سولتۇستىكقازاقستاندىق پوليتسەيلەر وڭىردەگى ورمان, سۋ القاپتارىنا پروفيلاكتيكالىق رەيدتەردى اڭشىلىق ماۋسىمى باستالعان 5 قىركۇيەكتەن بەرى جالعاستىرىپ كەلەدى. وندا اڭ-قۇستى زاڭسىز اتۋ عانا ەمەس, وتتى قارۋدى ساقتاۋ جانە تاسىمالداۋ قاعيدالارى, ءورت جانە جەكە قاۋىپسىزدىك تەحنيكاسىن ساقتاۋ, اڭشىلىق قۇجاتتارىنىڭ بار-جوعى جانە تاعى باسقا تەكسەرىلەدى. وتتى قارۋدى بەلگىلەنگەن نۇسقاماعا سايكەس ساقتاماۋ – اڭشىنىڭ ءوزى مەن ماڭايىنداعى ادامدارعا قاۋىپ تۋدىرادى.
وعى وقپاننان شىعارىلماي تاستاي سالعان مىلتىق جانعان وتتىڭ جانىندا جاتسا وزدىگىنەن اتىلىپ, بىرەۋدى مەرت قىلماسا دا جارالاۋى ابدەن مۇمكىن. ال اڭشىلاردىڭ كوبى مىلتىقتىڭ قاتاڭ ساقتالۋىنا ءمان بەرە قويمايدى.
مىنە, وسىنداي اڭشىلارمەن ۋچاسكەلىك ينسپەكتورلار جانە تابيعاتتى قورعاۋ پوليتسياسى اڭشىلىق شارۋاشىلىعىنداعى قورىقشىلارىمەن بىرلەسە وتىرىپ, اڭگىمە وتكىزىپ, مىلتىقتى قاۋىپسىز ساقتاۋدىڭ ەرەجەلەرىن ەستەرىنە سالىپ وتىرادى.
وبلىستىق پد اكىمشىلىك پوليتسيا باسقارماسى ازاماتتىق جانە قىزمەتتىك قارۋ اينالىمىن باقىلاۋ توبىنىڭ اعا ينسپەكتورى, پوليتسيا مايورى قۇرمان مۋسين قارۋدى ساتىپ الۋ, ساقتاۋ نەمەسە تاسىمالداۋ قاعيدالارىن بۇزعانى ءۇشىن جىل باسىنان بەرى 429 حاتتاما تولتىرىلعانىن ايتتى. اكىمشىلىك كودەكستىڭ وسى بۇزۋشىلىقتىڭ جازالايتىن بابىنا سايكەس جەكە تۇلعالارعا ون ايلىق ەسەپتىك كورسەتكىش مولشەرىندە ايىپپۇل سالىنعان.
اڭشىلار قاجەتتى قۇجاتتاردىڭ ءتىزىمىن ءبىلۋى, سونداي-اق كاسىپشىلىك نەمەسە سپورتتىق اڭ اۋلاۋ كەزىندە 2015 جىلعى 27 اقپانداعى اۋىل شارۋاشىلىعى ءمينيسترىنىڭ بۇيرىعىمەن بەكىتىلگەن «اڭ اۋلاۋ قاعيدالارىنا» سايكەس قارۋدى تاسىمالداۋ تالاپتارىن مۇلتىكسىز ساقتاۋلارى قاجەت. جولدامانىڭ قولدانىلۋ اۋماعىنان تىس جەردە اڭشى اتىس قارۋىن وعى الىنعان جانە بولشەكتەنگەن كۇيدە ۇستاۋى كەرەك. سونىمەن قاتار اڭ اۋلاۋ كەزىندە ىشىمدىك ىشۋگە تىيىم سالىنادى. الايدا وسى تالاپتى ساقتايتىن اڭشىلار از.
تىركەلمەگەن قارۋدى ۇستاپ جۇرەتىن اڭشىلار دا كەزدەسەدى. ونداي قارۋ بىردەن تاركىلەنەدى. «ەگەر ءسىز تىركەلمەگەن قارۋ تاۋىپ الساڭىز نەمەسە ول قايتىس بولعان تۋىستارىڭىزدان قالعان جانە تاعى باسقا جاعدايدا تابىلعان بولسا – بۇل جايىندا «102» ءنومىرى بويىنشا شۇعىل پوليتسياعا حابارلاۋ قاجەتتىگىن ەستەرىڭىزگە سالامىز», – دەيدى قۇرمان مۋسين. – «مەكەنجايعا جەدەل-تەرگەۋ توبى بارىپ, قارۋ بەلگىلەنگەن ءتارتىپ بويىنشا الىناتىن بولادى. قارۋدى ەرىكتى تۇردە تاپسىرۋ, ەگەر ادامنىڭ ءىس-ارەكەتىندە وزگە قىلمىس قۇرامى بولماعان جاعدايدا قىلمىستىق نەمەسە اكىمشىلىك جاۋاپكەرشىلىكتەن بوساتىلادى».
جالپى, جىل باسىنان بەرى وبلىس اۋماعىندا وتتى قارۋعا بايلانىستى 661 قۇقىق اكىمشىلىك بۇزۋشىلىق انىقتالعان.
سولتۇستىك قازاقستان وبلىسى