اۋەسقوي بوكستان قازاقستان ۇلتتىق قۇراماسىنىڭ كاپيتانى, اۋىر سالماقتاعى تالانتتى بوكسشىمىز قامشىبەك قوڭقاباەۆ كاسىپقوي رينگتە باق سىناۋدى قۇپ كوردى. بۇل اقپاراتتى MTK Global Kazakhstan كومپانياسىنىڭ ءباسپاسوز قىزمەتى تاراتىپ وتىر.
28 جاستاعى قىزىلوردا بوكس مەكتەبىنىڭ تۇلەگى ۇزاق جىلدان بەرى ۇلتتىق قۇرامادا ونەر كورسەتىپ كەلەدى. ريو وليمپياداسىنا دەيىن ول يۆان دىچكودان كەيىنگى ەكىنشى ءنومىرلى بوكسشى اتانىپ كەلگەن-ءدى. 2016 جىلدان كەيىن وليمپيادانىڭ ەكى دۇركىن قولا جۇلدەگەرى اتانعان دىچكو قۇرامادان كەتكەننەن سوڭ +91 كيلو سالماقتىڭ تىزگىنىن ۇستادى. قازاقستاننىڭ سپورت شەبەرى دەگەن اتاعى بار قامشىبەك 2017 جانە 2019 جىلدارى الەم چەمپيوناتىنىڭ كۇمىس جۇلدەگەرى اتانسا, ءدال وسى جىلدارى دا ازيا بىرىنشىلىگىندە ەكىنشى ورىننان كورىندى.
ناۋرىز ايىندا امماندا وتكەن توكيو وليمپياداسىنا جولداما بەرۋشى تۋرنيردە ءتورتىنشى ورىن يەلەنىپ, وليمپيادا جولداماسىن يەلەنگەن بولاتىن. ال كۇنى كەشە دارىندى بىلعارى قولعاپ شەبەرى ۇلىبريتانيادا ىرگەتاسى قالانعان MTK Global مەنەدجەرلىك كومپانياسىمەن كەلىسىمشارتقا وتىرىپ, كاسىپقويلار اراسىندا ونەر كورسەتۋگە بەل بۋدى. دەسە دە وتانداسىمىز كەلەسى جىلى توكيودا جالاۋى جەلبىرەيتىن جازعى وليمپيا ويىندارىنا قاتىسادى.