81 جاستاعى جالعىز تۇراتىن كەيۋانا ءوزىنىڭ تۋعان كۇنى قارساڭىندا تاڭعى ساعات 10 كەزىندە ءۇشىنشى قاباتتاعى پاتەرىنىڭ تەرەزەسىنە اسىلىپ قالعان. ونىڭ نەگە اسىلعانى بەلگىسىز, تەك تەرەزەنىڭ الدىن جۋماق بولىپ قاتتى ەڭكەيىپ, قايتا تۇزەلۋگە تولىق دەنەسى يكەمگە جىبەرمەدى مە الدە ءسىڭىرى تارتىلىپ قالدى ما, بەلگىسىز. ونىڭ اسىلىپ تۇرىپ, كومەك سۇراپ ايعايلاعان داۋىسىن الدىمەن ءبىرىنشى قاباتتاعى "مەچتا" دۇكەنىنىڭ قىزمەتكەرلەرى ەستىپ, قۇتقارۋعا كەلەدى. كوشەدەگى ادامدار دا پوليتسيانىڭ 102 نومىرىنە حابارلاپ, پاترۋلدىك پوليتسەيلەر دە وقيعا ورنىنا جەتىپ ۇلگەرەدى, دەپ حابارلايدى Egemen.kz.
بارلىعى بىرلەسە قيمىلداپ, زەينەتكەردىڭ امان-ەسەن تۇسىرەدى. وسى ۋاقىتتا «جەدەل جاردەم» دە كەلىپ جەتەدى. ابىروي بولعاندا, وقيعا ويداعىداي اياقتالىپ, كەيۋانا امان قالدى.
تاۋلىك ىشىندە پوليتسەيلەردىڭ "102" ارناسىنا 200-دەن 280-گە دەيىن وسىنداي ءتۇرلى حابارلامالار كەلىپ تۇسەدى ەكەن. كەلىپ تۇسكەن حابارلامانىڭ كريمينالدىق سيپاتى بولماسا دا جەدەل باسقارۋ ورتالىعىنىڭ وپەراتورى وقيعا ورنىنا پاترۋلدىك پوليتسيا قىزمەتكەرلەرىن نەمەسە ۋچاسكەلىك پوليتسيا ينسپەكتورلارىن, قاجەت بولعان جاعدايدا جەدەل-تەرگەۋ توبىن جىبەرەدى.
«شۇعىل ارەكەت جاساۋدى قاجەت ەتەتىن حابارلامالارعا العاشقى بولىپ پاترۋلدىك پوليتسيا قىزمەتكەرلەرى كەلىپ جەتەدى. ءجيى شاقىرتۋلار – كورشىلەرىنىڭ, ماس ادامداردىڭ ازاماتتاردى مازالاۋى, اۋرۋحانادان كەلىپ تۇسەتىن اقپاراتتار جانە باسقا دا قۇقىق بۇزۋشىلىقتار. ورتكە جانە باسقا دا توتەنشە وقيعالارعا شىعۋعا تۋرا كەلەدى», - دەيدى سقو پد شتابى باستىعىنىڭ ورىنباسارى پوليتسيا پولكوۆنيگى باحىتجان الىبەكوۆ.
پەتروپاۆل