جاڭا ماۋسىمداعى وزگەرىستەر

جۋىردا ۋەفا بيىلعى كۋبوك باسەكەلەرىن باستاماي تۇ­رىپ, پاندەمياعا بايلانىستى چەم­پيوندار ليگاسى مەن ەۋروپا ليگاسىنىڭ ۇيىمداستىرىلۋ بارىسىنا بىرقاتار شەكتەۋلەر مەن جاڭا وزگەرىستەر ەنگىزدى. ماسەلەن, ۋەفا ەۋروكۋبوك باسەكەلەرىندەگى ءاربىر ىرىكتەۋ كەزەڭىنىڭ جەرەبە تارتۋ ءراسىمى الدىندا باسەكەگە قاتىساتىن كوماندانىڭ ەلىندەگى ەپيدەميالىق جاعدايدى, مەم­لەكەتتەگى شەكتەۋ تۋرالى مالى­مەتتەردى جاريالاپ وتىرادى.

ال ەلدەگى شەكتەۋلەردى تۋرنيرگە قا­تىسۋشى كوماندالار ۋەفا-عا حابارلاپ وتىرادى. ەگەر كلۋب كورسەتىلگەن مەرزىمدە ۋەفا اكىم­شى­لىگىنە تىزىمىندە كورسەتىل­گەن­دەردەن باسقا جاڭا شەكتەۋلەر بار ەكەندىگى تۋرالى حابارلاماسا جانە مالىمەتتى جاسىرا وتىرىپ ماتچ­تى ۇيىمداستىرۋعا ارەكەت ەتسە, ۋەفا-نىڭ باقىلاۋ, ەتيكالىق جانە تارتىپتىك كوميتەتى سول ەلدىڭ كومانداسىنا تەحنيكالىق (0:3 ەسەبىمەن) جەڭىلىس بەرەدى. سون­داي-اق ەگەر ۇكىمەت تاراپىنان مەم­لەكەتكە كىرۋگە شەكتەۋ قويىل­عان بولسا, كلۋب ماتچتى بەيتا­راپ الاڭدا وتكىزە الادى. تەك جاع­دايدى الدىن الا ۋەفا-عا حابارلاپ, قاي ەلدە وتكىزگىسى كەلەتىنىن ۇسى­نۋى كەرەك. ەگەر كلۋب يەسى بالاما نۇسقانى ۇسىنا الماسا, ويىن تۋرالى شەشىمدى ۋەفا اكىم­شىلىگى قابىلدايدى. بىراق بۇل كلۋب كەزدەسۋدى ۇيىمداستىرۋعا جاۋاپ­تى بولادى, ال بارلىق شىعىن­داردى ەكى قارسىلاس ءوز موينىنا الادى. ەگەر ولاردىڭ بىرەۋى ويىنعا قاتىسۋدان باس تارتسا, وندا 0:3 ەسەبىمەن جەڭىلىس جاريالايدى.

وسىعان وراي بىرەر كۇن بۇرىن قازاقستاندىق كلۋب­تار كوروناۆيرۋسقا بايلانىستى فورس-ماجور جاعداي­ىندا چەمپيوندار ليگاسى مەن ەۋ­روپا ليگاسىنىڭ ءۇي ماتچتارىن گرۋزيادا وتكىزۋى مۇمكىن دەگەن اقپارات جاريالاندى. مۇنى گرۋ­زيا فۋتبول فەدەراتسياسىنىڭ پرەزي­دەنتى دە راستاپ وتىر.

«ەگەر ەكى تاراپتىڭ ءبىرى ءوز ويىنىن ەلىندە وتكىزە الماسا, ۋەفا-نىڭ جاڭا ەرەجەسى بويىنشا باس­قا ەلدە وتكىزۋگە مىندەتتى. وسى جاعدايعا بايلانىستى ءبىز ۋەفا-عا كەيبىر ماتچتاردى ۇيىمداستىرىپ بەرە الاتىنىمىزدى مالىمدەدىك. ءبىزدىڭ ەلدە قاي ەلدىڭ كوماندالارى ويناۋى مۇمكىن؟ مىسالى, قازىر قازاقستاندا ەپيدەميالىق جاعداي قيىن. ەگەر قازاقستان كوماندالارى قارسىلاستارىن ەلدەرىندە قابىلداي الماسا, وندا ءبىز بۇل مۇمكىندىكتى قاراستىرامىز. بۇل ءبىزدىڭ ەلىمىزدىڭ يميدجىنە وڭ اسەر ەتەدى»,  دەدى كوبياشۆيلي.

ادەتتە, ەۋروكۋبوك ماتچتارى ۇي­دەگى جانە سىرتتاعى دەپ ەكىگە بولى­نەتىن. بيىلعى جاعدايعا بايلانىستى كەزدەسۋلەر ەكى ەمەس, تەك ءبىر ماتچتان تۇرادى (چەمپيوندار ليگا­سىنىڭ ءتورتىنشى ىرىكتەۋ كەزە­ڭىنەن باسقا ىرىكتەۋلەر). سون­دىق­تان بيىل كەي ماتچتاردى ءوز الاڭىندا وتكىزەتىن كوماندا جەرەبەدەن كەيىن 24 ساعات ىشىندە ۋەفا اكىمشىلىگىنە ويىننىڭ قاي جەردە وتەتىنى, قاي كۇنى جانە قاي ۋاقىتتا باستالاتىنى تۋرالى جازباشا راستاۋ جىبەرۋى كەرەك. ءدال وسىنداي دەرەك­تەردى قارسىلاس كلۋبقا دا بەرۋ مىندەتتى.

ەگەر ۋەفا اكىمشىلىگى ەنگى­زىل­گەن شەكتەۋلەر تۋرالى اقپاراتتى دۇرىس ەمەس نەمەسە جەتكىلىكسىز دەپ ساناسا نەمەسە بۇل شەكتەۋلەر ماتچ­تى بەيتاراپ الاڭعا, باسقا ەلگە اۋىستىرۋ ءۇشىن جەتكىلىكسىز بولسا, سوڭعى شەشىم ۋەفا اكىمشىلىگىندە قالادى. بۇل جاعدايدا الاڭ قو­جايىنى سانالاتىن كلۋب كەزدەسۋدى ۇيىمداستىرۋعا جانە بارلىق شىعىندارعا جاۋاپ بەرەدى. ەگەر قارسىلاستاردىڭ ءبىرى ويىنعا قاتى­سۋدان باس تارتسا, وعان 0:3 ەسەبىمەن جەڭىلىس بەرەدى.

جەرەبە تارتىلىپ, ماتچ العاش­قى كوماندانىڭ ەلىندە ءوتۋى كەرەك بولىپ, الايدا بەلگىلى سەپتەر­مەن بۇل ويىندى ءوز ەلىندە ۇيىم­داستىرا المايتىن بولسا كلۋبتار ءوزارا كەلىسىپ (ۋەفا ماقۇل­داۋى­مەن), ماتچتىڭ وتكىزىلەتىن ورنىن اۋىستىرا الادى.

ەگەر ماتچتى قابىلدايتىن كوماندا ۋەفا-عا ويىننان ەكى كۇن بۇرىن ەلدەگى جاعدايدىڭ تۇراقتى ەكەنىن مالىمدەپ, الايدا كەزدەسۋگە ءبىر كۇن قالعاندا نەمەسە ماتچ كۇنى مەملەكەتتىك نەمەسە جەرگىلىكتى بيلىك ورگاندارى سپورتتىق جارىس وتكىزۋگە شەكتەۋ ەنگىزسە, ەل بي­­لىگى كۇنتىزبەگە سايكەس ماتچتى وت­ك­ى­زۋگە كەدەرگى كەلتىرگەنى ءۇشىن شەك­­تەۋ ەنگىزگەن ەلدىڭ كلۋبىنا 0:3 ەسە­بىمەن جەڭىلىس بەرىلەدى.

ەگەر جوعارىدا اتالعان جاع­داي­لاردا ەكى كلۋب تا ويناۋدان باس تارتسا نەمەسە ويىننىڭ وتپەۋىنە كىنالى دەپ سانالسا ۋەفا ولاردى چەمپيوندار ليگاسىنىڭ جانە ەۋروپا ليگاسىنىڭ 2020/21 جىلعى ماۋسىمىنان شەتتەتەدى.

كوماندالار ماتچتان ءبىر كۇن بۇرىن كوروناۆيرۋستىڭ بار-جو­عىن انىقتايتىن تەست تاپسىرادى. ەگەر تەست وڭ ناتيجە بەرسە ۋەفا جەرگىلىكتى ۇكىمەتتىڭ شەشى­مىن كۇتەدى. ەگەر كوماندادا 13 فۋت­بولشى ۆيرۋستان ءدىن امان بولسا, جەر­گىلىكتى ۇكىمەت ماتچ وتكىزۋگە رۇق­سات بەرسە, ويىن وتەدى. ال رۇق­سات بەرمەگەن جاعدايدا ۋەفا ويىن وتەتىن كۇندى باسقا ۋاقىتقا كو­شىرۋى مۇمكىن. ءتىپتى ماتچ ۋاقى­تىن اۋىستىرۋعا مۇمكىندىك بولماسا, سول ويىندا الاڭ قوجايىنى سانالعان كلۋبقا تەحنيكالىق جەڭىلىس جازىلادى.

ۋەفا بەكىتكەن مەرزىم بو­يىنشا, چەمپيوندار ليگاسىنىڭ ەلەكتىك كەزدەسۋلەرى 14 تامىزدا, ءبىرىنشى ىرىكتەۋ كەزەڭ 21 تامىز­دا, ەكىنشى ىرىكتەۋ كەزەڭ 11 قىر­كۇيەكتە, ءۇشىنشى ىرىكتەۋ كەزەڭ 18 قىركۇيەكتە وينالادى. ال ءتورتىنشى ىرىكتەۋ كەزەڭىنىڭ العاشقى ماتچى 25 قىركۇيەككە, قارىمتا كەزدەسۋى 1 قازانعا جوسپارلانعان.

ەۋروپا ليگاسىنىڭ ماتچتارى مىنا كۇنتىزبەلىك ۋاقىتتا وتە­دى: العاشقى ەلەكتىك كەزەڭ 22 تا­مىزدا, ءبىرىنشى ىرىكتەۋ كەزەڭ 12 قىركۇيەكتە, ەكىنشى ىرىكتەۋ كەزەڭ 19 قىركۇيەكتە, ءۇشىنشى ىرىك­تەۋ كەزەڭ 26 قىركۇيەكتە جانە ءتورتىنشى ىرىكتەۋ كەزەڭى 2 قازاندا ۇيىمداستىرىلادى.