وتكەن تاۋلىكتە ەلىمىزدە 1406 ادامنىڭ بويىنان جامان ىندەت تابىلعان بولسا, سونىڭ 417-ءسى سولتۇستىك قازاقستان وڭىرىنەن بولىپ وتىر. بۇل ءوڭىر ءۇشىن وتە الاڭداتارلىق جاعداي. ويتكەنى ءبىر كەزدە ىندەتتىڭ تارالىمى ەڭ از بولىپ, ىندەتتى قۇرىقتادىق دەگەن وبلىستا قازىر رەسپۋبليكالىق كورسەتكىشتىڭ ۇشتەن بىرگە جۋىعى تيەسىلى.
وڭىردەگى سوڭعى تاۋلىكتەگى ءوسىم 5,5 پايىزعا جەتتى. كورسەتكىش كورشىلەس قوستاناي, اقمولا, پاۆلودار وبلىستارىنان دا استى. ناقتى ايتساق, قوستاناي وبلىسىنداعى ءوسىم – 4,4 اقمولا وبلىسىندا – 4,0 ال پاۆلوداردا 1,2 پايىز بولعان.
ەگەر جامان ىندەتكە قارسى باسقا دا مالىمەتتەردى ايتا كەتەتىن بولساق, وبلىستا ءتاۋىر بولعانداردىڭ جالپى سانى – 386 ادام. ىندەت باستالعاننان بەرى قايتىس بولعاندار 13 ادامعا جەتتى.
وبلىس حالقى تارتىپكە ءبىرشاما مويىنسۇنعانىمەن, جاعدايدىڭ وسىلاي كۇردەلەنىپ بارا جاتقانى ەرەكشە ساقتاندىرۋ شارالارىن قابىلداۋدى قاجەت ەتەدى. قازىر شەكارالىق بەكەتتەردەن وتۋشىلەردى قاتاڭ باقىلاۋعا الۋ قولعا الىندى. وتكەن سەنبى-جەكسەنبى كۇندەرى وبلىستىڭ باس سانيتارلىق دارىگەرى سەرىكباي قاسماقاسوۆ پەتروپاۆل قالاسى بويىنشا كارانتين جاريالاپ, بارلىق قوعامدىق ورىندار, ونىڭ ىشىندە گيپەرماركەتتەر مەن سۋپەرماركەتتەر, بازارلار, كوڭىل كوتەرەتىن قوعامدىق ورىندار, سپورت الاڭدارى تۇگەل جابىلدى. قوعامدىق كولىكتەردىڭ جۇرۋىنە تىيىم سالىندى. بارلىق ءدامحانالار مەن مەيرامحانالاردىڭ جۇمىسىنا شەكتەۋ قويىلدى. الايدا وسى شارانىڭ ناتيجەسى تۋرالى وبلىستىق دەنساۋلىق ساقتاۋ ورىندارى ەشقانداي دەرەكتەر ايتپاي وتىر. ويتكەنى ەندى كۆي-گە بايلانىستى بارلىق اقپاراتتار ورتالىقتاندىرىلىپ, رەسمي تۇردە دەنساۋلىق ساقتاۋ مينيسترلىگىنەن ورتالىق كوممۋنيكاتسيالار قىزمەتى ارقىلى تاراتىلادى. بارلىق ايماقتىق بريفينگتەر توقتاتىلدى. بالكىم, وسىنىڭ ءوزى دۇرىس شىعار. ويتكەنى ەشكىم ەشتەڭە بىلمەسە دە سان-ساققا جۇگىرتىپ, بىلگەندەرىن ايتا بەرۋشىلەر كوبەيىپ كەتتى. حالىق كىمگە سەنەرىن دە بىلمەي قالدى. ال ءبىر ورتالىقتان رەسمي اقپارات تاراپ وتىرسا – بىلگىسى كەلەتىن تۇرعىندار ونى ارناۋلى coronavirus2020.kz ارقىلى الا الادى. سوندىقتان جامان ىندەتتىڭ بارىسى, ەرەكشەلىكتەرى تۋرالى قازىر ءوز پىكىرلەرىن ايتۋدان ماماندار ات-تونىن الا قاشىپ وتىر.
سولتۇستىكتە انىقتالعان بارلىق دەرتتى ادامداردىڭ جارتىسىنا جۋىعىندا سىرتقى بەلگىلەرى جوق, ياعني سيمپتومسىز. ەگەر بارلىق دەرتتى ادامدار سانى 783 بولسا سونىڭ 356-سى سيمپتومسىز بولىپ وتىر. بۇل اتى جامان ىندەت بەلگىلەرى كورىنبەي, تەك وزدەرى تاسىمالداۋشى بولىپ تابىلاتىن ناۋقاستار ارقىلى تارالىپ جاتقانىن كورسەتەدى. 2020 جىلى 29 ماۋسىمداعى رەسپۋبليكاداعى جاعداي بويىنشا, ناۋقاستاردىڭ ءبىر تاۋلىكتەگى ءوسىمى 1003 بولسا سونىڭ ىشىندە سولتۇستىك ءوڭىردىڭ ۇلەسىندەگىلەر 99 بولعان. كورشىلەس قوستانايدا – 15, پاۆلوداردا 7 سىرقات قانا بولعاندا, سولتۇستىك قازاقستانداعى ساننىڭ ايرىقشا سيپات الۋى ويلانتادى.
سولتۇستىك قازاقستان وبلىسى