اق جول, ارۋلار!

دزيۋدودان ايەلدەر اراسىندا جا­پونيانىڭ تەك ازياداعى عانا ەمەس, جەر-جاھانداعى ەڭ ۇزدىك قۇراما ەكە­نىنە ەشكىمنىڭ ءشۇباسى جوق. ولار 1993-2019 جىلدار ارالىعىندا وتكەن سا­رى قۇرلىقتىڭ باستى دوداسىندا 147 جۇلدە الدى. بۇل – تەڭدەسسىز ناتيجە! 20 مارتە جالاۋى جەلبىرەگەن بايراقتى باسەكەلەردە كۇنشىعىس ەلىنىڭ ءانۇرانى تەك ەكى مارتە عانا (1993,1999 جىلدارى) شىرقالمادى. تاعى بەسەۋىندە (1995, 1996, 1997, 2009, 2019) ءبىر نەمەسە ەكى التىندى عانا قاناعات تۇتتى. ال وزگە دودالاردا سول ەلدىڭ كەمىندە ءۇش-ءتورت بالۋانى جەڭىس تۇعىرىنىڭ ەڭ بيىك ساتىسىنا كوتەرىلدى. ال 2005, 2008 جانە 2017 جىلدارى جاپونيالىق بالۋان قىزدار التى بىردەي التىندى ولجالاپ, ايدى اسپانعا ءبىر-اق شىعار­عانىن جانكۇيەرلەر ۇمىتا قويما­سا كەرەك. وسىنداي وراسان زور تابىس­تىڭ ارقاسىندا جاپوندار ازيا چەمپيو­ناتىنىڭ جالپى ەسەبىندە 15 مارتە كوش باستادى. ودان بولەك, 2011-2017 جىلدار ارالىعىندا ۇلتتىق قۇراما­لار اراسىندا كوماندالىق سايىس­تار ۇيىمداستىرىلعان ەدى. سول باسەكە­لەر­دىڭ بارلىعى دا كۇنشىعىس ەلى دزيۋ­دو­شى­لارىنىڭ ايقىن جەڭىسىمەن اياقتالدى.

جاپونيادان بولەك, قىتاي مەن وڭتۇستىك كورەيا قۇرامالارىنىڭ دا قارقىنى كەرەمەت. العاشقىسى 1996, 1999 جانە 2009 جىلدارى وتكەن ازيا چەمپيوناتتارىنىڭ جالپى ەسەبىندە كوش باستاسا, ەكىنشىسى 1993 جانە 1995 جىلدارى شاشالارىنا شاڭ جۇقتىرعان جوق. سوڭعى 27 جىل ۋاقىت ارالىعىندا قىتايلار 102 جۇلدە السا, كورەيلەر 122 رەت ءدال سونداي قۇرمەتكە بولەندى. دەسەك تە وڭتۇستىك كورەيا بالۋاندارى­نا قاراعاندا قىتايلىق قىزداردىڭ ول­جا­لاعان التىندارى ءبىرشاما كوپ. جارىس كەستەسىندە ولاردىڭ ءوز قارسىلاستارىنان جوعارى تۇرۋىنىڭ دا سەبەبى سول.

جالپى, ايەلدەر اراسىندا وتكەن ازيا چەمپيوناتتارىندا بار-جوعى توعىز مەملەكەتتىڭ وكىلدەرىنە عانا التىن تۇعىرعا كوتەرىلۋ باقىتى بۇ­يىر­عان ەكەن. جوعارىدا اتالعان ءۇش مىقتىدان بولەك, موڭعوليا (9 التىن), سولتۇستىك كورەيا (9 التىن), قازاقستان (3 التىن), گونكونگ (1 التىن), تايپەي (1 التىن) جانە وزبەكستان (1 التىن) سىندى ساناۋلى عانا ەلدەردىڭ ءانۇراندارى ءتۇرلى جارىستاردا شىرقالدى.

قازاقستاننىڭ ايەلدەر قۇراماسى ازيا چەمپيوناتىندا 20 مارتە باق سىناپ, سونىڭ ۇشەۋىنەن قۇر قول قايتتى. اتاپ ايتساق, 1993 جىلى ماكاو, 1997 جىلى مانيلا جانە 1999 جىلى ۆەنچدجوۋدا وتكەن جارىستاردا جولىمىز بولمادى. ال وزگە جارىستاردا كەمىندە ءبىر مارتە بولسا دا تۋىمىز كوكتە جەلبىرەدى.

وزدەرىنىڭ العاشقى جۇلدەسىنە جەر­لەستەرمىز 1995 جىلى قول جەتكىزدى. ءۇندىستاننىڭ باس شاھارى – نيۋ-دەليدە وتكەن جارىستا ەۆگەنيا بوگۋ­نوۆا (72 كيلو) كۇمىس مەدال السا, ۆالەن­تينا كامسۋلەۆا (61 كيلو) مەن مان­شۇك داۋلەتكەرەەۆا (+72 كيلو) قولا­عا قول سوزدى. العاشقى التىننىڭ سىڭعىرىن  2009 جىلى ەستىدىك. تايپەيدە ۇيىمداستىرىلعان ءدۇبىرلى دودادا اسا اۋىر سالماقتا ايقاسقان گۇلجان يسا­نوۆا قارسىلاس شاق كەلتىرمەدى. نەگىزى اتالعان بالۋاننىڭ ونەرىنە تامسانباۋ مۇمكىن ەمەس. جوعارىدا اتالعان ال­تىننان بولەك, ازيا چەمپيوناتتارىندا گۇلجان تاعى ەكى كۇمىس پەن بەس قولا مەدالدى موينىندا جارقىراتتى. بارلىعى 8 جۇلدە!

وتانداستارىمىز ەڭ زور تابىسقا 2016 جىلى قول جەتكىزدى. تاشكەنتتە وتكەن بەلدەسۋلەردە ءتورت جۇلدە ولجالاپ, ءوز جانكۇيەرلەرىمىزدى ءبىر قۋانتقان ەدىك. ناقتىلاپ ايتساق, وتگونتسەتسەگ گالبادراح (48 كيلو) پەن ءماريام ورداباەۆا (63 كيلو) التىننان القا تاقسا, گۇلجان يسانوۆا (78 كيلو) فينالدا ۇتىلدى. ال كوماندالار اراسىنداعى باسەكەنى قازاقستان قۇراماسى ءۇشىنشى ورىنمەن قورىتىندىلادى. سونداي-اق 2007 جىلى ءال-كۋۆەيتتە ءتورت مارتە جالاۋىمىز جەلبىرەدى. جانار جانۇزىنوۆا (70 كيلو) ەكىنشى ورىن السا, ءماريام ورداباەۆا (63 كيلو), ساعات ابىكەەۆا (78 كيلو) جانە گۇلجان يسانوۆا ء(ابسوليۋتتى سالماق) ءۇشىنشى ساتىعا تابان تىرەدى.

سوڭعى ازيا چەمپيوناتى بىلتىر بىرىككەن اراب امىرلىكتەرىندە ءوتتى. ءال-فۋدجەيراداعى جارىستا وتگونتسەتسەگ گالبادراح (48 كيلو) كۇمىس مەدالدى موينىنا ىلسە, سەۆارا نىشانباەۆا (57 كيلو) قولا جۇلدەنى قورجىنعا سالدى.

اتالعان جارىستىڭ باس جۇلدەسىن قازاقستاننىڭ ءۇش دزيۋدوشىسى عانا ولجالاعانىن  جوعارىدا ايتتىق. كۇمىس مەدالدى توعىز جەرلەسىمىز يەلەندى. ولار – گۇلجان يسانوۆا (2012, 2016), وتگونتسەتسەگ گالبادراح (2017, 2019), ەۆ­گەنيا بوگۋنوۆا (1993), نۇرگۇل تاعاەۆا (2001), ۆارۆارا ماسياگينا (2003), ساعات ابىكەەۆا (2005) جانە جانار جان­ۇزىنوۆا (2007).

ازيا چەمپيوناتىنىڭ قولا جۇل­دەسى 17 بۇرىمدىعا بۇيىردى. گۇلجان يسانوۆا (2007, 2008, 2011, 2015, 2017) سول مەدالدى بەس مارتە يەلەنسە, شولپان قاليەۆا (2001, 2008), ساعات ابىكەەۆا (2004, 2007), ءماريام ورداباەۆا (2007, 2015) جانە لەناريا مەڭعازوۆا (2009, 2013) ەكى رەتتەن جەڭىس تۇعىرىنا كوتەرىلدى. ال ۆالەنتينا كامسۋلەۆا (1995), مانشۇك داۋلەتكەرەەۆا (1995), جانات نۇرتازينا (1996), ەۆگەنيا بوگۋنوۆا (1996), گۇلنار كوشەرباەۆا (2000), تاتيانا شيشكينا (2004), ۆارۆارا ماسياگينا (2004), قالجان تايجانوۆا (2005), جانار جانۇزىنوۆا (2008), زارينا الدىكوۆا (2009), زەرە بەكتاسقىزى (2017) جانە سەۆارا نىشانباەۆانىڭ (2019) ەنشىسىندە ءبىر-ءبىر قولا جۇلدەدەن بار. سونىمەن قاتار 2013 جانە 2016 جىلدارى ءبىزدىڭ قىزدار كوماندالىق سايىستا ءۇشىنشى ورىندى يەمدەنگەنىن قاپەرگە سالايىق.