قوستاناي وبلىسى توبىل وڭىرىندەگى كوبەك ەلدى مەكەنىنىڭ وقۋشىلارى اۆتوبۋستىڭ جارامسىزدىعىنان ەكى اپتادان بەرى ساباققا بارماعان. اۋىل تۇرعىندارى بالالارىمىزعا ءجوندى اۆتوبۋس بولمەسە, ولاردى مۇلدە ساباققا جىبەرمەيمىز دەيدى. بۇل تۋرالى «استانا» تەلەارناسى حابارلادى.
شاكىرتتەردى مەكتەپكە اپاراتىن ەسكى كولىكتىڭ توبەسى شۇرىق تەسىك ەكەن. جاڭبىر جاۋسا, ەدەنىنە سۋ تامشىلاي جونەلەدى جانە ونىڭ تەرەزەسى دە جابىلمايدى. ال كۇننىڭ سۋىعىندا ءىشىن جىلىتاتىن پەشى دە جوق. «كەيبىر وقۋشىلار اۆتوبۋستا باسىن سوعىپ الىپ جاتادى. اۆتوبۋس وتە سۋىق. وتىراتىن ورىندىقتارى دا تەسىك»,-دەيدى وقۋشى ۆالەنتينا پەتراكوۆا.
بۇل اۋىلدا باستاۋىش مەكتەپ بار كورىنەدى. ال 5 جانە 10 سىنىپتىڭ 18 وقۋشىسى كورشىلەس پريوزەرنىي ورتا مەكتەبىنە قاتىناپ وقيدى. 12 شاقىرىمدىق جەرگە جەتكەنشە ابدەن ىعىرىمىز شىعادى, كەيدە ساباقتان كەشىگىپ قالامىز دەيدى ولار. جولدىڭ ساپاسى دا سىن كوتەرمەيدى. «استىق جيناۋ ناۋقانى بىتكەن سوڭ, وقۋشىلاردىڭ كولىك ماسەلەسى شەشىلەدى. ول ءۇشىن سەرىكتەستىك باسشىلارىمەن كەلىسسوز جۇرگىزۋدەمىز»,-دەيدى ى. التىنسارين اۋدانى اكىمىنىڭ ورىنباسارى ءسابيت قازىباەۆ.
باقىتبەك كەنەش ۇلى.