ەۋروكۋبوك: «استانا» ويسىراي جەڭىلدى

«استانانىڭ» كەشەگى جەڭىلىسىنە فۋتبول ساراپشىلارى, جانكۇيەرلەر كوماندانىڭ بەس اي بويى ماتچ وتكىز­بەگەنى سەبەپ بولعانىن, وعان ىشكى چەمپيوناتتى وتكىزۋگە رۇقسات بەرمەگەن باس سانيتار دارىگەر ايجان ەسما­عام­بەتوۆا مەن وزگە ەلدىڭ ىشكى چەم­پيوناتى جالعاسىپ جاتقاندا, ءتيىستى مەكەمەدەن رۇقسات الا الماعان قازاقستان فۋتبول فەدەراتسياسى مەن قازاق­ستاننىڭ كاسىپقوي فۋتبول ليگا­سى­نىڭ باسشىلىعىن كىنالاپ جاتىر. ءيا, «ديناموعا» قارسى ويىندا فۋتبولشىلارعا ويىن تاجىريبەسى جەتپەگەنى انىق بايقالدى. كوماندا كاپيتانى, تاجىريبەلى فۋتبولشى دەگەن دميتري شومكونىڭ ءوزى پاس اسىرۋ بىلاي تۇرسىن, دوپتى قابىلداۋدا وتە كوپ قاتەلەستى.

دەسە دە بۇل ويىندا «استانا» «دينامو برەستتەن» ەمەس, باس باپكەر ميحال بيلەك ءوزىنىڭ ارىپتەسى سەرگەي كوۆالچۋكتەن تاكتيكالىق جاعى­نان جەڭىلدى. نەگە دەسەڭىز, «استانا» ستويلوۆ پەن گريگورچۋك كەزىن­دە بەس قورعاۋشى, ءتورت جارتىلاي قورعاۋشى جانە ءبىر شابۋىلشىمەن ويناپ, كوبىنە قارسى شابۋىل ارقىلى قارسىلاستارىنان ايلاسىن اسىرىپ كەتەتىن. بىراق كەشەگى ماتچ­تا بيلەك مۇلدە باسقا تاكتيكامەن شىقتى. ياعني الاڭعا ءتورت قورعاۋشى, ءتورت جارتىلاي قورعاۋشى جانە ەكى شابۋىلشىنى شىعاردى. ال سەرگەي كوۆالچۋك «استانانىڭ» بۇرىنعى تاك­تيكاسىن, ياعني ءوز تاكتيكامىزدى وزى­مىزگە قولدانىپ, قارسى شابۋىل ار­قىلى-اق «استانانىڭ» تاس-تالقانىن شىعاردى. بۇل – ءبىر.

ەكىنشىدەن, بيلەك الاڭعا فۋتبولشى شىعارۋدا دا وڭباي قاتەلەستى. ماتچتان ءبىر ساعات بۇرىن «استانا» باس باپكەرى الاڭعا شىعاتىن 11 فۋت­بول­شىنىڭ ءتىزىمىن جاريالاعاندا كوكەيىمىزدە «نەگە بۇل ويىنشىلار؟» دەگەن سۇراق تۇردى. ويتكەنى بيلەك نەگىز­گى قۇرامنىڭ بىرقاتار ويىنشىسىن قوسالقى قۇرامدا ۇستاپ, ال قوسالقى قۇرامنىڭ كەيبىر ويىنشىسىن ءبىرىنشى مينۋتتان باستاپ الاڭعا شىعارۋدى قۇپ كورگەن ەكەن. مىسالى, 10 جىلدان بەرى «استانانىڭ» نەگىزگى قاقپاشىسى ءارى كاپيتانى بولىپ كەلگەن نەناد ەريچتى قوسالقى قۇرامعا قالدىرىپ, ونىڭ ورنىنا رەسمي كەزدەسۋدى 2019 جىل­دىڭ قاراشا ايىندا وتكىزگەن دميتري نەپوگودوۆتى شىعاردى. دميتري بىلتىر «ورداباسى» ساپىندا ەۋروپا ليگاسىندا ەكى ماتچ وتكىزگەنى بولماسا, ونىڭ ەۋروكۋبوك باسەكەلەرىندە مۇلدەم تاجىريبەسى جوق ەدى. ال ەريچ بىلتىر ەۋروپا ليگاسىنىڭ پلەي-وفف كەزەڭىندە «استانانى» توپتىق كەزەڭگە قالاي شىعارعانىن جانكۇيەرلەر جاقسى بىلەدى. كەشەگى ماتچتاعى التى گولدىڭ كەم دەگەندە ءۇش گولى نەپوگودوۆتىڭ قا­تە­لى­گىنەن, تاجىريبەسىزدىگىنەن سوعىلدى.

قورعانىستاعى ويىنشىلارعا كەلەر بولساق, وڭ قاناتتاعى قورعاۋشى انتونيو رۋكاۆينا ماتچ الدىنداعى جاتتىعۋدا جاراقات الىپ قالىپ, ونىڭ ورنىنا جارتىلاي قورعاۋشى يۋري پەرتسۋحتى شىعارۋعا ءماجبۇر بولدى. ورتالىق قورعاۋشىلار ۋروش راداكوۆيچ پەن لۋكا شيمۋنوۆيچ قارسىلاستىڭ بىردە-ءبىر شابۋىلىنا قارسىلىق كورسەتە المادى. جارتىلاي قورعاۋشىلار يۆان ماەۆسكي مەن ماكس ەبونگ قارسىلاستىڭ شابۋىلىن توقتاتۋ بىلاي تۇرسىن, شابۋىلداعى جىگىتتەرگە دۇرىس پاس جەتكىزە المادى.

تابلوداعى ەسەپ 3:0-گە جەتكەندە عانا باس باپكەر ميحال بيلەك فۋتبولشى تاڭداۋدا قاتەلەسكەنىن ءتۇسىنىپ, 35 مينۋتتا ويناپ جارىتپاعان يۋري پەرتسۋح پەن شابۋىلشى الەكسەي ششەتكيننىڭ ورنىنا قوس قاناتتا ونەر كورسەتەتىن تيگران بارسەگيان مەن دورين روتاريۋدى شىعاردى. وسى ەكى فۋتبولشى الاڭعا شىققاننان كەيىن عانا «استانانىڭ» ويىنىنا قان جۇگىرە باستادى. تىنىمسىز شابۋىلدىڭ ارقاسىندا قاھارمان توماسوۆ ەسەپتى قىسقارتۋعا مۇمكىندىك الدى. ەكىنشى تايمنىڭ 53 مينۋتىندا روتاريۋ «استانانىڭ» ەكىنشى گولىن سوققاندا جانكۇيەرلەردە ءۇمىت وتى پايدا بولعان ەدى. بىراق ءبارى ءبىز كۇتكەندەي بولا بەرمەيدى ەكەن. ويىن اياقتالعانعا دەيىن الاڭ قوجايىندارى ەكى گول سوقسا, 87 مينۋتتا قورعاۋشى ابزال بەيسەبەكوۆ ەسەپتى ءبىر گولعا قىسقارتتى. قورىتىندى ەسەپ – 6:3.

وسىلايشا «استانا» كلۋبى بيۋد­جەتى وزىنەن ءۇش ەسە تومەن «دينامو برەستتەن» ماسقارا بولىپ جەڭىلدى. سونداي-اق ەكىنشى جىل قاتارى­نان چەمپيوندار ليگاسىنىڭ ءبىرىنشى ىرىكتەۋ كەزەڭىنەن ارى اسا المادى. ەندى جەرلەستەرىمىز وزدەرى ويناپ ۇيرەنگەن دەڭگەيىنە ساي ەۋروپا ليگاسىندا باق سىنايدى. «استانا» ونەر كورسەتەتىن ەكىنشى كەزەڭنىڭ ويىندارى 17 قىركۇيەكتە وتەدى. بالكىم ءبىر ايعا جۋىق ۋاقىتتىڭ ىشىندە ەلوردا كومانداسى ەل بىرىنشىلىگىندە بىرنەشە ويىن وتكىزىپ, قاجەتتى دەڭگەيدە ويىن تاجىريبەسىن جيناپ ۇلگەرەر.

ماتچتىڭ قىسقاشا ستاتيستيكاسى:

«دينامو برەست» – «استانا» 6:3

گوردەيچۋك 16, پەچەنين 17, گوردەيچۋك 22, سەدكو 37, دياللو 55, 90 – توماسوۆ 45, روتاريۋ 53, بەيسەبەكوۆ 87.

دوپتى يەلىك ەتۋ – 49% – 51%; سوققى – 15:21; ءدال سوققى – 8:8; بۇرىشتاما – 3:10; وفسايد – 3:1; سارى قاعاز – 1:0; ويىنشى الماستىرۋ – 3:2.

«دينامو برەست»: قاقپاشى – يگناتوۆيچ; قورعاۋشىلار – پەچەنين, گابي, حاچەريدي, يۋزەپچۋك; جارتىلاي قورعاۋشىلار – سەدكو, كيسلياك (كاپيتان) (كريۆەتس), تۆە; شابۋىلشىلار – گوردەيچۋك (ساۆيتسكي), ميلەۆسكي (بىكوۆ), دياللو.

«استانا»: قاقپاشى – نەپوگودوۆ; قورعاۋشىلار – پەرتسۋح (بارسەگيان), شيمۋنوۆيچ, راداكوۆيچ, شومكو; جارتىلاي قورعاۋشىلار – ماەۆسكي, توماسوۆ, ەبونگ, پ.سوتيريۋ, بەيسەبەكوۆ; شابۋىلشى – ششەتكين (د.روتاريۋ).