جىل باسىنان سولتۇستىك قازاقستان پوليتسياسى يتتەردىڭ كومەگىمەن 602 قىلمىستى اشتى, ونىڭ 141 ەسىرتكى جانە پسيحوتروپتىق زاتتاردى تابۋ, 288-ءى ۇرلىق, 14-ءى توناۋ جانە 9 –ى ەسىرتكىنىڭ زاڭسىز اينالىمى جانە ت.ب.
جالپى, سولتۇستىك قازاقستان پوليتسياسىندا 21 قىزمەتتىك-ىزدەستىرۋ ءيتى بار: ونىڭ 11 نەمىس جانە 6 بەلگيالىق وۆچاركا, 3-ءۋى ورىس سپانيەلى, 1 لابرادور-رەتريۆەر. ولاردىڭ ءيىس سەزگىشتىگى ءىز كەسۋ, پاترۋلدەۋ, ودورولوگيالىق سايكەستەندىرۋ ء(يىس بويىنشا تانۋ), ەسىرتكى مەن جارعىش زاتتاردى ىزدەستىرۋدە قولدانىلادى.
قازىر ەسىرتكى بيزنەسىنە قارسى كۇرەستە قىزمەتتىك-ىزدەستىرۋ يتتەرى تاپتىرماس كومەكشىگە اينالدى. ءبىر جىلدان بەرى پوليتسەيلەر يتتەردى جاڭا سينتەتيكالىق ەسىرتكىلەردى ىزدەستىرۋگە ۇيرەتىپ كەلەدى. ەسىرتكى تۇرلەرىنىڭ قۇرامىنداعى نەگىزگى زاتتاردىڭ ءيىس يميتاتورلارى ساتىپ الىندى. ەندى يتتەر وسىمدىك تەكتەس ەسىرتكىلەرمەن قاتار, سينتەتيكالىق ءتۇرىن دە وڭاي انىقتاي الادى. جىل باسىنان سقو-دا «ديزاينەرلىك ۋدى» ساتۋمەن اينالىسقان «ۆەب-دۇكەندەردىڭ» ەكى ۇيىمداستىرۋشىلارى ۇستالدى. ۇستاۋ قىزمەتتىك-ىزدەستىرۋ يتتەرىنىڭ قاتىسۋىمەن ءوتتى.
جاقىندا ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى مەفەدروندى تاراتقان كۇدىكتىنىڭ ۇستالۋى تۋرالى ايتىپ بەردى. بۇل ەسىرتكى اسا قاۋىپتى سينتەتيكالىق ەسىرتكىگە جاتادى, ونى قولدانعاننان كەيىن اعزادا قىسقا مەرزىم ىشىندە ءشىرۋ ءۇردىسى باستالىپ, ادامنىڭ جۇيكە جۇيەسى بۇزىلادى. كۇدىكتىدەن الىنعان زاتتىڭ جالپى سالماعى شامامەن 40 گرامم. سقو-دا بۇعان دەيىن مۇنشا مەفەدرون الىنباعان. «ينسپەكتور-كينولوگ, پوليتسيا لەيتەنانتى بولات بەكماعامبەتوۆتىڭ جەتەكشىلىگىمەن لابرادور بەللا مىندەتىن جاقسى ورىنداپ شىقتى. پاتەردە ىزدەۋ جۇمىسىن جۇرگىزۋ كەزىندە ول جاسىرىن ورىندى انىقتاپ, سقو پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى 5 گرامنان اسا ەرەكشە ءيىسى بار اق ءتۇستى زات سالىنعان پوليمەرلىك پاكەتتى الىپ شىقتى. بۇگىنگى تاڭدا بەللا ەسىرتكىگە قارسى كۇرەسكەرلەردىڭ الدىڭعى قاتارداعى كومەكشىسى, ول ەسىرتكى جەلىسىن ىزدەۋ بويىنشا ءاربىر ءۇشىنشى جاعدايدا پايدالانىلادى», دەدى سقو پد كينولوگيالىق قىزمەت ورتالىعىنىڭ باستىعى, پوليتسيا مايورى سامات تولەباەۆ