حالىقارالىق وليمپيادا كوميتەتى (حوك) وزبەكستاندىق ەركىن كۇرەس شەبەرى ارتۋر تايمازوۆتان دوپينگ ەرەجەسىن بۇزعانى ءۇشىن 2012 جىلعى لوندون وليمپياداسىنداعى التىن مەدالىن كەرى قايتارىپ, باسقا سپورتشىعا بەرۋگە شەشىم شىعاردى.
40 جاستاعى تايمازوۆ كەزىندە ءوز ءداۋىرىنىڭ كۇرەس سپورتىنىڭ شوق-جۇلدىزدارىنىڭ ءبىرى بولدى. ايگىلى بالۋان 2000-2012 جىلدار ارالىعىندا وزبەكستان قۇراماسىنىڭ نامىسىن قورعادى. وسى ۋاقىت ىشىندە ول ءتورت وليمپيا ويىندارىندا باق سىناپ, سونىڭ ۇشەۋىندە تۇعىردىڭ ەڭ بيىك ساتىسىنان كورىندى. تەك 20 جاسىندا قاتىسقان سيدنەي وليمپياداسىندا عانا فينالدا ەسە جىبەرىپ, كۇمىس مەدالدى قاناعات تۇتقان.
120 كيلودا باق سىناعان تايمازوۆ لوندون وليمپياداسىنىڭ چەمپيونى اتانعان ەدى. الايدا جارىس كەزىندە الىنعان دوپينگ سىناماسى قايتا تەكسەرۋدەن وتكەن سوڭ سپورتشىنىڭ تىيىم سالىنعان پرەپاراتتى قولدانعانى بەلگىلى بولدى.
ايتا كەتەيىك, ارتۋر تايمازوۆ وسىمەن ەكىنشى وليمپيادا التىنىنان ايىرىلىپ وتىر. 2017 جىلى تايمازوۆتىڭ 2008 جىلى بەيجىڭ وليمپياداسىنداعى دوپينگ سىناماسى دا وڭ ناتيجە كورسەتىپ, وليمپيادا چەمپيونى دەگەن اتاعىنان ايىرىلعان بولاتىن. ەندى ونىڭ ەنشىسىندە وليمپيادانىڭ ءبىر التىن, ءبىر كۇمىس جۇلدەسى بار.