18 شىلدەدە الماتىدا MTK Global كومپانياسىنىڭ ۇيىمداستىرۋىمەن كاسىپقوي بوكس كەشى وتەتىنىن بۇعان دەيىن جازعان ەدىك. بۇگىندە سول كەشتە ونەر كورسەتەتىن ءتورت جۇپ انىقتالدى.
جالپى, الماتىداعى جەكپە-جەكتە تەك قازاقستاندىق بوكسشىلار جۇدىرىقتاسادى. ماسەلەن, باستى جەكپە-جەكتە شارشى الاڭدا ءالى ەشكىمنەن جەڭىلمەگەن قازاقتىڭ ەكى مىقتىسى – داۋرەن ەلەۋسىنوۆ پەن ارمان رىسبەك باق سىناسادى. ەكەۋىنىڭ دە اۋەسقويلار اراسىندا قول جەتكىزگەن تابىستارى ەلەۋلى. ءبىر قىزىعى, اۋەسقوي بوكستا ولار ءبىر-بىرىمەن ەكى جەكپە-جەك وتكىزىپ, ەكەۋى دە ءبىر-ءبىر مارتە جەڭىسكە جەتكەن.
سونداي-اق جۋىردا عانا كاسىپقوي بوكسقا اۋىسقان جاسوسپىرىمدەر اراسىنداعى وليمپيادانىڭ كۇمىس جۇلدەگەرى تالعات شايكەن كاسىپقوي بوكستا بەس جەكپە-جەك وتكىزىپ, بارلىعىن جەڭىسپەن اياقتاعان بەرىكباي نۇرىمبەتوۆپەن, ال ازيا چەمپيونى تۇرسىنباي قۇلاحمەت ساعادات راقمانقۇلمەن جۇدىرىقتاسادى. ساعادات بۇگىنگە دەيىن التى رەت شارشى الاڭعا شىعىپ, ءتورت رەت جەڭىسكە جەتىپ, ەكى رەت جەڭىلگەن.
ءتورتىنشى جۇپتا ساپارباي ايداروۆ پەن اباي تولەش كىم مىقتىنى انىقتايدى. ەكەۋى دە وتە تاجىريبەلى بوكسشىلار. اۋەسقوي بوكستا س.ايداروۆ 2013 جىلى 75 كيلودا ەل چەمپيونى اتانسا, ا.تولەش تە وسى سالماقتا 2017 جىلى توپ جارعان. كاسىپقوي رينگتە اباي بەس كەزدەسۋ وتكىزىپ, بارلىعىندا ۇستەمدىك تانىتتى. ساپارباي دا جەڭىلىستىڭ كەرمەك ءدامىن تاتقان ەمەس. ءتورت جەكپە-جەكتىڭ ەكەۋىندە ول قارسىلاسىن نوكاۋتقا جىبەردى.