قازاقستانداعى جاس دارىندى بوكسشىنىڭ ءبىرى بەك نۇرماعانبەت كاسىپقوي رينگتە باق سىناۋدى قۇپ كوردى. بۇل تۋرالى بىلعارى قولعاپ شەبەرىنىڭ ءوزى الەۋمەتتىك جەلىدەگى پاراقشاسىندا جاريالادى.
22 جاستاعى تۇركىستان بوكس مەكتەبىنىڭ تۇلەگى 2016 جىلى رەسەيدىڭ ەكاتەرينبۋرگ قالاسىندا وتكەن جاستار اراسىنداعى الەم چەمپيوناتىنىڭ كۇمىس جۇلدەگەرى, ەرەسەكتەر اراسىندا تايلاندتا جالاۋى جەلبىرەگەن ازيا چەمپيوناتىندا توپ جارعان بولاتىن. 2017 جىلى نۇر-سۇلتاندا وتكەن پرەزيدەنت كۋبوگى جولىنداعى جارىستا توپ جارسا, كەلەسى جىلى كۇمىس جۇلدەگەر اتاندى. سونداي-اق بەك نۇرماعانبەت بىرنەشە حالىقارالىق ءتۋرنيردىڭ جۇلدەگەرى سانالادى.
2018 جىلى اقتاۋ قالاسىندا ۇيىمداستىرىلعان بوكستان ەل بىرىنشىلىگىندە 81 كيلو سالماقتا جەڭىمپاز اتانىپ, بىردەن ۇلتتىق قۇراما باپكەرلەرىنىڭ كوزىنە ءتۇسىپ, ءوز سالماعىندا قازاقستاننىڭ ءبىرىنشى ءنومىرلى بوكسشىسى اتاندى. الايدا بىلتىر جاراقاتىنا بايلانىستى الەم چەمپيوناتىنا بارا الماعان سوڭ, ونىڭ ورىنىنا بەكزات نۇرداۋلەتوۆ جاھاندىق دودادا سىنعا ءتۇستى. رەسەي تورىندە وتكەن بىرىنشىلىكتە بەكزاتتىڭ جاسىنداي جارقىلداعانىنا تەك قازاقستان ەمەس, بۇكىل الەم كۋا بولدى. جارتىلاي فينالدا كۋبالىق لا كرۋزدى, فينالدا وزبەك دىلشودبەك رۋزمەتوۆتى جەڭىپ قانا قويماي, قۇرامداعى ورنىن ناقتىلاپ قويدى. سول جەڭىسىنىڭ ارقاسىندا نۇرداۋلەتوۆ بيىل اممانداعى وليمپياداعا ىرىكتەۋگە بارىپ, توكيوعا جولداما الدى. وسىلايشا, بەكتىڭ وليمپيا ويىندارىنا بارامىن دەگەن ارمانى تاعى 4 جىلعا شەگەرىلگەن سوڭ ول بىردەن باعىن كاسىپقوي بوكستا سىناپ كورۋگە بەل بۋدى.
قازىرگى تاڭدا «Suleimen promotions» كومپانياسىمەن ەكىنشى ورتا سالماقتاعى WBA International, WBO Global جانە WBC Asian بەلدىگىنىڭ يەگەرى ايدوس ەربوسىن ۇلى مەن جارتىلاي ورتا سالماقتاعى WBA intercontinental, WBO oriental جانە IBF Australasia بەلدىگى بار نۇرسۇلتان جاڭباەۆ سىندى بوكسشىلار جۇمىس ىستەيدى.