اسا اۋىر سالماقتاعى قازاقستاندىق كاسىپقوي بوكسشى جان كوسوبۋتسكي كەزەكتى جەكپە-جەگىن جەڭىسپەن اياقتادى. وتانداسىمىز بەلارۋس استاناسى مينسكىدە وتكەن بوكس كەشىندە شارشى الاڭعا شىعىپ, پولشالىق قارسىلاسىن نوكاۋتقا جىبەردى.
ەكى بوكسشى اراسىنداعى ايقاس ون راۋندقا جوسپارلانعان بولاتىن. الايدا جەكپە-جەك سوڭعى راۋندقا دەيىن جالعاسقانىمەن جەرلەسىمىز ونىنشى راۋندتىڭ بەل ورتاسىنان اۋعاندا كاميل سوكولوۆسكيدى (9-17-2) سۇلاتىپ سالدى. پولشالىق بوكسشى جاننىڭ اۋىر سوققىسىنان كەيىن ەسىن جيا الماعان سوڭ تورەشى كەزدەسۋدى مەرزىمىنەن بۇرىن اياقتاۋعا ءماجبۇر بولدى. سونداي-اق سوكولوۆسكي بەسىنشى راۋندتا دا ءبىر رەت نوكداۋنعا تۇسكەنىمەن, تەز ەسىن جيىپ ۇلگەرگەن ەدى.
وسىلايشا جان كوسوبۋتسكي وزىنە تيەسىلى IBO Inter-Continental بەلبەۋىن ءبىرىنشى رەت قورعادى. بۇل كوسوبۋتسكيدىڭ كاسىپقوي بوكستاعى 13-ءشى نوكاۋتى جانە 14-ءشى جەڭىسى. ال قارسىلاسى 18-رەت جەڭىلىستىڭ كەرمەك ءدامىن تاتتى.
2017 جىلدان باستاپ كاسىپقوي بوكستا ونەر كورسەتىپ كەلە جاتقان وتانداسىمىز وسىمەن توعىزىنشى جەكپە-جەگىن بەلارۋس جەرىندە وتكىزدى. سونىمەن قاتار بۇگىنگە دەيىن ەكى رەت رەسەيدە, ءبىر مارتە – ۋكراينا, گەرمانيا جانە ءباا ەلىندە شارشى الاڭعا شىققان.