جىل سايىن ءداستۇرلى تۇردە ۇيىمداستىرىلاتىن شايبالى حوككەيدەن پرەزيدەنت كۋبوگى ءتۋرنيرى بيىل 7 تامىزدا باستالادى.
11-مارتە جالاۋى جەلبىرەيتىن بايراقتى باسەكەگە قاتىسۋعا 4 كوماندا ءوتىنىش بەرگەن. قۇرلىقتىق حوككەي ليگاسىنا دايىندىق ىسپەتتى تۋرنيردە «بارىس» (نۇر-سۇلتان), «لوكوموتيۆ» (ياروسلاۆل), «دينامو» (مينسك) جانە وڭتۇستىك كورەيا قۇراماسى باس جۇلدەنى ساراپقا سالادى. قحل-ءدىڭ وتكەن ماۋسىمىندا «لوكوموتيۆ» گاگارين كۋبوگىنىڭ پلەي-وفف ساتىسىنا دەيىن جەتكەن بولسا, مينسكىنىڭ «دينامو» كلۋبى 24-ورىندى يەلەنگەن بولاتىن. وڭتۇستىك كورەيا قۇراماسى دا قازاق جانكۇيەرلەرىنە تاڭسىق ەمەس. بىلتىر ەكى ەلدىڭ ۇلتتىق قۇرامالارى جولداستىق ماتچ وتكىزىپ, جەرلەستەرىمىز ءىرى ەسەپپەن باسىم تۇسكەن-ءدى.
2010 جىلدان بەرى وتكىزىلىپ كەلە جاتقان پرەزيدەنت كۋبوگى باسەكەسىندە ەلوردانىڭ «بارىس» كومانداسى بەس مارتە توپ جارعان. ال سانكت-پەتەربۋرگتىڭ سكا, ومبىنىڭ «اۆانگارد», نوۆوكۋزنەتسكىنىڭ «مەتاللۋرگ», نيجنەكامسكىنىڭ «نەفتەحيميك» جانە حاباروۆسكىنىڭ «امۋر» كلۋبتارى ءبىر رەتتەن جارىس جەڭىمپازى اتانعان. بىلتىرعى تۋرنيردە «بارىس» كومانداسى جەڭىسكە جەتكەن ەدى.