بالقاشتا جىلۋ جەلىلەرىن سالۋ تولىق ءجۇرىپ جاتىر. قۇبىرلار جەو-نان "قوڭىرات" شاعىن اۋدانىنا دەيىن سوزىلادى. جىلۋ ماگيسترالىنىڭ ۇزىندىعى - 17 كم. بۇگىندە جۇمىس 30%-عا ورىندالدى, - دەپ حابارلايدى Egemen.kz قاراعاندى وبلىسى اكىمىنىڭ ءباسپاسوز قىزمەتىنە سىلتەمە جاساپ.
قاراعاندى وبلىسىنىڭ اكىمى جەڭىس قاسىمبەك بالقاشقا جۇمىس ساپارى بارىسىندا جىلۋ جەلىلەرى مەن بىرقاتار باسقا نىسانداردىڭ قۇرىلىسى قالاي ءجۇرىپ جاتقانىن تەكسەردى. بۇل جوبالاردى "جۇمىسپەن قامتۋ جول كارتاسى" باعدارلاماسى ارقاسىندا جۇزەگە اسىرۋ مۇمكىندىگى پايدا بولدى.
"بيىل جىلۋ ماگيسترالىن وسى جىل سوڭىنا دەيىن سالۋ شەشىمى قابىلداندى. قالا جاڭا قۇرىلىس جۇمىس كولەمىن الدى. بۇل جقجك ىسكە اسىرۋدىڭ ايقىن مىسالدارىنىڭ ءبىرى. بۇل باعدارلاما بويىنشا 123 جۇمىس ورنى قۇرىلدى. جارتىسى- جۇمىسپەن قامتۋ ورتالىعى ارقىلى. اقشامەن پروبلەما جوق, بىزگە ساپا كەرەك", - دەپ جەڭىس قاسىمبەك مەردىگەردەن تالاپ ەتتى.
جوسپار بويىنشا جاڭا جىلۋ جەلىسىن وسى جىلدىڭ سوڭىنا دەيىن سالىپ ءبىتىرۋى ءتيىس. ۇيلەرگە قوسۋ بويىنشا جۇمىستار كەلەسى جىلى باستالادى. قازىر "قوڭىراتتاعى" قولدانىستاعى ورتالىق قازاندىق 100 پايىزعا دايىن دەۋگە بولادى. بارلىق قاجەتتى جوندەۋ جۇمىستارى وتكىزىلدى.
جىلۋ جەلىلەرىنەن باسقا قالادا جەكە ينۆەستيتسيامەن قاراۋسىز قالعان جاتاقحانالار قالپىنا كەلتىرىلۋدە. عيمارات 90-جىلداردان بەرى بوس تۇر.
جۋىر ۋاقىتتا مۇندا باسپانا الۋعا كەزەكتە تۇرعان 30 كوپ بالالى وتباسىلار تۇراتىن بولادى. ولار ءۇشىن ارنايى قايتا جوسپارلاۋ جاسالدى.
قالادا ورتالىق ساياباقتا قالپىنا كەلتىرىلۋدە. ول ۇزاق ۋاقىت ازىپ-توزىپ تۇردى. جۋىر ۋاقىتتا تۇرعىنداردىڭ قىدىرۋعا جانە دەمالۋعا ارنالعان جاڭا ورىن پايدا بولادى. اباتتاندىرۋ مەن كوگالداندىرۋدان باسقا وندا باسكەتبول, فۋتبول جانە ۆوركاۋت الاڭدارى ورناتىلادى. ساياباق شاعىن ساۋلەت پىىشىندەرىمەن بەزەندىرىلەدى.
وبلىس اكىمى "شاڭىراق" ايەلدەرگە ارنالعان داعدارىس ورتالىعىن دا ارالادى. ونى "رۋحاني جاڭعىرۋ" باعدارلاماسىنىڭ شەڭبەرىندە "كوۋنراد" كورپوراتيۆتىك قورى اشقان. وندا تۇرمىستىق كۇش كورسەتۋدەن زارداپ شەككەن ايەلدەر ورنالاستىرىلادى. مۇندا تەك قيىن ومىرلىك جاعدايلار گانا ەمەس, سونىمەن بىرگە زاڭگەرلەردىڭ, پسيحولوگتاردىڭ, مەديتسينا جانە الەۋمەتتىك قىزمەتكەرلەردىڭ كومەگىن الۋعا بولادى.
"ورتالىق ميسسياسى – قيىن ومىرلىك جاعدايعا دۋشار بولعان ايەلدەردىڭ, كوپ بالالى جانە از قامتىلعان وتباسىلاردىڭ ءومىر ساپاسىن ارتتىرۋ, ايەلدەردىڭ ەكونوميكالىق دەربەستىگى مەن قيىن جاعدايدا شىعۋىنا سەپ بولاتىن جەكە باستاماسىن نىعايتۋ. مۇندا قانداي دا ءبىر كاسىبي داعدىلار الۋعا دەيىن ماكسيمالدى كومەك كورسەتىلەدى. مىسالى, قالانىڭ اتەلە, شاشتاراز جانە كۋليناريا سياقتى ۇيىمدارىمەن شارتتار نەگىزىندە ماستەر-كلاسستار ۇيىمداستىرىلادى. مۇنىڭ بارلىعى جۇمىس ىستەمەيتىن ايەلدەردىڭ ء وز بەتىمەن اقشا تابا الۋى ءۇشىن", - دەدى "سارى كازنا" جشس ديرەكتورى پاۆەل سەمەنچەنكو.
"ماڭىزدى ىستەرمەن اينالىسىڭىزدار. وكىنىشكە وراي, بىزدە وبلىستا تۇرمىستىق كۇش كورسەتۋمەن پروبلەمالار بار. بارلىق قالا اكىمدەرىنە مۇنداي ۇيىمنىڭ جۇمىس ىستەۋىنە الەۋمەتتىك باعدارلامالارعا اقشا ءبولۋ قاجەت", - دەپ جەڭىس قاسىمبەك تاپسىردى.