وتكەن دەمالىس كۇندەرى سولتۇستىك قازاقستاندا ەكى بىردەي جول اپاتىنا جانۋارلار كىنالى بولدى. الدىمەن قىزىلجار اۋدانىنىڭ زنامەنسكوە اۋىلى ماڭىندا سەنبى كۇنگى تاڭعى مەزگىلدە استىق تاسىپ جۇرگەن كاماز كولىگىنە جولدى كەسىپ وتپەك بولىپ, شاۋىپ كەلگەن بۇلان سوعىلعان, دەپ حابارلايدى Egemen.kz.
اۆتوموبيل جارىعىنان كوزى قارىققان تاعى جۇك كولىگىنەن قاشىپ ۇلگەرە الماي قالعان. 38 جاستاعى جۇرگىزۋشى پسيحولوگيالىق سوققى العانىمەن دەنە جاراقاتىنان امان. وقيعا تۋرالى ول ءوزى 102 قىزمەتىنە حابارلاسقان. سوققىنىڭ قاتتى بولعانى سونداي جانۋار سول جەردە مەرت بولعان.
ال سەنبىدەن جەكسەنبىگە قاراعان ءتۇنى ايىرتاۋ اۋدانىنداعى ايىرتاۋ اۋىلىنا جاقىن جەردە كەنەتتەن جولعا شاۋىپ شىققان جىلقى "لادا-ۆاز" ماشيناسىنا سوعىلعان. ناتيجەسىندە ۆاز-21015 اۆتوماشيناسىنىڭ 35 جاستاعى جۇرگىزۋشى مەن 18 جاستاعى جولاۋشىسى ءتۇرلى جاراقاتتارمەن اۋرۋحاناعا جەتكىزىلدى. ۋچاسكەلىك پوليتسيا ينسپەكتورىمەن جىلقىنىڭ يەسى انىقتالىپ, اكىمشىلىك كودەكستىڭ 615-بابى بويىنشا جاۋاپكەرشىلىككە تارتىلدى.
"وكىنىشكە وراي, جابايى جانۋارلار دا, ءۇي جاۋارلارى دا جول-كولىك وقيعالارىنىڭ جاسالۋىنا سەبەپشى بولىپ جاتادى. ولار كەنەتتەن جولعا جۇگىرىپ شىعىپ, جۇرگىزۋشىلەر ءۇشىن ۇلكەن قاۋىپ تۋدىرادى. مۇنداي جاعدايلاردا قىراعىلىق پەن جىلدامدىق رەجىمىن قاتاڭ ساقتاۋ عانا جول-كولىك وقيعاسىنىڭ الدىن الادى", - دەيدى سقو پد باستىعىنىڭ ءبىرىنشى ورىنباسارى, پوليتسيا پولكوۆنيگى قانات ايتباەۆ.
سولتۇستىك قازاقستان وبلىسى