يسپانيا لا ليگاسىنىڭ 37-تۋر ماتچتارىنان كەيىن ەل چەمپيوناتىندا توپ جارعان كوماندا بەلگىلى بولدى. ءوز الاڭىندا «ۆيلياررەال» كلۋبىن قابىلداعان ءمادريدتىڭ «رەال» كومانداسى 2:1 ەسەبىمەن جەڭىسكە جەتىپ قانا قويماي, بىرىنشىلىك اياقتالۋىنا ءبىر تۋر قالعاندا يسپانيا چەمپيونى اتاندى.
بۇل كورولدىك كلۋبتىڭ تاريحتاعى 34-ءشى, باس باپكەر زيدان باسشىلىعىنداعى ەكىنشى جەڭىسى. «ۆيلياررەالعا» قارسى وتكەن كەزدەسۋدە «رەال» شابۋىلشىسى كاريم بەنزەما 29 جانە 77-مينۋتتا دۋبل اۆتورى اتاندى. ال قوناقتاردان 83-مينۋتتا ۆيسەنتە يبوررا ءبىر گولمەن جاۋاپ قايتاردى. «رەالدىڭ» بيىلعى ماۋسىمدا چەمپيون اتانۋى بەنزەمانىڭ كوپ ەڭبەگى ءسىڭدى. فرانتسيالىق فۋتبولشى ءبىر ماۋسىمدا 21 مارتە مەرگەندىگىمەن كوزگە تۇسسە, 8 مارتە ارىپتەستەرىنىڭ گول سوعۋىنا مۇمكىندىك جاسادى.
چەمپيوندىق باسەكەدە «رەالدىڭ» نەگىزگى قارسىلاسى سانالعان «بارسەلونا» «كامپ نوۋ» ستاديونىندا كۇتپەگەن جەردە «وساسۋنا» كلۋبىنان 2:1 ەسەبىمەن جەڭىلىپ قالدى. بۇل جەڭىلىستەن سوڭ سەتەن كومانداسى 79 ۇپايمەن 2-ورىندا قالىپ قويدى.
ەسكە سالا كەتەيىك, «رەال» كلۋبى سوڭعى رەت يسپانيا چەمپيوناتىندا 2016/2017 جىلعى ماۋسىمدا جەڭىسكە جەتكەن ەدى.