اقمولا جانە قوستاناي وبلىستارىندا اراقتان ۋلانىپ قايتىس بولعانداردىڭ سانى 25 كە جەتتى, - دەپ حابارلايدى Egemen.kz. بۇل تۋرالى Qazaqstan.tv مالىمدەدى.
اقمولا وبلىسىندا اششى سۋدان 12 ادام ءتىل تارتپاي كەتتى. ولار اتباسار جانە جاقسى اۋداندارىنىڭ تۇرعىندارى. تاعى 6 ادام اۋرۋحانادا جاتىر. تەكسەرىس بارىسىندا قۇرامىندا ءسپيرتى بار ىشىمدىك اتباساردا ازىرلەنگەنى بەلگىلى بولدى. قاۋىپتى ىشىمدىكتى دايىنداپ, ساتقان 3 كۇدىكتى قولعا ءتۇستى. ولار پەتروپاۆل قالاسىنان 5 توننا سپيرت ساتىپ الىپ, ونى باسقا دا سۇيىقتىقتارمەن ارالاستىرىپ, 5 ليترلىك قۇتىلاردا ساۋدالاعان. ونىڭ قۇرامىنداعى مەتانول زاتى قالىپتى كورسەتكىشتەن 20 ەسە كوپ ەكەنى انىقتالدى.
بۇل سۇيىقتىق ادام دەنساۋلىعىنا وتە قاۋىپتى. سوندىقتان ونى تۇتىنۋعا بولمايدى. قازىرگى ۋاقىتتا بەلگىسىز سۋسىندى ساۋدا اينالىمىنان الۋ باعىتىندا جۇمىستار ءجۇرىپ جاتىر. وبلىس بويىنشا تاراپ كەتۋى ابدەن مۇمكىن. پوليتسيا دەپارتامەنتىنىڭ ماماندارى جۇمىلدىرىلعان. سپيرت قوسىلعان سۋسىن زاڭسىز ساۋدالانادى. سوندىقتان تۇرعىنداردى ساق بولۋعا شاقىرامىن, - دەيدى وبلىستىق تاۋارلار مەن كورسەتىلەتىن قىزمەتتەر ساپاسىن باقىلاۋ دەپارتامەنتىنىڭ باسشىسى ايناگۇل مۋسينا.
ارقالىقتا دا اراقتىڭ كەسىرىنەن 13 ادام ءولىم قۇشتى. ۇشەۋى اۋرۋحانادا جاتىر. بىرەۋىنىڭ جاعدايى اسا اۋىر. ناۋقاس جان ساقتاۋ بولىمىندە جاساندى تىنىس الۋ قۇرىلعىسىمەن جاتىر. قازىر وڭىردە ادام ولىمىنە اكەپ سوقتىرعان ىشىمدىكتى تاركىلەۋ بويىنشا جۇمىس ءجۇرىپ جاتىر. الايدا, ماماندار ىشىمدىكتىڭ كوپ بولىگى ساتىلىپ كەتۋى مۇمكىن دەيدى. قازىر سوتقا دەيىنگى تەرگەۋ امالدارى باستالعان.