قازاقستان پوليتسياسىنىڭ جارشىسىنا اينالعان «ساقشى» جانە «نا ستراجە» گازەتتەرىنىڭ جارىق كورە باستاعانىنا 80 جىل تولدى. وسىعان وراي الدىڭعى كۇنى «ساقشى» – «نا ستراجە»: كەشە, بۇگىن, ەرتەڭ» تاقىرىبىنداعى حالىقارالىق كونفەرەنتسيا بولدى. وعان پرەزيدەنت اكىمشىلىگىنىڭ, ىشكى ىستەر مينيسترلىگىنىڭ, وزگە دە قۇقىق قورعاۋ ورگاندارىنىڭ وكىلدەرى, ارداگەرلەر قاتىستى.
قازاقستان پوليتسياسىنىڭ جارشىسىنا اينالعان «ساقشى» جانە «نا ستراجە» گازەتتەرىنىڭ جارىق كورە باستاعانىنا 80 جىل تولدى. وسىعان وراي الدىڭعى كۇنى «ساقشى» – «نا ستراجە»: كەشە, بۇگىن, ەرتەڭ» تاقىرىبىنداعى حالىقارالىق كونفەرەنتسيا بولدى. وعان پرەزيدەنت اكىمشىلىگىنىڭ, ىشكى ىستەر مينيسترلىگىنىڭ, وزگە دە قۇقىق قورعاۋ ورگاندارىنىڭ وكىلدەرى, ارداگەرلەر قاتىستى.
كونفەرەنتسيادا ءسوز العان ىشكى ىستەر ءمينيسترىنىڭ ورىنباسارى امانتاي كۇرەڭبەكوۆ اتالعان باسىلىمداردىڭ اتقارعان جانە ءبۇگىنگى تاڭداعى جەدەل قىزمەتىنە توقتالىپ ءوتتى. ەلىمىزدىڭ ىشكى ىستەر ورگاندارىنىڭ قىزمەتى – ەڭ اۋقىمدى سالالاردىڭ ءبىرى. وسىعان وراي قوعامعا قاۋىپ توندىرگەن قىلمىستاردىڭ دەر كەزىندە اشىلۋى, قازاقستاندىق پوليتسيانىڭ جەدەل ءىس-ارەكەتتەرى, قول جەتكىزگەن جەتىستىكتەرى, ءبارى-ءبارى اتالعان باسىلىم بەتتەرىنەن كورىنىس تابۋدا. ىشكى ىستەر سالاسىنىڭ وزگەگە ۇلگى بولارلىق قىزمەتكەرلەرىن, قايسار وعلانداردىڭ قايتپاس ەرلىكتەرىن پاش ەتۋدى ءبىر ساتكە دە ۇمىت قالدىرمايتىن باسىلىمداردىڭ بۇل قادامى سالانىڭ جەتىلۋىنە, قىزمەتتىك ءتارتىپ پەن كاسىبيلىكتىڭ جوعارىلاۋىنا ءوز ىقپالىن تيگىزەتىنى اقيقات, دەدى گەنەرال.
ايتسا ايتقانداي, قازاقستاندىق پوليتسيانىڭ وڭ ءيميدجىن قالىپتاستىرۋدا ۇلكەن ءرول اتقاراتىن باسىلىمدار ىشكى ىستەر سالاسى قۇرىلىمدارىنىڭ ءوزارا جۇمىس تاجىريبەسىمەن الماسۋىنا ىقپال ەتىپ, ىشكى ىستەر ورگاندارى قىزمەتكەرلەرىنە ازاماتتىق جانە مورالدىق-ادامگەرشىلىك تاربيەنى ءسىڭىرىپ كەلەدى. وسى ورايدا ءسوز العاندار اتالعان باسىلىمدار قازاقستان رەسپۋبليكاسى ىشكى ىستەر ورگاندارىنىڭ اقپاراتتىق-ناسيحات ورتالىعى ەكەنىن ماقتانىشپەن ايتتى. ويتكەنى, ىشكى ىستەر مينيسترلىگىنىڭ تىنىس-تىرشىلىگى, وسى سالاداعى جاڭالىقتار مەن وزگەرىستەر ەڭ الدىمەن, اتالعان باسىلىمدار ارقىلى تارايدى. ءتارتىپ ساقشىلارىنىڭ ءبىلىم-بىلىگىن, ءىس-تاجىريبەلەرىن جەتىلدىرۋدە, جاقسى ىستەرىن جاريالاپ كوتەرمەلەۋدە «ساقشى-نا ستراجە» گازەتتەرىنىڭ ءرولى جوعارى.
ەلىمىزدىڭ ىشكى ىستەر ورگاندارىنىڭ بەلدى باسىلىمىنا اينالعان «ساقشى», «نا ستراجە» گازەتتەرىنىڭ تۇڭعىش سانى سوناۋ 1933 جىلى جارىق كورگەن بولاتىن. وتكەن عاسىردىڭ وتىزىنشى جىلدارىنداعى ەلىمىز ومىرىندەگى اۋىر كەزەڭدەردە مەملەكەتتىڭ ىشكى ءتارتىبىن ساقتاۋدا ميليتسيا قىزمەتكەرلەرىنىڭ ەڭبەگى ەرەن بولدى. ولاردىڭ جانكەشتى ەڭبەگىن حالىققا جەتكىزىپ وتىراتىن گازەت العاشىندا «SAQC» – «ستراج» دەگەن اتپەن شىقتى جانە 1960-1970 جىلدارى «نا ستراجە», «قازاقستان ميليتسياسى» سياقتى اتاۋلارمەن شىققان باسىلىم 1982 جىلدان باستاپ قازاقشا قوسىمشاسىن شىعارۋعا تالپىنىس جاسادى. قازىرگى «ساقشىنىڭ» نەگىزىن قالاۋعا سول كەزدە اياماي تەر توككەن ازامات – ىشكى ىستەر سالاسىندا ۇزاق جىلدار قىزمەت اتقارعان پولكوۆنيك بازارباي يساەۆ بولاتىن. ءسويتىپ, تەك قانا ورىس تىلىندە شىعىپ كەلە جاتقان «نا ستراجە» گازەتىنىڭ ءبىر بەتىن قازاقشا شىعارۋعا مينيسترلىك القاسى 1990 جىلدىڭ ءساۋىر ايىندا شەشىم قابىلدايدى دا سول جىلدىڭ قىركۇيەك ايىنان باستاپ گازەتتىڭ ءبىر بەتى قازاقشا «ساقشى» بولىپ شىعا باستادى. 1992 جىلدىڭ ساۋىرىنەن باستاپ گازەتتىڭ ءتورت بەتى ورىسشا, ءتورت بەتى قازاقشا شىقتى. 1999 جىلدىڭ 1 ساۋىرىنەن باستاپ «ساقشى» ءوز الدىنا دەربەس باسىلىم بولىپ جارىق كورىپ كەلەدى.
ىشكى ىستەر ورگاندارىنىڭ قىزمەتىن جاريالاۋدا باي تاجىريبەسى بار مەديا ورتالىق بۇگىنگى تاڭدا «ساقشى», «نا ستراجە» گازەتتەرىنەن باسقا, «پوليتسيا.kz», «ارداگەر» جانە «ەسىرتكىسىز بولاشاق» اتتى جۋرنالداردىڭ باسىن قوسقان اقپاراتتىق-ناسيحاتتىق ورتالىققا اينالعان. قازىر «ساقشى» اپتاسىنا ەكى رەت 8 جانە 16 بەت بولىپ شىقسا, «نا ستراجە» گازەتى دە ءدال وسىنداي كولەمدە جارىق كورەدى.
الەكساندر تاسبولاتوۆ,
«ەگەمەن قازاقستان».