پرەزيدەنتى جانىنداعى ۇلتتىق قوعامدىق سەنىم كەڭەسىنىڭ (ۇقسك) مۇشەلەرى 2020 جىلدىڭ 18 قىركۇيەگىندە ونلاين رەجيمدە قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆپەن الەۋمەتتىك ساياساتتىڭ وزەكتى ماسەلەلەرىن تالقىلادى.
جۇمىس وتىرىسىنا الەۋمەتتانۋشى, «ستراتەگيا» الەۋمەتتىك-ساياسي زەرتتەۋلەر ورتالىعى» قق ديرەكتورى گۇلميرا ىلەۋوۆا, قازاقستانداعى بۇۇ دامۋ باعدارلاماسىنىڭ جەتەكشىسى ارمان قاشقىنبەكوۆ, «تالاپ» قولدانبالى زەرتتەۋلەر ورتالىعىنىڭ پرەزيدەنتى, «نۇر وتان» پارتياسى ساياسي كەڭەسىنىڭ مۇشەسى راحىم وشاقباەۆ, ساياساتتانۋشى, BTS Digital عىلىمي جوباسىنىڭ جەتەكشىسى ساياسات نۇربەك, الەۋمەتتىك كاسىپكەر ەمين اسكەروۆ, ەۋروپالىق قۇقىق جانە ادام قۇقىعى ساراپتامالىق ينستيتۋتىنىڭ ديرەكتورى مارات باشيموۆ, جۋرناليست ماكسيم روجين, قوعام قايراتكەرى, ساياساتتانۋشى ايدوس سارىم, «اكسەلەراتور دوبرا» رەسپۋبليكالىق ەرىكتىلەر قوزعالىسىنىڭ جەتەكشىسى, زاڭگەر اينۇر ءسابيتوۆا, جۋرناليست جانە قوعام قايراتكەرى ءلاززات كوجاحمەت قاتىستى.
ۇقسك حاتشىسى ەرلان كارين اتاپ وتكەندەي, بۇل كەڭەس مۇشەلەرىنىڭ مينيسترلەرمەن بەسىنشى كەزدەسۋى. بۇعان دەيىن دەنساۋلىق ساقتاۋ ءمينيسترى الەكسەي تسوي, تسيفرلىق دامۋ ءمينيسترى باعدات مۋسين, ءبىلىم جانە عىلىم ءمينيسترى اسحات ايماعامبەتوۆ جانە ەكولوگيا, گەولوگيا جانە تابيعي رەسۋرستار ءمينيسترى ماعزۇم ميرزاعاليەۆ ۇلتتىق سەنىم كەڭەسى مۇشەلەرىمەن جۇزدەسكەن ەدى.
باسقوسۋعا قاتىسۋشىلار مينيسترگە قازىرگى تاڭداعى وزەكتى ساۋالداردى قويىپ, جان-جاقتى جاۋاپتارىن الدى. ساياساتتانۋشى, BTS Digital ءبىلىم بەرۋ جوباسىنىڭ جەتەكشىسى ساياسات نۇربەك ەلىمىزدە قىزمەتكەرلەردىڭ ەركىن ۋاقىتتا جانە قاشىقتىقتان جۇمىس ىستەۋىنە ارنالعان زاڭنامالىق شەكتەۋلەر بار ءالى ساقتالىپ تۇرعانىن اتاپ ءوتتى.
«بۇل – رەتتەۋ شارالارىن قاجەت ەتەتىن شارۋا, ويتكەنى كارانتينگە قاتىستى جاعداي جانە ونىڭ سالدارى ۇزاققا سوزىلاتىن سياقتى», دەدى س.نۇربەك.
«تالاپ» قولدانبالى زەرتتەۋلەر ورتالىعىنىڭ ديرەكتورى راحىم وشاقباەۆ تۇرعىندارعا زەينەتاقى قاراجاتىن تەك باسپانا ماسەلەسىن شەشۋگە عانا ەمەس, وزدەرى نەمەسە بالالارىنىڭ ءبىلىم الۋىنا جۇمساۋىنا مۇمكىندىك بەرۋ تۋرالى ۇسىنىس جاسادى.
«پرەزيدەنت العاشىندا ءبىلىم الۋعا جۇمساۋ تۋرالى ايتتى, بىراق ءبىز ونى جۇمىس توبىندا تالقىلاعان كەزدە كوپشىلىك بۇگىندە قازاقستاندا ءبىلىم الۋعا قاجەتتى قۇرالدار جەتكىلىكتى دەگەن توقتامعا كەلدى. ولار ودان گورى اقىسى قىمباتقا تۇسەتىن ەمدەۋ شارالارىنا ءبولۋ جولدارىن قاراستىرۋدى ءجون كوردى. قازىر زاڭ جوباسى پارلامەنت قاراۋىندا جاتىر. ءبىز ەڭبەك جانە الەۋمەتتىك قورعاۋ مينيسترلىگىندە ءبىلىم الۋدىڭ جەڭىل جولدارى بار دەگەن شەشىمگە كەلدىك – ەگەر ءبىز قانداي دا ءبىر ازاماتقا زەينەتاقى قاراجاتىنىڭ بەلگىلى ءبىر مولشەرىن الۋعا مۇمكىندىك بەرسەك, ەگەر ول ونى ءبىلىم الۋعا جۇمساسا, وندا تۇرعان ەشتەڭە جوق. ەگەر ءسىز ۇقسك مۇشەسى رەتىندە قولداۋ كورسەتسەڭىز, دەپۋتاتتار دا وسىنداي پىكىردە بولسا, مۇنى پارلامەنتتە شەشۋگە بولادى», دەپ جاۋاپ بەردى نۇرىمبەتوۆ.
«اكسەلەراتور دوبرا» رەسپۋبليكالىق ەرىكتىلەر قوزعالىسىنىڭ جەتەكشىسى اينۇر ءسابيتوۆا مينيسترگە ۆولونتەرلىك جۇمىستى نەگىزگى جۇمىس تاجىريبەسىنە قوسۋدى ۇسىندى.
وتىرىستىڭ سوڭىندا كەزدەسۋ بارىسىندا ايتىلعان ۇسىنىستاردى مينيسترلىك قابىلدايتىندىعى ايتىلدى. ءوز كەزەگىندە, ەڭبەك جانە حالىقتى الەۋمەتتىك قورعاۋ ءمينيسترى ب.نۇرىمبەتوۆ بىرقاتار ماسەلەلەردى پىسىقتاۋعا ۆەدومستۆو جانىنداعى جۇمىس توبىنا ۇقسك مۇشەلەرىن دە شاقىردى.