قازاقستاندىق ۆولەيبول سپورتىنىڭ شەبەرى ءسابينا التىنبەكوۆا يتاليانىڭ ا1 ليگاسىندا باق سىنايتىن «ۆولالتو كازەرتا» كلۋبىمەن 2 جىلدىق كەلىسىمشارت جاساستى.
23 جاستاعى وتانداسىمىز وسىدان التى جىل بۇرىن جوعارى ويىن مانەرىمەن جانە ءوز سۇلۋلىعىمەن ازيا قۇرلىعىن تامساندىرعان بولاتىن. 2014 جىلى تايپەيدە وتكەن جاسوسپىرىمدەر اراسىنداعى ۆولەيبولدان 17-ءشى ازيا چەمپيوناتىندا قانداسىمىزدى جەرگىلىكتى باق ءتۋرنيردىڭ ەڭ سۇلۋ سپورتشىسى دەپ تانىدى. سول-اق ەكەن تايۆان, جاپونيا جانە تاعى باسقا ازيا ەلدەرىنىڭ تەلەارنالارى ءسابينا التىنبەكوۆا تۋرالى ارنايى رەپورتاج جاساپ, ءاپ-ساتتە بۇكىل الەمگە تانىمال بولدى. سول جىلى قازاقستان جاسوسپىرىمدەر قۇراماسى ازيا بىرىنشىلىگىندە 6-ورىن الدى.
وسى چەمپيوناتتان باستاپ التىنبەكوۆانىڭ جۇلدىزى جاندى دەسەك, ارتىق ايتقاندىق ەمەس شىعار. 2015 جىلى ول جاپونيانىڭ «GSS Sunbeams» كومانداسىندا ءبىر جىل ونەر كورسەتىپ, كەيىننەن ەلگە ورالدى. 2016-2019 جىلدار ارالىعىندا التىنبەكوۆا «الماتى» كلۋبىندا ويناسا, بىلتىر ءباا-ءنىڭ
«Al wasl» كومانداسىنىڭ نامىسىن قورعادى. ەندى مىنە, كۇنى كەشە كارىقۇرلىقتى باعىندىردى. الداعى ەكى جىلدا وتانداسىمىز يتاليا چەمپيوناتىندا باق سىنايدى.