قازاقستانداعى دوللارمەن سالىنعان دەپوزيتتەردىڭ كولەمى ءبىر جىلدا 5 پايىزعا دەيىن تومەندەدى. بۇل تۋرالى ۇلتتىق بانك توراعاسىنىڭ ورىنباسارى اقىلجان بايماعامبەتوۆ ايتتى.
– 2019 جىلى بانك جۇيەسىندەگى دەپوزيتتەر 2,5 پايىزعا كوبەيىپ, 19 ترلن تەڭگەگە جەتتى. بۇعان قوسا ۇلتتىق ۆاليۋتاداعى سالىمداردىڭ مولشەرى 13,1 پايىزعا ءوسىپ, 10,8 ترلن تەڭگە بولدى. بۇعان تەڭگەمەن بەرىلەتىن ستاۆكالاردىڭ جوعارىلىعى, سونىمەن بىرگە ايىرباس باعامىنىڭ تۇراقتىلىعى سەبەپ بولىپ وتىر. ال شەتەلدىك ۆاليۋتامەن جينالعان دەپوزيت مولشەرى 8,7 پايىزعا ازايىپ, 8,2 ترلن تەڭگەنى قۇرادى. سونىڭ ارقاسىندا دەپوزيتتەردىڭ دوللارلانۋى 43,1 پايىزعا تومەندەدى. ءبىر جىل بۇرىن بۇل باعىتتاعى كورسەتكىش 48,4 پايىز بولعان ەدى, – دەدى اقىلجان بايماعامبەتوۆ.
ۇلتتىق بانك توراعاسىنىڭ ورىنباسارى ەلدە ۇزاقمەرزىمدى نەسيەلەر 6,5 پايىزعا ءوسىپ, 11,8 ترلن تەڭگەگە جەتكەنىن, ال قىسقامەرزىمدى نەسيەلەر 2,7 پايىزدىق ءوسىمدى كورسەتىپ, 2 ترلن تەڭگەگە جەتكەنىن ايتتى.
ءبىر ايتا كەتەرلىگى, سوڭعى بەس جىلدا ەل ەكونوميكاسىنداعى بانكتەردىڭ ءرولى تومەندەپ بارا جاتقانى بايقالادى. مەملەكەت تاراپىنان قارجىلاي كومەك شارالارى جاسالعانىنا قاراماستان, ءىجو-دەگى بانكتەردىڭ اكتيۆتەرى 40 پايىزعا دەيىن كەمىگەن. كەرىسىنشە, پروبلەمالىق قارىزداردىڭ كولەمى ۇلعايىپ بارا جاتىر. بانكتەردىڭ تاراپىنان بيزنەس ءۇشىن قولجەتىمدى قاراجات ۇسىنۋ تەتىكتەرى جەتىلدىرۋدى قاجەت ەتەدى.