قازاقستاندىق ارالاس جەكپە-جەك شەبەرى جالعاس جۇماعۇلوۆ جەكسەنبى كۇنى الەمدەگى ەڭ تانىمال ۇيىم – UFC-دە العاشقى ايقاسىن وتكىزىپ, تورەشىلەردىڭ شەشىمى بويىنشا قارسىلاسىنا ەسە جىبەردى.
ءابۋ-دابي ء(باا) قالاسىنداعى «جاۋىنگەرلەر ارالىندا» وتكەن UFC 251 تۋرنيرىندە قانداسىمىز 24 جاستاعى برازيليالىق راۋليان پايۆامەن جۇدىرىقتاسىپ, ءۇش راۋندقا سوزىلعان جەكپە-جەكتە تورەشىلەر شەشىمى بويىنشا (29-28, 29-28, 29-28) جەڭىلىپ قالدى. ناتيجەگە قاراپ كەزدەسۋ وتانداسىمىز ءۇشىن اۋىر ءوتتى دەپ ايتا المايمىز. ءبىرىنشى راۋندتا راۋليان ايقاس تىزگىنىن قولىنا الىپ, ازداعان باسىمدىققا يە بولدى. دەسە دە ەكىنشى راۋندتى قانداسىمىز شيراق باستادى. العاشقى جانە سوڭعى مينۋتتاردا جالعاس قارسىلاسىن اۋىر سوققىنىڭ استىنا الدى. ءۇشىنشى بەس مينۋتتا دا جەرلەسىمىز جامان ونەر كورسەتكەن جوق ەدى. وكىنىشكە قاراي, جۇماعۇلوۆ ءۇشىن UFC ۇيىمىنداعى دەبيۋتتى كەزدەسۋى ءساتسىز باستالدى.
جالپى, جالعاستىڭ قارسىلاسىن جوعارى دەڭگەيدەگى مىقتى سپورتشى دەپ ايتا المايمىز. ويتكەنى اتالعان ۇيىمدا ءۇش ايقاس وتكىزگەن پايۆا ءبىر رەت جەڭىسكە جەتىپ, ەكەۋىندە جەڭىلىستىڭ كەرمەك ءدامىن تاتقان.