ەقىۇ پارلامەنتتىك اسسامبلەياسىنىڭ پرەزيدەنتى جواو سوارەش قازاقستان رەسپۋبليكاسى پارلامەنتى سەناتىنىڭ دەپۋتاتى, ەقىۇ پا مۇشەسى ءادىل احمەتوۆتى ەقىۇ پارلامەنتتىك اسسامبلەياسى پرەزيدەنتىنىڭ قىرعىزستانداعى جاعدايدى بايقاۋ جونىندەگى ارناۋلى وكىلى ەتىپ تاعايىندادى, دەپ حابارلادى پارلامەنت سەناتىنىڭ ءباسپاسوز قىزمەتى.
ءا.احمەتوۆ ۇستىمىزدەگى جىلعى 10 ساۋىردە قىرعىزستان جانە حالىقارالىق ۇيىمدار وكىلدەرىمەن كەزدەسۋلەر وتكىزۋ ءۇشىن بىشكەككە بارادى.
سەناتور ءادىل احمەتوۆ قازاقستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى, ءبىزدىڭ ەلىمىزدىڭ ۇلىبريتانيا كورولدىگى مەن سولتۇستىك يرلاندياداعى توتەنشە جانە وكىلەتتى ەلشىسى بولدى, يرلانديا رەسپۋبليكاسىنداعى, نورۆەگيا كورولدىگى مەن شۆەتسيا كورولدىگىندەگى ەلشى قىزمەتىن قوسا اتقاردى.
2007 جىلعى تامىزدا پرەزيدەنت جارلىعىمەن ءا.احمەتوۆ پارلامەنت سەناتىنىڭ دەپۋتاتى بولىپ تاعايىندالدى, وسى كەزدە حالىقارالىق قاتىناستار, قورعانىس جانە قاۋىپسىزدىك كوميتەتىنىڭ حاتشىسى.
2009 جىلعى ماۋسىمنان باستاپ ەقىۇ-نىڭ ءىس باسىنداعى توراعاسىنىڭ مۇسىلماندارعا قاتىستى توزبەۋشىلىك جانە كەمسىتۋشىلىكپەن كۇرەس جونىندەگى جەكە وكىلى قىزمەتىن قوسا اتقارادى.