ايگىلى Gambling.com باسىلىمى قازاقستاندىق بوكسشى گەننادي گولوۆكين مەن مەكسيكالىق ساۋل «كانەلو» الۆارەستىڭ تەكەتىرەسىن سپورت تاريحىنداعى 101 ۇزدىك جەكپە-جەكتىڭ قاتارىنا قوستى.
باسىلىم نۇسقاسى بويىنشا گولوۆكين مەن الۆارەستىڭ باسەكەلەستىگى رەيتينگتىڭ 91-ورنىنا ورنالاسقان. ورتا سالماقتاعى ەكى ۇزدىك بوكسشىنىڭ تەكەتىرەسى ۇزاق ۋاقىت جارنامالانىپ, 2017 جىلدىڭ قىركۇيەگىندە باستالدى. ءبىرىنشى ايقاسقا دەيىن وتانداسىمىز كاسىپقوي شارشى الاڭدا 37 جەكپە-جەك وتكىزىپ, ونىڭ 33-ءىن نوكاۋتپەن اياقتاعان ەدى. ال «كانەلو» فلويد مەيۆەزەردەن جەڭىلگەنىنە قاراماستان, سول كەزدە سپورتتا ەندى جۇلدىزى جانا باستاعان-دى.
ەكى بوكسشىنىڭ بۇگىنگى كۇنگە دەيىن جالعاسىپ كەلە جاتقان تەكەتىرەسىنە العاشقى ەكى جەكپە-جەك سەبەپ بولدى دەپ ايتا الامىز. 2017 جىلى ۇيىمداستىرىلعان ءبىرىنشى كەزدەسۋدە گولوۆكين مەكسيكالىق قارسىلاسىنان 12 راۋندتىڭ 10-ىندا باسىم تۇسكەنىمەن, تورەشىلەردىڭ شەشىمىمەن ايقاس تەڭ اياقتالدى. ءبىر جىلدان كەيىن ماتچ-رەۆانش بولىپ, بۇل جولى الۆارەس جەڭىسكە جەتتى. جەكپە-جەكتىڭ ءادىل وتپەگەنىنە نارازى بولعان جانكۇيەرلەر ەكى بوكسشىنىڭ ءۇشىنشى رەت جۇدىرىقتاسقانىن قالايدى. قازىرگى تاڭدا تاراپتار ءۇشىنشى جەكپە-جەكتىڭ قاشان وتەتىنىن تالقىلاپ جاتىر.