كوروناۆيرۋس پاندەمياسىنا بايلانىستى ۋاقىتشا توقتاتىلعان فۋتبولدان قازاقستان چەمپيوناتى 1 شىلدەدەن باستاپ قايتا جالعاساتىن بولدى.
ەل بىرىنشىلىگى وزگە ەلدەردەگىدەي كورەرمەنسىز وتەدى جانە جارىس كەزىندە قىزمەت ەتەتىن ادامداردىڭ سانى شەكتەۋلى بولادى. سونىمەن قاتار قازاقستان كاسىپقوي فۋتبول ليگاسى كوماندالارعا سانيتاريا تالاپتارىن قاتاڭ ساقتاۋدى مىندەتتەگەن.
پاندەمياعا بايلانىستى ۋاقىتشا ءۇزىلىس كەزىندە پاۆلوداردىڭ «ەرتىس» كومانداسى قارجىلىق جاعدايعا بايلانىستى چەمپيوناتتى جالعاستىرا المايتىن بولعان سوڭ, ۇيىمداستىرۋشىلار ماتچ كۇنتىزبەسىن قايتا جاساقتاپ شىقتى. ەرەجەگە ساي, ءار تۋر بەس ويىننان تۇرادى جانە كوماندالار كەزەكتەسىپ ءبىر تۋرعا قاتىسپايدى. وسىلايشا ءتۋرنيردى 11 كوماندا جالعاستىراتىن بولدى.
ەل چەمپيوناتىنىڭ ءۇشىنشى تۋرىندا «توبىل» – «كاسپي», «قايسار» – «تاراز», «قىزىلجار» – «وقجەتپەس», «قايرات» – «جەتىسۋ» جانە «ورداباسى» – شاحتەر» كوماندالارى وينايدى. جوعارىدا ايتىپ وتكەندەي, بۇل تۋردا «استانا» فۋتبولشىلارىنا دەمالىس بەرىلگەن. ال ءبىرىنشى جانە ەكىنشى ليگا كوماندالارى اراسىنداعى بىرىنشىلىك جانە قازاقستان كۋبوگى 1 تامىزدا باستالادى.