جامبىل وبلىستىق اكىمدىگى مەن «رۋحاني جاڭعىرۋ» جوبالىق ءوفيسىنىڭ باستاماسىمەن وڭىردە «اسارلاتىپ ءۇي سالۋ» جوباسى باستالىپ تا كەتتى. مۇنداعى ماقسات اۋدان, اۋىلدى جەرلەردەگى باسپاناعا مۇقتاج ازاماتتارعا كوپتىڭ كومەگىمەن ءۇي سالىپ بەرۋ بولىپ وتىر.
بۇگىندە توعىز جولدىڭ تورابىندا ورنالاسقان قورداي اۋدانىندا بۇل باستاما ەل يگىلىگىنە قىزمەت ەتۋدە. ماسەلەن, اۋدان بويىنشا باسپاناعا مۇقتاج 25 وتباسى انىقتالىپ, قازىرگى كەزدە 15 وتباسىن تۇرعىن ۇيمەن قامتۋ جۇمىستارى باستالىپ كەتتى. اعىمداعى جىلى اۋدانداعى العا, جامبىل, ستەپنوە, قاسىق, اۋقاتتى, قاراسۋ جانە وتار اۋىلدارىندا تۇراتىن كوپبالالى, مۇمكىندىگى شەكتەۋلى, الەۋمەتتىك جاعىنان از قامتىلعان وتباسىلار مەن جالعىزباستى انالار باسپانالى بولادى. سول سياقتى اسارلاتىپ ءۇي سالۋ جۇمىستارى ءالجان انا اۋىلىندا دا جالعاسىن تابۋدا. مۇندا دا اناسىنان ەرتە ايىرىلىپ, اكەسىنىڭ قامقورلىعىنسىز قالعان اعايىندى ەكى بالانى تۇرعىن ۇيمەن قامتۋ جۇمىسى جۇرگىزىلۋدە. ءالجان انا اۋىلدىق وكرۋگى اكىمدىگىنىڭ ۇيىتقى بولۋىنىڭ جانە كاسىپكەر ازاماتتاردىڭ قايىرىمدىلىعىنىڭ ناتيجەسىندە بوس تۇرعان ءۇي بۇگىندە كۇردەلى جوندەۋدەن وتۋدە. اتالعان ءۇيدىڭ ەسىك-تەرەزەلەرى اۋىستىرىلىپ, ءىشى اكتەلىپ, سىرلانىپ, ەسكى قورالار تەحنيكانىڭ كۇشىمەن ءسۇرىلىپ تاستالعان. ەندى بۇل ۇيگە كوگىلدىر وتىن مەن ەلەكتر جەلىلەرىن تارتۋ ماسەلەلەرى ۇيىمداستىرىلۋدا.
جامبىل وبلىسى