كەشە بەلارۋس استاناسى – مينسك قالاسىندا تاۋەلسىز مەملەكەتتەر دوستاستىعىنا مۇشە ەلدەر مەملەكەت باسشىلارىنىڭ كەزەكتى كەڭەسى بولىپ ءوتتى.
كەڭەسكە قازاقستان پرەزيدەنتى نۇرسۇلتان نازارباەۆ, بەلارۋس پرەزيدەنتى الەكساندر لۋكاشەنكو, رەسەي پرەزيدەنتى ۆلاديمير پۋتين, ۋكراينا پرەزيدەنتى ۆيكتور يانۋكوۆيچ, ارمەنيا پرەزيدەنتى سەرج سارگسيان, مولدوۆا پرەزيدەنتى نيكولاە تيموفتي, وزبەكستان پرەزيدەنتى يسلام كاريموۆ, تاجىكستان پرەزيدەنتى ەمومالي راحمون, ازەربايجان پرەزيدەنتى يلحام اليەۆ, سونداي-اق, قىرعىزستان پرەمەر-ءمينيسترىنىڭ ورىنباسارى جوومارت وتورباەۆ پەن تۇركىمەنستان ۇكىمەتى توراعاسىنىڭ ورىنباسارى اننامۇحاممەد گوچىەۆ قاتىستى.
كەڭەسكە قازاقستان پرەزيدەنتى نۇرسۇلتان نازارباەۆ, بەلارۋس پرەزيدەنتى الەكساندر لۋكاشەنكو, رەسەي پرەزيدەنتى ۆلاديمير پۋتين, ۋكراينا پرەزيدەنتى ۆيكتور يانۋكوۆيچ, ارمەنيا پرەزيدەنتى سەرج سارگسيان, مولدوۆا پرەزيدەنتى نيكولاە تيموفتي, وزبەكستان پرەزيدەنتى يسلام كاريموۆ, تاجىكستان پرەزيدەنتى ەمومالي راحمون, ازەربايجان پرەزيدەنتى يلحام اليەۆ, سونداي-اق, قىرعىزستان پرەمەر-ءمينيسترىنىڭ ورىنباسارى جوومارت وتورباەۆ پەن تۇركىمەنستان ۇكىمەتى توراعاسىنىڭ ورىنباسارى اننامۇحاممەد گوچىەۆ قاتىستى.
تاۋەلسىز مەملەكەتتەر دوستاستىعىنا مۇشە ەلدەر مەملەكەت باسشىلارى مۇنداي اۋقىمدى جيىن اياسىندا جىلىنا ءبىر رەت باس قوسىپ وتىرادى. بىلتىر دوستاستىق ەلدەرىنىڭ باسشىلارى اشعابادقا كەلىپ, ءبىر ۇستەل باسىندا سان سالالى ماسەلەلەردى تالقى تارازىسىنا سالعان بولاتىن. ال بيىلعى جىلى دوستاستىق ەلدەرى مەملەكەت باسشىلارى كەڭەسىنىڭ توراعالىق تىزگىنى بەلارۋس مەملەكەتىندە بولعاندىقتان, 2013 جىلى بىرقاتار جوبالار مەن باستامالار لەگى جۇزەگە اسىرىلعان ەدى. ەندىگى كەزەكتە دوستاستىق كەڭىستىگىندەگى ەلدەر وسى ۇدەرىستەردى ودان ءارى جالعاستىرۋى ءتيىس.
مەملەكەت باسشىلارىنىڭ كەڭەسى – دوستاستىق ەلدەرىنىڭ ەڭ جوعارى ورگانى. سول سەبەپتى دە مۇندا تمد-عا, ونىڭ قىزمەت ەتۋ تەتىكتەرىنە تىكەلەي قاتىستى بارلىق ماسەلەلەر قارالادى. ال كەڭەس اياسىندا كوتەرىلگەن ماسەلەلەردىڭ بارلىعى كونسەنسۋس, ياعني ءوزارا كەلىسىم اۋانىندا قابىلدانىپ وتىرادى.
مينسكىدە وتكەن تاۋەلسىز مەملەكەتتەر دوستاستىعىنا مۇشە ەلدەر مەملەكەت باسشىلارىنىڭ كەڭەسى الدىمەن شاعىن قۇرامداعى كەلىسسوزبەن باستالدى. وتىرىستا العاشقى بولىپ ءسوز العان توراعا ەلدىڭ پرەزيدەنتى الەكساندر لۋكاشەنكو ازەربايجان پرەزيدەنتى يلحام اليەۆتى پرەزيدەنتتىك سايلاۋداعى جەڭىسىمەن قۇتتىقتادى. بۇدان كەيىنگى كەزەكتە ا.لۋكاشەنكو تمد -عا مۇشە ەلدەر مەملەكەت باسشىلارىنىڭ كەڭەسىن اشىق دەپ جاريالاپ, ءسوز تىزگىنىن تمد-نىڭ اتقارۋشى كوميتەتىنىڭ توراعاسى سەرگەي لەبەدەۆكە بەردى.
ول ءوز سوزىندە كەڭەس وتىرىسىندا قارالاتىن ماسەلەلەر شوعىرى تۋرالى بايانداپ بەردى. تمد ەلدەرى ۇسىنعان ماسەلەلەرگە سايكەس, تمد-نىڭ اتقارۋشى كوميتەتى بۇگىنگى كۇن تارتىبىنە 14 ماسەلە شىعارىپ وتىر. بۇلاردىڭ بارلىعى ءتيىستى ساراپتان جانە سارالاۋدان ءوتتى. كەيبىر قۇجاتتارعا بايلانىستى ايتىلعان ۇسىنىستار دا ەسكەرىلدى, دەدى س.لەبەدەۆ.
بۇدان كەيىنگى كەزەكتە ازەربايجان پرەزيدەنتى ي.اليەۆ ءسوز الدى. ءبىز تمد كەڭىستىگىندەگى ەلدەرمەن تىعىز ىنتىماقتاستىق بايلانىس ورناتۋعا ءاردايىم مۇددەلىمىز. سەبەبى, ءبىزدىڭ ەلدەرىمىزدى كەزىندە تاريحي تامىرلاستىق بايلانىستىردى. ال بۇگىنگى تاڭدا ءبىزدى ەكونوميكالىق, ساياسي ىقپالداستىق بايلانىستىرۋدا. ازەربايجان ءۇشىن تمد ەلدەرىمەن سىرتقى ساياساتتاعى ارىپتەستىك ايرىقشا ماڭىزعا يە. ءبىز ينتەگراتسيالىق ۇدەرىستەردىڭ جەتىلدىرىلۋىن, ەكىجاقتى, كوپجاقتى بايلانىستاردىڭ نىعايۋىن قۋاتتايمىز. بىرنەشە كۇننەن كەيىن باكۋدە ءۇشىنشى حالىقارالىق گۋمانيتارلىق فورۋم وتەدى. بۇل فورۋم از عانا ۋاقىت ىشىندە گۋمانيتارلىق سالاداعى ەڭ ءبىر وزەكتى ماسەلەلەر كوتەرىلەتىن ماڭىزدى ۇنقاتىسۋ الاڭىنا اينالادى. وسى ورايدا, مەن مۇمكىندىكتى پايدالانىپ, فورۋمعا بەلسەنە قاتىسۋعا نيەت تانىتىپ وتىرعان تمد ەلدەرىنە العىسىمدى ءبىلدىرگىم كەلەدى. مۇنداي باسقوسۋلار ءبىزدىڭ ەلدەرىمىزدىڭ گۋمانيتارلىق سالاداعى ىنتىماقتاستىعىن دامىتا تۇسەرى ءسوزسىز. سەبەبى, گۋمانيتارلىق سالا – ءبىزدىڭ ءارىپتەستىگىمىزدىڭ نەگىزگى وزەگى. ءبىز سونداي-اق ەكونوميكالىق ىقپالداستىققا دا ايرىقشا ءمان بەرىپ كەلەمىز. بۇگىندە تمد ەلدەرى اراسىنداعى تاۋار اينالىمى ءوسۋ ۇستىندە. كۇن تارتىبىندە قارالاتىن ەكسترەميزممەن, تەرروريزممەن كۇرەس ماسەلەسى دە وتە وزەكتى بولىپ وتىرعانىن اتاپ ءوتۋ كەرەك. الەم ەلدەرىنىڭ ارقايسىسى مۇنداي قاتەرلەرگە تەك كۇش بىرىكتىرۋ ارقىلى عانا قارسى تۇرا الاتىنىنا كوز جەتكىزدىك. ءبىز وسى باعىتتاعى جۇمىستارىمىزدى جەتىلدىرىپ, مەملەكەتتەرىمىزدىڭ قاۋىپسىزدىگىن ۇنەمى نازاردا ۇستاپ وتىرۋىمىز كەرەك, دەدى ي.اليەۆ. سونداي-اق, ازەربايجان پرەزيدەنتى تمد كەڭىستىگىندەگى ىنتىماقتاستىق بولاشاقتا دا نازاردا تۇراتىنىن اتاپ ءوتتى.
بۇدان كەيىنگى كەزەكتە ءسوز قازاقستان پرەزيدەنتى نۇرسۇلتان نازارباەۆقا بەرىلدى. ەڭ الدىمەن, تمد-عا توراعا بولعان بەلارۋس مەملەكەتىنە العىسىمدى بىلدىرگىم كەلەدى. سوڭعى جىلدارى بەلارۋس دوستاستىق اياسىنداعى كوپتەگەن ماسەلەلەردىڭ جۇزەگە اسىرىلۋىنا ۇيىتقى بولدى, دەپ باستادى ءسوزىن شەشەن. ءبىز تمد-نىڭ بولاشاقتاعى دامۋىن ءارى قاراي ايقىندايتىن تۇجىرىمدامانى قابىلدادىق. ونى جۇزەگە اسىراتىن ءىس-شارالار جوسپارىن بەكىتتىك. بۇل الداعى ۋاقىتتا قاي باعىتتا جۇمىس ىستەيتىنىمىزدى ايقىنداۋ ءۇشىن كەرەك. 2011 جىلى قابىلدانعان ەركىن ساۋدا ايماعىن قۇرۋ تۋرالى كەلىسىم بۇگىندە ينفراقۇرىلىمنىڭ دامۋىنا, قاجەتتى قۇجاتتاردىڭ جۇزەگە اسۋىنا, ەلدەردىڭ بولاشاقتاعى كوپجاقتى ىقپالداستىعىن جانداندىرۋعا جاعداي جاسادى. ءبىز 2014 جىلدى «تمد-داعى تۋريزم جىلى» دەپ جاريالاۋعا كەلىستىك. بۇل باعىتتا ەلدەرىمىز مينيسترلىكتەرىنىڭ قولعا الۋىمەن ءتيىستى باعدارلامالار قابىلداندى. بۇل باعدارلامالار ءبىزدىڭ مەملەكەتتەر اراسىنداعى ءوزارا ىنتىماقتاستىقتى دامىتۋعا سەرپىن بەرەدى دەپ ويلايمىز. مەن «دوستاستىق ەلدەرىنىڭ مادەني استانالارى» مەملەكەتارالىق باعدارلاماسىنىڭ ماڭىزى وتە زور دەپ ەسەپتەيمىن. كەلەر جىلى «دوستاستىقتىڭ مادەني استاناسى» اتىن قازاقستاننىڭ الماتى قالاسى يەلەنەدى. ءبىز بۇل شارانى جوعارى دەڭگەيدە وتكىزۋ ءۇشىن ازىرلىك جۇمىستارىن جۇرگىزەتىن بولامىز, دەدى ن.نازارباەۆ.
قازاقستان پرەزيدەنتى ءوزىنىڭ سوزىندە تمد اۋماعىندا 2015 جىلدى ۇلى وتان سوعىسى ارداگەرلەرىنىڭ جىلى دەپ جاريالاۋ جونىندەگى جانە تمد اۋماعىندا جەڭىستىڭ 70 جىلدىعىن تويلاۋ جونىندەگى ورتاق ءىس-شارالاردى بىرلەسە وتكىزۋ تۋرالى شەشىمدەردى, سونداي-اق, ۇلى جەڭىستىڭ 70 جىلدىعىنا ارنالعان بىرىڭعاي مەرەيتويلىق ناگرادالاردى ايقىنداۋ تۋرالى ۇسىنىستاردى تولىقتاي قۋاتتايتىنىن جەتكىزدى. سەبەبى, ءبىز ءاردايىم اعا بۋىن ارداگەرلەرىمىزدىڭ الدىندا بورىشتارمىز, دەدى قازاقستان باسشىسى. سونداي-اق, ول ۋكراينانىڭ تمد-عا كەلەسى جىلعى توراعالىعى دوستاستىقتى ودان ءارى نىعايتۋعا جانە دامىتۋعا سەپتىگىن تيگىزەدى دەپ ۇمىتتەنەتىنىن ءبىلدىردى.
قىرعىزستاننان كەلگەن وكىل جوومارت وتورباەۆ تا كەڭەس وتىرىسىندا قارالاتىن بارلىق ۇسىنىستاردى قولدايتىنىن مالىمدەدى. ۇلى جەڭىستىڭ 70 جىلدىعىن جوعارى دەڭگەيدە وتكىزۋ, تمد اۋماعىندا 2015 جىلدى ۇلى وتان سوعىسى ارداگەرلەرىنىڭ جىلى دەپ جاريالاۋ جونىندەگى ۇسىنىستار وتە قۇپتارلىق. بۇگىندە تمد كەڭىستىگىندە كوپتەگەن ينتەگراتسيالىق بىرلەستىكتەر قۇرىلدى. ولارعا ۇقشۇ, ەۋرازەق, كەدەن وداعى سەكىلدى اۋقىمدى ۇيىمداردى جاتقىزۋعا بولادى. ءبىز بۇل ۇيىمداردىڭ جۇمىسىن قولدايمىز. بۇل ءبىزدىڭ ەلدەرىمىز ەكونوميكالارىنىڭ دامۋىنا ىقپال ەتەدى دەپ بىلەمىز. الداعى ۋاقىتتا تمد اۋماعىندا ەنەرگەتيكا, كولىك, جوعارى تەحنولوگيالار, الەۋمەتتىك جانە گۋمانيتارلىق دامۋ باعىتتارىندا ماڭىزدى جوبالاردى قولعا الىپ, ءتيىمدى باستامالاردى كوتەرۋىمىز كەرەك دەپ ەسەپتەيمىز, دەدى ج.وتورباەۆ.
مولدوۆا پرەزيدەنتى نيكولاە تيموفتي دوستاستىق ەلدەرى اراسىندا بۇعان دەيىنگى ورنىققان دوستىق پەيىلدى جوعالتپاي, ىنتىماقتاستىق تەتىگىن ودان ءارى بەرىكتەندىرۋگە ءمان بەرىلۋ كەرەكتىگىن اتاپ ءوتتى. بۇل ورايدا, ءبىز كەز كەلگەن كەلىسىمگە قول جەتكىزەمىز دەپ ويلايمىن. مولدوۆا بۇل باعىتتاعى جۇمىستارعا مۇددەلى ەكەنىن اتاپ كورسەتكىم كەلەدى, دەدى ن.تيموفتي ءوز سوزىندە.
رەسەي پرەزيدەنتى ۆلاديمير پۋتين بۇگىندە دوستاستىق ەلدەرىن دامىتۋدىڭ نەگىزگى تەتىكتەرىن ايقىندايتىن قۇجاتتار جۇزەگە اسىرىلىپ جاتقانىنا توقتالدى. ءبىز ەكونوميكالىق سالاداعى ءوزارا ىنتىماقتاستىعىمىزدى, تاۋار اينالىمىن جانداندىرىپ, ينۆەستيتسيا سالاسىنداعى كەدەرگىلەردى جويۋعا نازار اۋدارىپ, جاھاندىق داعدارىستىڭ كەدەرگىلەرىنە قارسى تۇراتىن تەتىكتەردى ويلاپ تابۋىمىز كەرەك, دەدى ۆ.پۋتين. سونداي-اق, رەسەي پرەزيدەنتى مەملەكەت باسشىلارى قاۋىپسىزدىك سالاسىنا ايرىقشا ءمان بەرىپ, اقپاراتتىق تەحنولوگيالاردى پايدالانا وتىرىپ جۇزەگە اسىرىلاتىن قىلمىستاردىڭ بىرلەسە الدىن الۋ باعىتىندا ارنايى تۇجىرىمداما قابىلداعانىن جەتكىزدى.
تاجىكستان پرەزيدەنتى ەمومالي راحمون جيىن بارىسىندا: ءبىز كەلەر جىلى «دوستاستىقتىڭ مادەني استانالارى» مەملەكەتارالىق باعدارلاماسىنىڭ ماڭىزدىلىعىن ەسكەرىپ, وسىنداي مادەني-گۋمانيتارلىق باعىتتارداعى باستامالاردى تولىقتاي قولدايمىز. كەلەر جىلى بۇل باعدارلاماعا قازاقستاننىڭ الماتى جانە قىرعىزستاننىڭ وش قالالارى قاتىساتىن بولادى. مۇنداي جوبالار ءبىزدىڭ ەلدەرىمىزدىڭ اراسىنداعى مادەني ىنتىماقتاستىقتى دامىتۋعا ىقپال ەتەرى ءسوزسىز. ەكىنشىدەن, ءبىز جاھاندىق قاۋىپ-قاتەرلەرگە, ونىڭ ىشىندە ەسىرتكى بيزنەسى مەن لاڭكەستىك ارەكەتتەرگە, ادام ساۋداسىنا قارسى تۇرۋ باعىتىندا ءبىرلەسكەن قادامداردى جۇزەگە اسىرۋىمىز كەرەك. كەيىنگى ۋاقىتتا اقپاراتتىق تەحنولوگيالاردى پايدالانا وتىرىپ جۇزەگە اسىرىلاتىن مۇنداي كەرى قۇبىلىستارعا ءبىزدىڭ قاۋىپسىزدىك ورگاندارىمىز ايرىقشا ءمان بەرۋى قاجەت, دەدى ە.راحمون.
تۇركىمەنستاننان كەلگەن وكىل اننامۇحاممەد گوچىەۆ تمد اۋماعىنداعى بۇعان دەيىن بەرىك قالىپتاسقان ءوزارا ىقپالداستىقتى ودان ءارى دامىتۋ بارلىق مەملەكەتكە دە ءتيىمدى ەكەنىن جەتكىزە كەلە, الداعى جىلى تمد-عا توراعا بولاتىن ۋكرايناعا ساتتىلىك تىلەدى.
وزبەكستان پرەزيدەنتى يسلام كاريموۆ قازىرگى تاڭدا الەم مەملەكەتتەرى تەربەلمەلى, قۇبىلمالى جاعدايدا ءومىر ءسۇرىپ وتىرعانىن, جاھاندا راديكالدى جاعداي قالىپتاسقانىن, دۇنيە ءجۇزىن داعدارىس سالقىنى شارپىعانىن ايتا كەلە, بۇل رەتتە ىنتىماقتاستىق ايرىقشا ءرول اتقاراتىنىن اتاپ ءوتتى.
ال ۋكراينا پرەزيدەنتى ۆيكتور يانۋكوۆيچ مۇنداي باسقوسۋلار بولاشاقتىڭ باعىت-باعدارىن ايقىنداۋعا سەپ بولاتىنىن جەتكىزدى. ءبىز مەملەكەتتەرىمىزدىڭ ساۋدا-ەكونوميكالىق, مادەني-گۋمانيتارلىق باعىتتارداعى ىنتىماقتاستىعىن ودان ءارى جانداندىرۋىمىز كەرەك. كەلەر جىلى ءبىز تمد-عا توراعا بولامىز. سوندىقتان, بۇعان دەيىن جۇزەگە اسىرىلعان جۇمىستاردى ودان ءارى جالعاستىرىپ, ءوزارا ارىپتەستىك بايلانىستارىمىزدى نىعايتۋعا كۇش سالامىز دەپ ويلايمىن, دەدى ۆ. يانۋكوۆيچ.
مەملەكەت باسشىلارىنىڭ شاعىن قۇرامداعى وتىرىسى بۇدان كەيىن كەڭەيتىلگەن قۇرامداعى وتىرىسپەن جالعاستى. وندا مەملەكەت باسشىلارى ۇسىنعان باستامالار قايتا پىسىقتالىپ, تالقىلاندى.
تمد-عا مۇشە ەلدەر مەملەكەت باسشىلارى كەڭەسى وتىرىسىنىڭ قورىتىندىسىندا پرەزيدەنتتەر 14 قۇجاتقا قول قويدى. ولار: «2014 جىلدى تاۋەلسىز مەملەكەتتەر دوستاستىعىندا تۋريزم جىلى دەپ جاريالاۋ تۋرالى» شەشىم; «2015 جىلدى تاۋەلسىز مەملەكەتتەر دوستاستىعىندا 1941-1945 جىلدارداعى ۇلى وتان سوعىسى ارداگەرلەرىنىڭ جىلى دەپ جاريالاۋ تۋرالى» شەشىم; «كەڭەس حالقىنىڭ 1941-1945 جىلدارداعى ۇلى وتان سوعىسىنداعى جەڭىسىنىڭ 70 جىلدىعىنا قاراي بەكىتىلگەن ورتاق مەرەيتويلىق ناگرادا تۋرالى» شەشىم; «تاۋەلسىز مەملەكەتتەر دوستاستىعىنا قاتىسۋشى مەملەكەتتەر پارلامەنتارالىق اسسامبلەياسىنىڭ تمد جوعارى جارعىلىق ورگاندارىنىڭ شەشىمدەرىن ىسكە اسىرۋ جونىندەگى قىزمەتى تۋرالى» شەشىم; «قىلمىسقا قارسى كۇرەستىڭ 2014-2018 جىلدارعا ارنالعان بىرلەسكەن شارالارىنىڭ مەملەكەتارالىق باعدارلامالارى تۋرالى» شەشىم; «تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ تەرروريزمگە جانە ەكسترەميزمنىڭ وزگە دە كۇش كورسەتۋلەرىنە قارسى كۇرەستە 2014-2016 جىلدارعا ارنالعان ىنتىماقتاستىق باعدارلاماسى تۋرالى» شەشىم; «ەسىرتكى زاتتارىنىڭ, پسيحوتروپتىق زاتتاردىڭ جانە ولاردىڭ پرەكۋرسورلارىنىڭ زاڭسىز اينالىمىنا قارسى كۇرەس پەن ناشاقورلىققا قارسى ارەكەت ەتۋدەگى تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ 2014-2018 جىلدارعا ارنالعان باعدارلاماسى تۋرالى» شەشىم; «ادام ساۋداسىنا قارسى كۇرەستە تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ 2014-2018 جىلدارعا ارنالعان ىنتىماقتاستىق باعدارلاماسى تۋرالى» شەشىم; «قازاقستان رەسپۋبليكاسى مەن قىرعىز رەسپۋبليكاسىندا 2014 جىلى «دوستاستىقتىڭ مادەني قالالارى» مەملەكەتارالىق باعدارلاماسىن ىسكە اسىرۋ تۋرالى» شەشىم; «اقپاراتتىق تەحنولوگيالاردى پايدالانا وتىرىپ جاسالعان قىلمىستارعا قارسى كۇرەستەگى تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ ىنتىماقتاستىق تۇجىرىمداماسى تۋرالى» شەشىم; «تاۋەلسىز مەملەكەتتەر دوستاستىعى اياسىندا قۇپيا اقپاراتتى قورعاۋ تۋرالى كەلىسىم جانە تاۋەلسىز مەملەكەتتەر دوستاستىعى ورگاندارىندا قۇپيا اقپاراتتار الماسۋ ەرەجەلەرى تۋرالى» شەشىم; تاۋەلسىز مەملەكەتتەر دوستاستىعى اياسىندا قۇپيا اقپاراتتى قورعاۋ تۋرالى كەلىسىم; سىبايلاس جەمقورلىققا قارسى ارەكەت ەتۋ جونىندەگى مەملەكەتارالىق كەڭەس قۇرۋ تۋرالى كەلىسىم; «مەملەكەتارالىق ۆاليۋتالىق كوميتەتتى تاراتۋ جانە تمد-عا قاتىسۋشى مەملەكەتتەردىڭ قارجىلىق, ۆاليۋتالىق تولەم مەن كرەديتتىك قارىم-قاتىناستار سالاسىنداعى ودان ارعى ىنتىماقتاستىعى تۋرالى» شەشىم; مەملەكەتارالىق ۆاليۋتالىق كوميتەتتى قۇرۋ تۋرالى 1995 جىلعى 26 مامىرداعى كەلىسىمنىڭ قولدانىلۋىن توقتاتۋ تۋرالى حاتتاما; «تاۋەلسىز مەملەكەتتەر دوستاستىعىنىڭ ەكونوميكالىق سوتى توراعاسىنىڭ ورىنباسارى تۋرالى» شەشىم; «تاۋەلسىز مەملەكەتتەر دوستاستىعى گراموتاسىمەن ماراپاتتاۋ تۋرالى» حاتتامالىق شەشىم; «تاۋەلسىز مەملەكەتتەر دوستاستىعىنا توراعالىق ەتۋ تۋرالى» شەشىم; «تاۋەلسىز مەملەكەتتەر دوستاستىعى مەملەكەتتەر باسشىلارى كەڭەسىنىڭ كەزەكتى وتىرىسىن وتكىزۋ تۋرالى» حاتتامالىق شەشىم.
تمد-عا مۇشە ەلدەر مەملەكەت باسشىلارى كەڭەسى وتىرىسىنىڭ سوڭىندا جۋرناليستەرگە ارنالعان ءباسپاسوز ءماسليحاتى ءوتتى. وندا دوستاستىق ەلدەرىنىڭ باسشىلارى جۋرناليستەرگە كەڭەس وتىرىستارىندا قارالعان جانە قول جەتكىزىلگەن كەلىسىمدەر مەن كوتەرىلگەن ماسەلەلەر تۋرالى ەگجەي-تەگجەيلى بايانداپ بەردى.
بۇل كۇنى پرەزيدەنتتەر, سونداي-اق, مينسكىدەگى تاۋەلسىزدىك سارايى اۋماعىندا ورنالاسقان مەملەكەت باسشىلارى اللەياسىنا اعاش وتىرعىزدى.
ءلايلا ەدىلقىزى,
«ەگەمەن قازاقستان» –
مينسكىدەن.
-----------------------------------------
سۋرەتتەردى تۇسىرگەندەر
س.بوندارەنكو, ب.وتارباەۆ.