پەتروپاۆل قالاسىندا جولدا اپاتتىق جاعداي تۋعىزعان 61 جاستاعى ماس جۇرگىزۋشى ۇستالدى. ونى جول قاۋىپسىزدىگىن جانە قوعامدىق ءتارتىپتى قامتاماسىز ەتۋ بويىنشا كەشكى رەيد جۇرگىزۋ كەزىندە نابەرەجنايا كوشەسىندە پاترۋلدىك پوليتسيا باتالونىنىڭ قىزمەتكەرلەرى توقتاتتى. Volkswagen Passat اۆتوكولىگىمەن جولدا اپاتتىق جاعداي تۋعىزعان. تەكسەرۋ كەزىندە جۇرگىزۋشىدەن الكوگولدىڭ وتكىر ءيىسى اڭقىپ تۇرعانى انىقتالدى. دارىگەردىڭ قورىتىندىسى بويىنشا ونىڭ ماساڭ ەكەندىگى دالەلدەندى, دەپ حابارلايدى Egemen.kz.
ناتيجەسىندە كولىك ارنايى تۇراققا قويىلىپ, جۇرگىزۋشى قالالىق پوليتسيا باسقارماسىنا جەتكىزىلدى. وعان قاتىستى اكىمشىلىك قۇقىق بۇزۋشىلىق تۋرالى كودەكستىڭ «جۇرگىزۋشىنىڭ كولىك قۇرالىن الكوگولدىك ماساڭ كۇيدە باسقارۋى» بويىنشا اكىمشىلىك حاتتاما تولتىرىلدى. باپپەن 15 تاۋلىككە قاماۋعا الۋ جانە 7 جىلعا جۇرگىزۋشى كۋالىگىنەن ايىرۋ كوزدەلگەن. پروتسەسسۋالدىق شەشىم قابىلداۋ ءۇشىن ماتەريالدار مامانداندىرىلعان اكىمشىلىك سوتقا وتكىزىلدى.
پوليتسيا دەپارتامەنتى باستىعىنىڭ ءبىرىنشى ورىنباسارى, پوليتسيا پولكوۆنيگى قانات ايتباەۆ جول قوزعالىسى ەرەجەلەرىنىڭ ورەسكەل بۇزۋشىلىقتارىن انىقتاۋ جانە الدىن الۋ تۇراقتى باقىلاۋدا دەپ اتاپ ءوتتى. جىل باسىنان بەرى سقو جولدارىندا كولىكتى ماساڭ كۇيدە جۇرگىزگەن 624 جۇرگىزۋشى ۇستالدى.