بيىل سولتۇستىك قازاقستاندا كۇن رايى ىستىق بولىپ تۇر. ديقان ەڭبەگىنىڭ باعى جانار وسى مەزگىلدىڭ جاۋىن-شاشىنسىز بولعانىن قالايدى. ءپىسىپ تۇرعان التىن استىق تا باسىن يە باستاعان. بۇل جيىن-تەرىمدى تەزىرەك جۇرگىزۋدى قاجەت ەتەتىن بەلگى. بيداي باسىن ءيىپ وسىلاي كوپ تۇرسا, ءدانى شاشىلىپ قالۋى مۇمكىن. وسىعان وراي ديقاندار دا ءاربىر ءساتتى ءمۇلت جىبەرمەۋگە تىرىسۋدا.
الايدا وتكەن اپتانىڭ ءتورت كۇنى جاۋىن-شاشىندى بولىپ, كوپتەگەن ەگىس القابىنىڭ جۇمىسىنا كەدەرگى كەلتىردى. ايتەۋىر كۇننىڭ ىستىعى جەردىڭ تەز كەبۋىنە مۇمكىندىك بەرىپ تۇر. ال وسى اپتانىڭ دۇيسەنبىسىندە جارقىراپ كۇن اشىلدى. اۋانىڭ تەمپەراتۋراسى كەي جەرلەردە 31 گرادۋس ىستىققا جەتىپ تۇر دەپ حابارلادى گيدرومەت ورتالىعى.
بۇدان بۇرىن حابارلاعانىمىزداي, ەسىل ءوڭىرىنىڭ استىقتى القاپتارىندا بۇگىنگى تاڭدا 7,5 مىڭ دالا كەمەسى جۇيتكىپ ءجۇر. ولارعا بيىل 75 مىڭ توننا ارزانداتىلعان ديزەل وتىن جەتكىزىلگەن. بۇگىنگى تاڭدا جالپى استىق كولەمىنىڭ 31,8 پايىزى باستىرىلدى. بۇل – 950 مىڭ گەكتار دەگەن ءسوز. ازىرگە وبلىس ديقاندارى 1 ملن 330 مىڭ توننا استىق جينادى. بۇل بەلگىلەنگەن مەجەنىڭ تورتتەن ءبىرى عانا. بارلىق استىق القابى – 4,2 ملن گەكتار. سونىمەن بىرگە وبلىس بيىل 922 مىڭ گەكتار القاپقا مايلى داقىلدار ەككەن بولاتىن. گەكتار بەرەكەسى ورتاشا العاندا استىقتى القاپتاردان 14 تسەنتنەردەن, مايلى داقىلداردان 9 تسەنتنەردەن اينالۋدا. وبلىستىق اۋىل شارۋشىلىعى جانە جەر قاتىناستارى باسقارماسىنىڭ باستىعى ەربولات بەكشەنوۆتىڭ ايتۋىنا قاراعاندا, گەكتاردىڭ ورتاشا بەرەكەسى جاقىن كۇندەرى كوتەرىلۋى ءتيىستى. ويتكەنى استىعى شىعىمدى وڭىرلەرگە ءالى وراق جەتە قويعان جوق. سونىمەن بىرگە ول بەلگىلەنگەن مەجەنىڭ ورىندالاتىنىنا دا سەنىم ءبىلدىردى. تەك كۇن رايى ەرتە بۇزىلماسا بولعانى.
سىيىمدىلىعى 7 ملن تونناداي استىق قابىلداۋ ورىندارى وراققا دەيىن استىق قابىلداۋعا دايىن بولعان. قازىر ولاردىڭ اۋماقتارىندا جۇمىس قىزۋ ءجۇرىپ, قويمالارىنا العاشقى استىق قۇيىلۋدا.
ايتا كەتەتىن جايت, بيىل قىزىلجارلىق ديقاندار بارلىق اگروتەحنيكالىق شارالاردى ۋاقتىلى جاساعان بولاتىن. سونىڭ ىشىندە جەرگە 100 مىڭ توننا مينەرالدى تىڭايتقىش ءسىڭىرىلدى. ەندى تەك استىقتى توكپەي-شاشپاي جيناپ الۋ مىندەتى ءاربىر ديقاننىڭ الدىندا تۇر.
گيدرومەتەوورتالىقتىڭ بولجاۋىنا قاراعاندا, وسى اپتانىڭ سوڭىنا قاراي كۇن رايى بۇزىلادى. كەلەسى اپتادا تولىقتاي جاڭبىر جاۋماق. سوندىقتان ديقاندار ءاربىر ءساتتى ۇتىمدى پايدالانىپ قالۋعا تىرىسۋدا.
سولتۇستىك قازاقستان وبلىسى