شاحماتتان حالىقارالىق Women’s Speed Chess Championship گران-پري ءتۋرنيرىنىڭ فينالىنا شىققان سپورتشىلار بەلگىلى بولدى.
ونلاين باسەكەنىڭ ءتورتىنشى كەزەڭىندەگى فينالعا رەسەيلىك الەكساندرا كوستەنيۋك پەن الەمنىڭ ءتورت دۇركىن چەمپيونى قىتايلىق حوۋ يفان شىقتى. ءوز كەزەگىندە كوستەنيۋك جارتىلاي فينالدا يران سپورتشىسى ساراسادات حادەمالشارەحتى 7,5:3,5 ەسەبىمەن جەڭسە, قىتايلىق شاحمات شەبەرى ۇندىستاندىق حامپي كونەرۋدەن 6:5 ناتيجەسىمەن باسىم ءتۇستى.
ءتۋرنيردىڭ جارتىلاي فينالىنا جولداما بەرۋشى باسەكەدە قانداسىمىز جانسايا ابدىمالىك فينالعا شىققان قىتايلىق حوۋ يفانمەن كەزدەسكەن بولاتىن. وتانداسىمىز قىتايلىق سپورتشىعا لايىقتى قارسىلىق كورسەتكەنىمەن, جەڭىسكە جەتە المادى. قورىتىندى ەسەپ – 7,5-3,5.
ايتا كەتەيىك, ءار گران-پري كەزەڭىنىڭ قاتىسۋشىلارى يەلەنگەن ورنىنا سايكەس ۇپاي جينايدى. ءتۋرنيردىڭ ءۇش كەزەڭى بويىنشا ەڭ كوپ ۇپاي جيناعان ەكى شاحماتشى سۋپەرفينالعا شىعادى.