كەشە "چەليابى - ءنوۆوسىبىر" تاسجولىنىڭ سقو قىزىلجار اۋدانىنداعى پەنكوۆ اۋىلىنىڭ تۇسىنان وتەتىن بولىگىندە ۇلكەن جول-كولىك اپاتى بولدى. وسى جولمەن ماعجان جۇماباەۆ اۋدانىنان كەلە جاتقان 62 جاستاعى ازامات Toyota Camry كولىگىمەن جولدىڭ قارسى باعىتىنا شىعىپ كەتىپ, بۋلاەۆ قالاسىنان كەلە جاتقان كاماز اۆتوكولىگىنە بەتپە-بەت سوعىلعان.
ناتيجەسىندە Toyota Camry-ءدىڭ جۇرگىزۋشىسى مەن جانىندا وتىرعان 63 جاستاعى ازامات ءتىل تارتپاي قازا بولدى. ال 56 جاستاعى كاماز-دىڭ جۇرگىزۋشىسى امان, تەك كولىگىنە كوپ زاقىم كەلگەن.
قازىر جكو بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلىپ, تەكسەرۋ جۇرگىزىلۋدە. بىرقاتار قاجەتتى ساراپتامالار تاعايىندالىپ, جۇرگىزىلۋدە.
جالپى, اعىمداعى جىلدىڭ 7 ايىندا سقو-دا 98 جول-كولىك وقيعاسى تىركەلدى, ولاردا 13 ادام قايتىس بولىپ, 129-ى جاراقات الدى.