سولتۇستىك قازاقستان وبلىسىندا 2397 كول بار, سونىڭ 332-ءسى جالعا بەرىلگەن. بۇلار بالىعى كوپ, سۋى تۇششى, قۇنارلى, ۇلكەن كولدەر. بۇل كولدەردەن رۇقسات قۇجاتتارى بولعان جاعدايدا عانا بالىق اۋلاۋعا بولادى. جۋىردا سقو تابيعاتتى قورعاۋ پوليتسياسى اڭ اۋلاۋ شارۋاشىلىعى قىزمەتكەرلەرىمەن جانە باسقا دا مۇددەلى ۆەدومستۆولارمەن بىرلەسە وتىرىپ وسى كولدەر مەن قورىقتاردا, ورمانداردا تابيعاتتى قورعاۋ زاڭناماسىن ساقتاۋ بويىنشا رەيد جۇرگىزدى, - دەپ حابارلايدى Egemen.kz.
وبلىستا "قىزىل كىتاپقا" ەنگىزىلمەگەن اڭدار مەن قۇستاردى اۋلاۋعا عانا رۇقسات ەتىلگەن. ال اڭ اۋلاۋ شارۋاشىلىعى اۋماعىنا ارنايى رۇقسات بولعان جاعدايدا عانا بارۋعا بولادى. وبلىستا ونداي شارۋاشىلىقتاردىڭ سانى – 37. بۇلاردان باسقا التى قورىقتا جانە "كوكشەتاۋ" ۇلتتىق پاركى اۋماعىندا اڭ اۋلاۋعا تىيىم سالىنعان.
سوڭعى رەيدتى قوسا ەسەپتەگەندە جىل باسىنان بەرى تابيعاتتى قورعاۋ زاڭناماسىنىڭ 658 قۇقىق بۇزۋشىلىعى انىقتالعان. ونىڭ ىشىندە – 378 جانۋارلار دۇنيەسى سالاسىندا, 226-سى بالىق اۋلاۋ سالاسىندا جانە وسىمدىكتەر الەمى بويىنشا – 9. ەكولوگيالىق قىلمىس فاكتىلەرى بويىنشا 5 قىلمىستىق ءىس سوتقا جولداندى, تاعى 8-ءى وندىرىستە جاتىر. كەلتىرىلگەن شىعىن سوماسى 13 ملن. تەڭگەدەن اسادى. براكونەرلەردەن 21 ءسىبىر ەلىگىنىڭ, 2 مارالدىڭ تۇتاس ەتى جانە 3 اققۋدىڭ ەتى الىندى. سونداي-اق, 3 تەحنيكا مەن 8 مىلتىق الىندى.
سولتۇستىك قازاقستان وبلىسى