇرلى اپات بار. تەك وتكەن جىلدىڭ وزىندە قۇتقارۋشىلار تارازداعى كوپ قاباتتى ۇيدەگى جارىلىستىڭ, نۇر-سۇلتان قالاسىندا ءسۇت كومبيناتىنىڭ عيماراتىنداعى گاز جابدىقتارىنىڭ, سونداي-اق ارىستاعى اسكەري ءبولىمنىڭ وق-ءدارى قويماسىنداعى جارىلىستاردىڭ سالدارىن جويدى. ماڭعىستاۋ وبلىسىنىڭ «قالامقاس» مۇناي كەنى ورنىنداعى اپاتتى جويۋعا قاتىستى. اقمولا, الماتى, قاراعاندى جانە پاۆلودار وبلىستارىندا ورىن العان ءىرى تابيعي ورتپەن كۇرەس جۇرگىزدى. بۇعان قوسا ەلدەگى تاسقىن جانە سەل قۇبىلىستارىنىڭ سالدارىن ازايتۋ بويىنشا ءىس-شارالاردى قامتاماسىز ەتتى.
الدىمىزدا اپات اتاۋلىنىڭ بارلىعىن تۇگەندەپ شىعۋ مىندەتى دە تۇرعان جوق. ەڭ الدىمەن مەملەكەت باسشىسىنىڭ جارلىعىندا ايتىلعان ء«ورتتىڭ الدىن الۋ مەن ونى ءسوندىرۋ» ماسەلەسىن تىلگە تيەك ەتسەك پە دەيمىز. سەبەبى وسى جىلدىڭ وزىندە ەل اۋماعىندا جەتى مىڭعا جۋىق ءورت وقيعاسى تىركەلىپ وتىر.
«جىعىلاتىن جەرىمدى بىلسەم, سابان توسەپ قويار ەدىم عوي» دەمەكشى, قاتەردىڭ قاي كۇنى, قاي تۇستان تونەرى ءالى دە بەيمالىم. وتكەن جىلى رەسەيدىڭ قارا ورمانى وتقا ورانعاندا ء«تىلسىز جاۋ» دەپ بەكەر ايتىلماعان ەكەن عوي دەپ جاعامىزدى ۇستاپ ەدىك. ياعني توپان سۋ قانشالىقتى قاۋىپتى بولسا, اينالاسىن جالماعان جالىن دا سونشالىقتى قاسىرەت. وسىنداي وقىس وقيعالاردىڭ الدىن الامىز دەپ قانشاما جۇرەك جۇتقان ازامات باسىن بايگەگە تىگىپ ءجۇر.
«ناعىز ءورت ءسوندىرۋشى جۇكتەلگەن مىندەتتەردى اتقارۋ كەزىندە ءوزى تۋرالى ويلاماي, باسىن قاۋىپكە تىگىپ, ادامداردىڭ ءومىرىن قۇتقارۋى ءتيىس...». بۇل سويلەمدى ءبىز ءورت ءسوندىرۋشىنىڭ سوناۋ 1909 جىلعى لاۋازىمدىق نۇسقاۋلىعىنان الدىق. سودان بەرى ءبىر عاسىردان استام ۋاقىت ءوتتى دەمەسەڭىز, توتەنشە جاعدايلار قىزمەتىنىڭ ۇستانىمى وزگەرە قويعان جوق. بەيبىت كۇننىڭ باتىرلارى باياعىداي باسىن بايگەگە تىگىپ كەلەدى. ءبىر قىزىعى, قازاقستان اۋماعىندا وسى ءورت سوندىرۋشىلەر تۋرالى العاش ءحىح عاسىردىڭ سوڭىندا ايتىلا باستاعان كورىنەدى. ءتىپتى مۇراعات دەرەكتەرى 1934 جىلى ەل اۋماعىندا ءورت سوندىرۋگە ارنالعان 18 اۆتوكولىكتىڭ بولعانىن ايعاقتايدى. ەندىگى كۇنى ەلىمىزدەگى ءورت ءسوندىرۋ قىزمەتىنىڭ يەلىگىندە 2836 بىرلىك (1557 بىرلىك نەگىزگى, 340 بىرلىك ارنايى, 939 بىرلىك قوسالقى) تەحنيكا بار كورىنەدى. ياعني ءجۇز جىلدىق جىلناماعا جەتەر-جەتپەس ۋاقىتتا ارنايى تەحنيكامىزدىڭ ءوزى 18-دەن 2836-عا دەيىن ارتتى دەگەن ءسوز! سوڭعى رەت ءورت ءسوندىرۋ تەحنيكاسى وتكەن جىلى ساتىپ الىنىپتى. ال بۇگىندە ءتىلسىز جاۋمەن ارپالىسىپ جۇرگەن ءورت سوندىرۋشىلەر سانى ەلىمىزدە 12 مىڭنان اسىپ جىعىلادى.
تاۋەلسىزدىك جىلدارى ەلىمىزدە 350 مىڭنان استام ءورت وقيعاسى بولسا, وسى جىلدىڭ باسىنان بەرى 6960-تان استام ءورت تىركەلدى. وتكەن جىلى ەلىمىزدە ورىن العان ءورتتىڭ سانى 13922-گە جەتتى. جىل سايىن ەلىمىزدە ورتا ەسەپپەن العاندا 15 مىڭعا جۋىق ءورت بولاتىن كورىنەدى. قۇتقارۋشىلار توتەنشە جاعداي ورنىنان 8 مىڭعا جۋىق ادامدى قۇتقارىپ, 20 مىڭنان استام ادامدى ەۆاكۋاتسيالايدى. سوندىقتان بۇل سالادا ەڭبەك ەتەتىن ماماننىڭ دا, پايدالانىلاتىن تەحنيكانىڭ دا ارتىعى جوق. ءار قىزمەتكەردىڭ وزىنە جۇكتەلگەن مىندەتى, ءار تەحنيكانىڭ قولدانۋ اياسى بەلگىلەنگەن.
ءيا, ءورت ءسوندىرۋ ءىسى قانشالىقتى ماڭىزدى بولسا, سونشالىقتى قاۋىپتى. ونى ەڭبەكتەگەن بالادان, ەڭكەيگەن قارياعا دەيىن بىلەدى. سوعان قاراماستان اپاتپەن ارپالىسۋدان تايسالمايتىن ەر جۇرەك ازاماتتار ارامىزدا ءالى دە بار. ءبىر وكىنىشتىسى سول, اجالمەن ارپالىسىپ, ادام قۇتقارامىن دەپ ءجۇرىپ ءوز ءومىرىن قۇربان ەتكەندەردىڭ سانى 1991-2019 جىلدار ارالىعىندا 51-گە جەتىپ وتىر. ونداي ەرلىك ەل ەسىنەن ءوشسىن بە؟ ەشقاشان وشپەيدى. قىزمەتتىك مىندەتىن ورىنداۋ كەزىندە قازا تاپقانداردىڭ قۇرمەتىنە ەل كولەمىندە 30 ەسكەرتكىش قويىلىپ, 76 بۇرىش ورنالاستىرىلعان. بۇدان بولەك 14 ۆەدومستۆولىق مۇراجاي جۇمىس ىستەپ تۇر. وندا قازا تاپقان قىزمەتكەرلەردىڭ قىزمەتتىك كيىم-كەشەكتەرى مەن ناگرادالارى ساقتالعان.
ناگرادا دەمەكشى, ەلباسى نۇرسۇلتان نازارباەۆتىڭ 2006 جىلعى 5 ماۋسىمداعى №129 جارلىعىمەن ەلىمىزدە «ورتكە قارسى قىزمەت ورگاندارىنداعى ءمىنسىز قىزمەتى ءۇشىن» مەدالى بەكىتىلگەن ەدى. تاۋەلسىزدىك جىلدارى ەلىمىزدىڭ 30 مىڭنان استام ءورت ءسوندىرۋشىسى ءتۇرلى العىس حات, قۇرمەت گراموتالارى, مەدال, توسبەلگى, وردەندەرمەن ماراپاتتالدى.
سوناۋ 1996 جىلى ء«ورت قاۋىپسىزدىگى تۋرالى» زاڭنىڭ قابىلدانۋىنان باستاۋ العان ەلىمىزدىڭ ورتكە قارسى قىزمەتىن دامىتۋ جۇمىسى بۇگىندە جۇيەلى جولعا قويىلعان دەسە دە بولادى. ازاماتتىق قورعانىس سالاسىنىڭ ماماندارى جىل سايىن پروفيلاكتيكالىق ءىس-شارالار كەشەنىن وتكىزۋدى قولعا الىپ كەلەدى. اسىرەسە جىلىتۋ ماۋسىمى مەن ورماندا, دالادا ءورت تۇتانۋى ىقتيمال قاۋىپتى كەزەڭدەردە قاراپ قالعان ەمەس. بۇل ءىس-شارالارعا ءورت سوندىرۋشىلەر مەن قۇتقارۋشىلاردان بولەك, جەرگىلىكتى اتقارۋشى ورگانداردىڭ, پوليتسيانىڭ, مۇددەلى مەملەكەتتىك ورگانداردىڭ جانە ۇكىمەتتىك ەمەس سەكتور وكىلدەرى Jas Otan جاستار قاناتىنىڭ ۆولونتەرلەرى قاتىسادى. ماسەلەن, جىل سايىن جىلىتۋ ماۋسىمى قارساڭىندا ءورت قاۋىپسىزدىك ايلىعى ۇيىمداستىرىلادى. توتەنشە جاعداي ورگانىنىڭ ماماندارى الەۋمەتتىك قورعاۋ, ءبىلىم بەرۋ, دەنساۋلىق ساقتاۋ سالالارىنىڭ وكىلدەرىمەن بىرلەسىپ حالىقتىڭ الەۋمەتتىك وسال توپتارىنىڭ, جەتىمدەردىڭ, كوپبالالى وتباسىلاردىڭ, جالعىزباستى ادامداردىڭ ۇيلەرىن ارالايدى. بۇل جۇمىستار بارىسىندا الەۋمەتتىك قورعاۋ بولىمدەرىنىڭ ماماندارى حالىقتىڭ الەۋمەتتىك وسال توپتارىن ەسەپكە الادى, سونداي-اق ءورت قاۋىپسىزدىگى تالاپتارىن بۇزۋشىلىق فاكتىلەرى, قاجەتتى الەۋمەتتىك كومەك ءتۇرى انىقتالادى. بۇزۋشىلىقتار انىقتالعان جاعدايدا ولقىلىقتىڭ ورنىن تولتىرۋ بويىنشا جۇمىستار جۇرگىزىلەدى. رەيد بارىسىندا ءورت قاۋىپسىزدىك قاعيدالارى جازىلعان پاراقشالار, جادىنامالار, بۋكلەتتەر جانە باسقا ۇگىتتەۋ, ەسكەرتۋ ماتەريالدارى تاراتىلادى. نۇسقاۋلىقتار مەن ءتۇسىندىرۋ جۇمىستارى (اڭگىمەلەسۋلەر, ينتەراكتيۆتىك ساباقتار) نازارعا الىنادى.
سوعان قاراماستان ورتكە قاتىستى وقيعالار تولاستاماي تۇر. ماسەلەن, بيىل 23 ساۋىردە شىعىس قازاقستان وبلىسىنىڭ بەسقاراعاي اۋدانىندا گراچي اۋىلىنان 26 شاقىرىم جەردە «سەمەي ورمانى» مەملەكەتتىك ورمان تابيعي رەزەرۆاتىنىڭ دولونسكي فيليالى اۋماعىنداعى ورمان وتقا ورانىپ, ءتىلسىز جاۋ العاشىندا 300 گەكتار جەردى شارپىعان ەدى. ءورت ءسوندىرۋ جۇمىسى اۋا رايىنا, اۋا تەمپەراتۋراسىنا جانە جەلدىڭ ەكپىنى سەكۋندىنا 18 مەترگە دەيىن كۇشەيۋىنە بايلانىستى قيىنداپ, ءتىلسىز جاۋ تەك 25 ساۋىردە عانا اۋىزدىقتالدى. قىزىل جالىن شارپىعان جالپى اۋماق سول كەزدە 3948 گەكتارعا جەتتى.
5 ماۋسىمدا اتىراۋداعى اتامباەۆ كوشەسىندە ورنالاسقان «پرومگاز» جشس-ءنىڭ اۋماعىندا گاز جارىلىپ, اۆتوتسيستەرنا كابيناسى جالىنعا وراندى. سونىڭ سالدارىنان 60-70 مەتر قاشىقتىقتا تۇرعان عيمارات قيرادى. وعان وسى وڭىردەگى 25 ءورت ءسوندىرۋ قىزمەتكەرى مەن 4 تەحنيكا جۇمىلدىرىلدى. 4 ادامدى كۇيىك شالىپ, اۋرۋحاناعا جەتكىزىلدى. زارداپ شەككەندەردىڭ قاتارىندا جانار-جاعار ماي قۇيۋشى, گاز تاسۋشى كولىكتىڭ جۇرگىزۋشىسى جانە ەكى توتەنشە جاعدايلار قىزمەتكەرى بار.
13 شىلدەدە باتىس قازاقستان وبلىسىنداعى اقجايىق اۋدانىنىڭ بۋدارين اۋىلدىق وكرۋگىندە كولوۆەرتنوە كەنتىنەن 10 شاقىرىم جەردە «بۋدارين ورمانشىلىعى» كمم اۋماعىنداعى ورمان القابى وتقا ورانسا, وسى اقجايىق اۋدانىنىڭ چاپاەۆ اۋىلدىق وكرۋگى «چاپاەۆ ورمانشىلىعى» كمم جانە كونەككەتكەن اۋىلدىق وكرۋگى «ەسەنساي ورمانشىلىعى» كمم اۋماقتارىندا قۇرعاق ءشوپ پەن ورمان القابى جالىن قۇشتى.
18 شىلدەدە جامبىل وبلىسى مويىنقۇم اۋدانىنىڭ مويىنقۇم اۋىلىنان 180 شاقىرىم جەردە 44,6 مىڭ گەكتار اۋماقتاعى قۇرعاق ءشوپ پەن سەكسەۋىل ورتەنىپ, جالىن تەك 24 شىلدە كۇنى عانا اۋىزدىقتالدى.
ءبىز تەك بيىل ورىن العان ءورت وقيعالارىنىڭ اسا ءىرىسىن عانا ايتىپ وتىرمىز. اتالماي قالعانى قانشا. سولاي بولا تۇرا, وسى قاۋىپتى ماماندىقتى تاڭدايتىن ازاماتتار از ەمەس. ارينە, ارنايى دايارلىقتان وتپەگەن كەز كەلگەن ادام توتەنشە جاعدايلار قىزمەتىنىڭ ساپىندا ەڭبەك ەتە المايدى. ول ءۇشىن وقۋ مەن توقۋ قاجەت. سوندىقتان ەلىمىزدەگى ورتكە قارسى قىزمەت سالاسى جىل سايىن مامانداندىرىلعان وقۋ ورىندارىنىڭ تۇلەكتەرىمەن تولىقتىرىلىپ وتىرادى. مۇنداي وقۋ ورىندارى تۋرالى ايتقاندا كوكشەتاۋداعى تەحنيكالىق ينستيتۋتتى, اقتوبە جانە الماتى وبلىستارىنداعى كاسىپتىك دايارلاۋ مەكتەپتەرىن, 2 وڭىرلىك وقۋ ورتالىقتارىن ەسكەرۋ قاجەت. قاتارداعى, كىشى جانە ورتا باسشى قۇرام لاۋازىمدارىنا قىزمەتكە العاش رەت كەلەتىن ازاماتتار ءۇشىن جىل سايىن باستاپقى دايارلاۋ كۋرستارى, ال ازاماتتىق قورعاۋ ورگاندارىندا جۇمىس ىستەپ جۇرگەن قىزمەتكەرلەر ءۇشىن قايتا دايارلاۋ جانە بىلىكتىلىگىن ارتتىرۋ كۋرستارى ۇيىمداستىرىلادى. سونىمەن قاتار جەرگىلىكتى اتقارۋشى ورگاندار مەن باسقا دا مەملەكەتتىك ورگانداردىڭ قىزمەتكەرلەرى ءۇشىن ورتكە قارسى مينيمۋم بويىنشا وقىتۋ جۇرگىزىلەدى. وقۋ اياقتالعاننان كەيىن ارنايى كۋالىك بەرىلەدى. وسىلايشا ەلىمىزدەگى ازاماتتىق قورعانىس جۇيەسى قۇرىلعاننان باستاپ كاسىپتىك دايارلاۋ مەكتەپتەرىندە شامامەن 120 800-گە جۋىق ادام وقىتىلعان ەكەن.
ءورت سوندىرۋشىلەردىڭ تاجىريبەسىن شىڭداپ, شەبەرلىگىن ارتتىراتىن تاعى ءبىر قۇرال بار. بۇل – وسى سالا ماماندارىنىڭ اراسىندا ۇيىمداستىرىلاتىن ءتۇرلى جارىستار مەن حالىقارالىق سايىستار. ءورت ءسوندىرۋ قۇرالدارىن بارىنشا جىلدام جوعارى كوتەرۋ, عيماراتتىڭ جوعارى قاباتتارىندا قالعان ادامداردى قۇتقارۋ, بيىكتىكتە, تۇتىندە جانە جوعارى تەمپەراتۋرادا جۇمىس ىستەۋ, كۇردەلى جاعدايلاردا ءارتۇرلى كەدەرگىلەردى ەڭسەرۋ – ءورت سوندىرۋشىلەردەن شىدامدىلىق پەن كۇش-جىگەردى, فيزيكالىق دايىندىقتى, باتىلدىق پەن جىلدامدىقتى تالاپ ەتەدى. بۇل قاسيەتتەر ەڭ الدىمەن سپورتپەن شۇعىلدانۋ كەزىندە شىڭدالادى.
بۇل رەتتە سپورتتىق جارىستاردىڭ ماڭىزى اسا زور. ەلىمىزدىڭ ءورت سوندىرۋشىلەرى وسىنداي حالىقارالىق سايىستارعا ءورت ءسوندىرۋ-قۇتقارۋ سپورتىنا حالىقارالىق مارتەبە بەرىلگەن 2001 جىلدان بەرى قاتىسىپ كەلەدى. ال 2004 جىلدان باستاپ وتانداستارىمىز ەۋروپا مەن ازيانىڭ 20-دان استام ەلى كىرەتىن حالىقارالىق سپورت فەدەراتسياسىنىڭ مۇشەسى سانالادى. تۇسىنگەن ادامعا بۇل دا ءبىر ۇلكەن جەتىستىك. وسى كۇنى ەلىمىزدە ءورت ءسوندىرۋ-قۇتقارۋ سپورتى بويىنشا 19 ەرلەر, 12 ايەلدەر جانە 16 جاسوسپىرىمدەر سەكتسياسى بار. جاتتىقتىرۋشىلار شتابىنىڭ قۇرامى 34 ادامنان اسادى. سونىڭ ناتيجەسىندە جىل سايىن سىناق كورسەتكىشتەرى جاقسارىپ, جاڭا ۇلتتىق رەكوردتار ورناتىلۋدا. بۇعان سپورتشىلاردىڭ ماقساتتى دايارلىعى, رەسپۋبليكالىق تۋرنيرلەر مەن قولدانبالى سپورت تۇرىنەن الەم چەمپيوناتتارىنا قاتىسۋى ارقىلى قول جەتكىزىلۋدە. حالىقارالىق ارەنادا قازاقستاننىڭ اتىنان 3 ۇلتتىق قۇراما (ەرلەر, ايەلدەر جانە جاسوسپىرىمدەر) ونەر كورسەتىپ كەلەدى. وسى ۋاقىت ارالىعىندا سپورتشىلارىمىز الەم چەمپيوناتىنا 15 جانە حالىقارالىق جارىستارعا 19 رەت قاتىسىپ, جالپى كوماندالىق جانە جەكە سىناقتاردا جۇلدەگەر اتانىپ ۇلگەردى. 2014 جىلى ءورت-قۇتقارۋ سپورتى ەلىمىزدەگى سپورت تۇرلەرىنىڭ تىزىلىمىنە ەنگىزىلدى. كوماندا اكتيۆىندە 17 حالىقارالىق دارەجەدەگى سپورت شەبەرى, 60 سپورت شەبەرى, 92 سپورت شەبەرىنە ۇمىتكەر, سونداي-اق 262 رازريادتاۋشى سپورتشى بار. تورەشىلەر قۇرامى حالىقارالىق ساناتتاعى 8 سۋديادان تۇرادى. جاتتىقتىرۋشىلار قۇرامىنا ۇلتتىق ساناتتاعى 2 جاتتىقتىرۋشى ەنىپ وتىر.
ماسەلەن, ءبىزدىڭ جاسوسپىرىمدەرىمىز 2018 جىلى ۆارنا قالاسىندا (بولگاريا) وتكەن الەم چەمپيوناتىندا جالپى ەسەپتە 4-ورىنعا يە بولدى. سونىمەن قاتار كۇردەلى پاندەردىڭ بىرىندە جاسوسپىرىمدەر ءبىرىنشى ورىندى جەڭىپ الىپ, «جاۋىنگەرلىك قانات جايۋ» بويىنشا الەم چەمپيونى اتاندى. وتكەن جىلى وسى كوماندا ساراتوۆ قالاسىندا (رەسەي) وتكەن حالىقارالىق بىرىنشىلىكتە 3-ورىنعا تابان تىرەدى. ايەلدەر قۇراماسى 2017 جىلى يزمير قالاسىندا (تۇركيا) الەمنىڭ قولا جۇلدەگەرى اتاسا, وتكەن جىلى ساراتوۆتا (رەسەي) جالپى كوماندالىق ەسەپتە 4-ءنشى بولىپ, «جاۋىنگەرلىك قانات جايۋ» پانىنەن «كۇمىستى» جەڭىپ الدى. ەرلەر قۇراماسى 2017 جىلى يزميردە (تۇركيا) جالپى رەيتينگتە 7-ورىنعا تۇراقتاپ, 2018 جىلى بانسكا قالاسىندا (سلوۆاكيا) 5-ورىنعا كوتەرىلدى. ال وتكەن جىلى ساراتوۆتا تارتىستى باسەكەگە ءتۇسىپ, ەكىنشى ورىندى يەلەندى.
P.S. نەسىن جاسىرايىق, جاڭا ۆەدومستۆونىڭ جۇمىسىنان ءبارىمىز دە جەمىستى ناتيجە كۇتەمىز. اپاتتارمەن كۇرەسۋدەن بۇرىن, ونى بولدىرماۋ, الدىن الۋ جۇمىستارىنا ءمان بەرىلسە دەيمىز عوي, باياعى. سوندىقتان جولداۋدا بەرىلگەن تاپسىرمالاردى جۇزەگە اسىرۋدىڭ جولىن ايقىنداپ جاتقانىمىز ماڭىزدى. سەبەبى مەملەكەت باسشىسى ايتىپ وتكەندەي, داعدارىس جاعدايىندا اتقارىلاتىن ءىس-شارالاردىڭ جەمىستى جۇزەگە اسۋى əرقايسىسىمىزعا بايلانىستى.