جۇمىس ىزدەپ جۇرگەن ادامنىڭ سەنگىش بولاتىنى اۋەلدەن بەلگىلى. سولتۇستىكقازاقستاندىق پوليتسەيلەرگە سونداي ءبىر ازامات ارىز ءتۇسىرىپ, ءوزىن ينتەرنەت ارقىلى الاياق الداپ كەتكەنىن جەتكىزگەن.
ول «ۆ» ساناتىنداعى جۇرگىزۋشى كۋالىگىڭىز بولسا جالاقىڭىز جوعارى بولادى دەگەن حابارلاندىرۋدى ينتەرنەتتەن كورگەن. كورسەتىلگەن نومىرگە تەلەفون سوقسا ار جاعىنداعى ايەل بارىنشا بيازى سويلەپ, ونىڭ بۇل ورىنعا سايكەس كەلەتىنىن ايتقان. الايدا, جۇمىسقا ورنالاسۋ ءۇشىن سانيتارلىق كىتاپشا جانە دەنساۋلىق جاعدايى تۋرالى مەديتسينالىق انىقتاما ۇسىنۋى قاجەت ەكەنىن ايتقان. ال ولاردىڭ ءبارىن تەزىرەك جاساۋ ءۇشىن مىنا ەسەپشوتقا اقشا اۋدارۋىڭىز كەرەك دەگەن. كارانتين ۋاقىتىندا كەرەكتى انىقتامالاردى الۋدىڭ قيىن ەكەنىن ەسكەرگەن ازامات كورسەتىلگەن ەسەپشوتقا تالاپ ەتكەن سومانى اۋدارىپ-اق جىبەرگەن ەكەن...
كەيىن تەلەفوننىڭ ار جاعىنداعى «قامقورشى» ەلەكتروندى رۇقسات قاعازىن ازىرلەۋ ءۇشىن قوسىمشا اقى سۇراعان, بىراق بۇل اقشاسىنىڭ جوقتىعىن ايتىپ, بەتپە-بەت كەزدەسۋدى ۇسىنعان ەكەن... وسىدان كەيىن الاياق بايلانىستى ءۇزىپ, تەلەفوندى ءوشىرىپ تاستايدى. ەر ادامعا پوليتسياعا جۇگىنۋگە تۋرا كەلەدى.
ينتەرنەت-الاياقتىقتىڭ تاعى ءبىر ءجيى كەزدەسەتىن ءتاسىلى بار. ادامدارعا بەلگىسىز بىرەۋلەر حابارلاسىپ, ولاردىڭ بانك كارتالارىن بىرەۋلەر بۇزىپ, يەمدەنبەكشى ەكەنىن ايتىپ قورقىتادى. وسىنداي ايلاعا 48 جاستاعى وبلىس تۇرعىنى الدانىپ قالعان. سىپايى جانە سەنىمدى كورىنگەن ادامعا ايەل سەنىپ, ونىڭ بارلىق «نۇسقاۋلارىن» ورىنداعان: دەپوزيت شوتىنان كارتاعا 130 مىڭ تەڭگەنى اۋدارىپ, تەلەفون ارقىلى كارتا ءنومىرىن ايتىپ بەرگەن. كەيىن قاسكويدىڭ قۇرىعىنا ءتۇسىپ قالعانىنا كوزى جەتىپ, پوليتسياعا جۇگىنگەن. قازىرگى ۋاقىتتا پوليتسەيلەر قاسكويلەردى انىقتاۋ بويىنشا جەدەل-پروفيلاكتيكالىق ءىس-شارالار جۇرگىزۋدە.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ۇشىن Telegram جەلىسىندە بىزگە جازىلىڭىز.