سولتۇستىك قازاقستان وبلىسىنىڭ بەلسەندى ازاماتتارى بۇگىنگە دەيىن 22 ملن 850 مىڭ تەڭگە جيناپ, وعان 36 وكپەنى جاساندى جەلدەتۋ اپپاراتىن الىپ, اۋرۋحانالارعا تاراتتى. اتالعان اپپاراتتىڭ تاعى 24 داناسىنا تاپسىرىس بەردى. ءساتىن سالسا, الداعى 2-3 كۇندە ەلگە جەتكىزىلمەك.
«قىزىلجار» ورتالىق مەشىتىنىڭ باس يمامى كەنجەتاي قاجى بايكەمەل ۇلى جانە جەرگىلىكتى كاسىپكەرلەر ناعاشىباي بارلىباەۆ پەن سەرماعانبەت ورال ۇلى رەسپۋبليكالىق «زەكەت» قورىنىڭ وبلىستىق فيليالىنا ىسكەر ازاماتتار مەن قالىڭ كوپشىلىكتەن اقشا جيناپ, وبلىس اۋرۋحانالارىندا جامان ىندەتتىڭ كەسىرىنەن اۋا جەتپەي قينالىپ جاتقان ازاماتتارعا قولداۋ كورسەتۋ تۋرالى ورتاق شەشىمگە كەلگەن ەكەن. باستاماشىل توپقا وبلىستىق كاسىپكەرلەر وداعى پالاتاسىنىڭ توراعاسى ارمان سارىباەۆ تا قوسىلادى. جينالعان قارجىنىڭ قوزعالىسىن باقىلاۋدى دياس ەسىمدى ازامات ءوز موينىنا الادى. «الىستان اربالاعانشا, جاقىننان دوربالاۋدى» ۇيعارعان ولار اپپاراتتاردى جەدەل جەتكىزۋ ءۇشىن رەسەي قالالارىنان ىزدەيدى. بۇل جانى قينالىپ جاتقان سىرقاتتارعا دا سەپ.
ازىرگە وڭىردەگى اۋرۋحانالاردا 30 ناۋقاسقا ءبىر كوندەنساتوردان كەلەدى ەكەن. اۋرۋحاناعا العاش تۇسكەن ادامعا الدىمەن وسى اپپارات كەرەك. ال ءوجج اپپاراتى جان ساقتاۋ بولىمىندە جاعدايى وتە اۋىر ناۋقاستارعا عانا قولدانىلادى.
ازاماتتاردىڭ العاش رەت وتىرىپ, اقىلداسقاندارىنا ءالى تولىق اپتا اينالماسا دا, قازىردىڭ وزىندە 36 دانا 5 ليترلىك اپپاراتتى ەكاتەرينبۋرگتەن الدىرىپ, وبلىس اۋرۋحانالارىنا تاراتىپ ۇلگەردى. ارينە شەكارالاس وڭىرلەر بولسا دا ونى جەتكىزۋ وڭاي ەمەس. وسى جەردە رەسەيدە تۇراتىن قازاق ازاماتتارىنىڭ كومەك قولىن سوزىپ, قويمالاردان الىپ بەرگەنىن ايتا كەتۋ كەرەك. العاشقى پارتيامەن كەلگەن 36 اپپاراتتىڭ 20 داناسى وبلىستىق اۋرۋحاناعا, 10 داناسى بەسكول اۋداندىق اۋرۋحاناسىنا, سونداي-اق ءۋاليحانوۆ, اقجار, ەسىل, م.جۇماباەۆ, مامليۋت اۋداندارىنا تاراتىلدى. ءسويتىپ قورعا تۇسكەن 23 ملن تەڭگەنىڭ 15 ملن تەڭگەسى جۇمسالدى.
جىگىتتەر قالعان قارجىنى قالاي ءتيىمدى پايدالانۋ قاجەتتىگىن بىلمەك نيەتپەن وبلىستىق دەنساۋلىق ساقتاۋ باسقارماسىنىڭ باسشىسى قابدىراحمان ساقتاعانوۆپەن سويلەستى. باسقارما باسشىلىعىنا تاعايىندالعانىنا ءبىر اپتا وتپەسە دە ق.ساقتاعانوۆ باستاماشىل ازاماتتارعا تاعى دا وكپەنى جاساندى جەلدەتۋگە ارنالعان 24 اپپاراتتىڭ الىنعانى دۇرىس دەپ سانايتىنىن جەتكىزدى. ويتكەنى قازىر ءدارى-دارمەك جەتكىلىكتى, تەك وسى اپپاراتقا مۇقتاجدىق بار. سەرماعانبەت ورال ۇلى رەسەيدەگى تاۋار جىبەرۋشىگە حابارلاسىپ, اقشانى بۇگىن اۋداراتىندارىن ايتىپ, ەرتەڭ اپپاراتتاردى جىبەرۋگە كەلىستى. قازىرگى ىندەت كەزىندە وسى ىسپەتتى جەدەلدىك, ابجىلدىك قاجەت. بۇل ۋاقىتتا وبلىسقا بەلگىلى ازامات ناعاشىباي بارلىباەۆ ارىپتەستەرىنە, اۋدان اكىمدەرىنە «زەكەت» قورىنا اقشا اۋدارۋ كەرەگىن ۇزدىكسىز ءتۇسىندىرىپ جاتتى. «تۇسكەن قاراجات كوبەيسە, وسىنداي اپپاراتتاردىڭ تاعى بىرنەشەۋىن اپەرەتىن بولامىز. حالىقتى قۇتقارۋعا كومەكتەسپەسەك ازاماتتىعىمىز قانە؟», دەيدى ول.
بۇگىنگە دەيىن حالىققا كومەك قولىن سوزعانداردىڭ اراسىنان 1 ملن تەڭگەدەن قورعا اقشا اۋدارعان ازاماتتاردى اتاي كەتەتىن بولساق, «پەتەرفەلد اگرو» باسشىسى اسقار ماديەۆ, «مامبەتوۆ ي ك» باسشىسى ەركەبۇلان مامبەتوۆ, «يپ لەۆين» باسشىسى ۆلاديمير لەۆين, «جولداسباي اگرو» باسشىسى سۇيىندىك جولداسباەۆ, «اگروفيرما «مامليۋتسكايا» باسشىسى قايرات قادىرالين, «ەتالونرەگيون» باسشىسى مادەن جۇماعۇلوۆ, «گارد سەرۆيس» جشس, «كازمياسومولپرودۋكت» جشس, يپ احمۋدينوۆ جانە ت.ب. كاسىپورىنداردان بارلىعى 43 كاسىپكەر بار. قازىرگى كەزدە تاعى 25 وتتەگى كونتسەتراتورى مەن 73 دانا پۋلسوكسيمەترگە تاپسىرىس بەرىلدى.
سولتۇستىك قازاقستان وبلىسى