قۇرلىقتىق حوككەي ليگاسىندا ونەر كورسەتەتىن «بارىس» كلۋبىنىڭ جاڭا باس باپكەرى تاعايىندالدى. الداعى ماۋسىمنان باستاپ ەلوردا ۇجىمىن قازاقستاندىق مامان يۋري ميحايليس جاتتىقتىراتىن بولدى.
51 جاستاعى قاراعاندى قالاسىنىڭ تۋماسى يۋ.ءميحايليستىڭ كلۋبپەن اراداعى كەلىسىمشارتى ءبىر جىلعا جاسالعان. باپكەرلىك مانسابىن 2007 جىلى باستاعان مامان 13 جىلدان بەرى «بارىس» جۇيەسىندە جۇمىس ىستەپ كەلەدى. وسى ۋاقىت ارالىعىندا ول «بارىس-2», «سنەجنىە بارسى» جانە «نوماد» كوماندالارىن جاتتىقتىرعان.
ءميحايليستىڭ باسشىلىعىمەن «نوماد» 2017 جىلى ەل چەمپيونى اتانىپ, 2017/18 جىلعى ماۋسىمدا قۇرلىقتىق كۋبوكتىڭ كۇمىس مەدالىن جەڭىپ العان-دى. ال وتكەن ماۋسىمدا ول «نوماد» كلۋبىمەن جوعارى حوككەي ليگاسىندا باق سىنادى. سونىمەن قاتار يۋري ءميحايليستىڭ قازاقستان قۇراما كوماندالارىمەن تابىستى جۇمىس تاجىريبەسى بار. اتاپ ايتار بولساق, ول 2018 جىلى «بارىس» جانە قازاقستان ۇلتتىق قۇراماسىندا عالىم مامبەتاليەۆتىڭ كومەكشىسى قىزمەتىن اتقارعان.