جۇرگىزۋشى – رۋسلان يگىلىك.
بۇگىن, 26 قازان كۇنى الماتىداعى بالۋان شولاق اتىنداعى سپورت كەشەنىندە بوكستان XVII الەم چەمپيوناتى ءوزىنىڭ مارەسىنە جەتتى. الاتاۋ باۋرايىنداعى شاھاردىڭ شارشى الاڭىن ون كۇن بويى شايقالتقان جاھاندىق جارىس بيىلعى جىلدىڭ قاھارماندارىن انىقتادى. ال مۇنداي اتاققا قازاقستاننىڭ – 4, كۋبا مەن ازەربايجاننىڭ – ەكى-ەكىدەن, رەسەي مەن يتاليانىڭ ءبىر-بىردەن بىلعارى قولعاپ شەبەرلەرى قول جەتكىزدى.
چەمپيونات فينالى ادەتتەگىدەي اسا جەڭىل سالماقتاعىلاردىڭ شايقاستارىنان باستالىپ, بىرتىندەپ كوتەرىلە بەردى.
49 كيلوعا دەيىنگى سالماقتاعى قازاقستاندىق ءبىرجان جاقىپوۆ پەن الجيرلىك موحاممەد ءفليسسيدىڭ اراسىنداعى جەكپە-جەكتە بۇلاردىڭ ءبىرىنشىسى باسىم ءتۇستى. چەمپيون ۇرىستى باستان-اياق ءبىر دەڭگەيدە وتكىزدى. ونىڭ سالقىنقاندى قيمىلى اراسىندا سوققىلار سەرياسىنا ۇلاسىپ كەتىپ جاتتى. ءسويتىپ, العاش رەت 2005 جىلى الەم بىرىنشىلىگىنىڭ قولا جۇلدەسىن الىپ ۇلگەرگەن قىران اراعا سەگىز جىل سالىپ, ونى التىن مەدالگە اينالدىردى. ەسەپ – 3:0.
52 كيلوعا دەيىنگى سالماقتا رەسەيلىك ميشا الويان چەمپيون اتانىپ, وسىنىڭ الدىندا, 2011 جىلى باكۋدە قول جەتكىزگەن اتاعىن ساقتاپ قالدى. ول وسىلايشا قاتارىنان ەكىنشى مارتە توپ جاردى. ونىڭ وزبەكستاندىق جاسۋربەك لاتيپوۆپەن جەكپە-جەگىنىڭ ءبىرىنشى راۋندى قارسىلاسىنىڭ قانجىعاسىندا كەتتى. چەمپيون سودان كەيىن عانا بارىن سالىپ, سوڭعى ساتتە تارازى باسىن وزىنە اۋدارىپ اكەتتى. ەسەپ – 2:1.
56 كيلوعا دەيىنگى سالماقتا ازەربايجان دجاۆيد چەلەبيەۆتىڭ باعى جاندى. ول رەسەيلىك ۆلاديمير نيكيتينمەن شايقاسىن دا تولاسسىز شابۋىلمەن وتكىزدى. بىراق قارسىلاسى دا قايتقان جوق. سول جۇدىرىق سىلتەستەردىڭ اراسىندا تورەشىلەر حازار تەڭىزىنىڭ جاعاسىنان كەلگەن وعلاننىڭ سوققىلارى كوبىرەك ءدال ءتيدى دەپ ەسەپتەدى. ەسەپ – 2:1.
60 كيلوعا دەيىنگى سالماقتا برازيليالىق روبسون كونكەيكاو مەن كۋبالىق لازارو الۆارەس ەسترادا التىن مەدالدىڭ تاعدىرىن تالقىعا سالدى. بۇل دە ەكى جاقتىڭ ءبىر-بىرىنە وڭايلىقپەن بەرىسپەگەن تارتىستى تالاسى بولدى. دەگەنمەن, بوستاندىق ارالىنىڭ قابىلانى بىرەر سوققى بولسا دا ارتىق جاساپ وتىردى. سول ارتىقشىلىق الۆارەستى چەمپيون ەتىپ شىعاردى. ەسەپ – 2:1. وسىنىڭ ارقاسىندا ول دا قاتارىنان ەكى مارتە الەم چەمپيونى اتاندى.
64 كيلوعا دەيىنگى سالماقتا كۇش سىناسقان قازاقستاندىق مەرەي اقشالوۆ پەن كۋبالىق ياسنيەر تولەدو لوپەس باسەكەسىندە بۇلاردىڭ العاشقىسىنىڭ باسىمدىعى بىردەن بايقالدى. تەكەتىرەس بارىسىندا قارسىلاسىن ۇدايى وراپ كەتىپ وتىرعان ول سوڭعى راۋندتا ەپتەپ ەسە جىبەرىپ الدى. ەسەپ – 3:0.
69 كيلوعا دەيىنگى سالماقتا قازاقستاندىق دانيار ەلەۋسىنوۆ كۋبالىق اريسپويد ديسپاينمەن ۇرىسىندا ۇتقانىنا ەشكىمدى كۇمانداندىرعان جوق. كوماندا كاپيتانى بارلىق كەزەڭدە دە شايقاستىڭ تىزگىنىن ءوز قولىندا ۇستاپ وتىردى. ەسەپ – 3:0.
75 كيلوعا دەيىنگى سالماقتاعى قازاقستاندىق جانىبەك ءالىمحان ۇلى يرلاند دجەيسون كۋيگلەيمەن باق سىناستى. مۇندا 20 جاسار جاس جىگىت البيون جەرىنەن كەلگەن قارسىلاسىنان ارتىق كورىندى. ول ءبىر رەت ءتىپتى دجەيسوندى نوكداۋنعا دا ءتۇسىردى. سوڭىندا تورەشىلەر جانىبەكتىڭ ايقىن باسىمدىقپەن ۇتقانىن پاش ەتتى – 3:0.
81 كيلوعا دەيىنگى سالماقتا كۋبالىق حۋليو سەزار دە لا كرۋس تا قاتارىنان ەكىنشى مارتە چەمپيون اتانعاندار قاتارىنا قوسىلدى. ول بۇل جولى دا ءدال باكۋ فينالىنداعىداي قازاقستاندىق ادىلبەك نيازىمبەتوۆپەن قولعاپ ءتۇيىستىردى. وكىنىشتىسى, ءبىزدىڭ باعلان سونداعى ۇتىلىستىڭ قارىمتاسىن قايتارا المادى. ەسەپ – 2:1.
91 كيلوعا دەيىنگى سالماقتا يتاليان كلەمەنتە رۋسسو رەسەيلىك ەۆگەني تيششەنكونى تالاسسىز جەڭدى. العاشقى ەكى راۋندتا قارسىلاسىنان كەم تۇسكەن ورىس بوكسشىسى سوڭعى بولىكتە قيمىلدادى. بىراق ءبارى كەشتىك ەتتى. ەسەپ – 3:0.
91 كيلودان اۋىر سالماقتا ازەربايجاندىق ماگومەدراسۋل مەدجيدوۆ تا 2011 جىلى العان چەمپيوندىق اتاعىن ساقتاپ قالدى. ونىڭ قازاقستاندىق يۆان دىچكومەن جەكپە-جەگىنىڭ العاشقى ەكى راۋندى قارسىلاسىنىڭ پايداسىنا شەشىلىپ تۇردى. ال ءۇشىنشى راۋندتا ول اراسىنان بىرنەشە سەكۋند سالىپ, باسەكەلەسىن ەكى رەت ۇرىپ قۇلاتتى. بۇلاردىڭ سوڭعىسى نوكاۋت بولىپ شىقتى. ءسويتىپ, يۆان ازەربايجان استاناسىنداعى چەمپيوناتتىڭ جارتىلاي فينالىنداعى جەڭىلىسى ءۇشىن بۇل قارسىلاسىنان قارىمتا قايتارا الماي قالدى.
سونىمەن, چەمپيونات ءبىتتى. وندا 4 التىن, 2 كۇمىس جانە 2 قولا مەدال العان قازاقستان قۇراماسى كوماندالىق ءبىرىنشى ورىنعا شىقتى. ەكىنشى ورىندى 2 التىن, 2 كۇمىس, 1 قولا مەدالمەن كۋبا بوكسشىلارى جەڭىپ الدى. ءۇشىنشى ورىنعا 2 التىن, 1 قولا مەدالى بار ازەربايجان كومانداسى ورنالاستى.
{youtube}1LycbvNM8hk{/youtube}
{youtube}4p2brNQnT1o{/youtube}
{youtube}TS6vkFQDfis{/youtube}