بۇگىن ەلوردادا مادەنيەت جانە ونەر سالاسى ۇيىمدارى مەن قىزمەتكەرلەرىنىڭ III رەسپۋبليكالىق "رۋحاني قازىنا – 2020" بايقاۋى باستالدى. كوروناۆيرۋس پاندەمياسىنا بايلانىستى بايقاۋ ونلاين فورماتتا وتۋدە, دەپ حابارلايدى Egemen.kz
ءۇشىنشى رەت ۇيىمداستىرىلعان بايقاۋعا مەملەكەتتىك مۋزەيلەر, كىتاپحانالار, مادەنيەت ۇيلەرى مەن اۋىلدىق كلۋبتار قاتىسۋدا.
وڭىرلەردەگى ىرىكتەۋ كەزەڭى 14 قىركۇيەككە دەيىن ءوتىپ, ۇزدىك شىققاندار رەسپۋبليكالىق كەزەڭگە جولداما العان بولاتىن. ال رەسپۋبليكالىق بايقاۋ قىركۇيەك ايىنىڭ 30-نا دەيىن جالعاسادى.
قازىلار القاسىنىڭ مۇشەلەرى ەكى كۇن بويى ونلاين فورماتتا قاتىسۋشىلاردىڭ ەڭبەكتەرىن باعالايدى. ءار سالا بويىنشا ىرىكتەۋ جۇمىستارىن باعالاۋ تىكەلەي ەفيردە كورسەتىلەدى. مىسالى, كىتاپحانا سالاسى بويىنشا ۇلتتىق اكادەميالىق كىتاپحاناسىنىڭ, مۋزەي سالاسى بويىنشا ۇلتتىق مۋزەيدىڭ, ال, مادەنيەت ۇيىمدارىنىڭ ۇزدىكتەرىن انىقتاۋ «قازاقكونتسەرت» مەملەكەتتىك كونتسەرتتىك ۇيىمىنىڭ Facebook پاراقشالارىندا تىكەلەي ەفيردە وتەدى.
رەسپۋبليكالىق كەزەڭگە قاتىسۋ ءۇشىن ەلىمىزدىڭ 17 وڭىرىنەن 180-نەن استام ءوتىنىم كەلىپ ءتۇستى. سونىڭ ىشىندە كىتاپحانا سالاسى بويىنشا – 80 ءوتىنىم, مۋزەي ءىسى بويىنشا – 42 ءوتىنىم, مادەنيەت ۇيلەرى, كلۋبتار سالاسى بويىنشا – 60 ءوتىنىم.
ال, جەڭىمپازداردى ماراپاتتاۋ ءراسىمى 7 قازاندا نۇر-سۇلتان قالاسىندا ەپيدەميولوگيالىق جاعدايدى ەسكەرە وتىرىپ, ونلاين فورماتتا نەمەسە كارانتين تالاپتارىن ساقتاي وتىرىپ تەك قانا جەڭىمپازداردىڭ قاتىسۋىمەن قازاقستان رەسپۋبليكاسىنىڭ ۇلتتىق مۋزەيىندە وتەدى دەپ جوسپارلانۋدا. ماراپاتتاۋ ءراسىمى مادەنيەت جانە سپورت مينيسترلىگىنىڭ Youtube, Facebook رەسمي پاراقشالارىندا تىكەلەي ەفيردە كورسەتىلەدى. بابى مەن باعى قاتار جانعان تالانتتار ارنايى ديپلوممەن جانە قارجىلاي سىيلىقتارمەن ماراپاتتالادى.