بۇگىندە جامبىل وبلىسىندا ۆەتەريناريالىق ءىس-شارالاردى 11 كوممۋنالدىق مەملەكەتتىك كاسىپورىندار اتقارادى. مەكەمەلەردىڭ قۇرامىندا 160 ۆەتەريناريالىق پۋنكتتەر بار.
بۇل مەكەمەلەردە ارنايى ورتا جانە جوعارى ءبىلىمدى 844 ۆەتەرينار ماماندار جۇمىس ىستەيدى. اعىمداعى جىلى مەملەكەتتىك تاپسىرىسقا سايكەس, جانۋارلاردىڭ اسا قاۋىپتى 14 ءتۇرلى اۋرۋىنا قارسى ۆاكتسينا ەگۋ, 2 اۋرۋدىڭ ءتۇرى بويىنشا اللەرگيالىق تەكسەرۋ جانە مال اراسىنان 25 ءتۇرلى جۇقپالى اۋرۋلاردى انىقتاۋ بويىنشا دياگنوستيكالىق ءىس-شارالار جوسپار بويىنشا ورىندالۋدا. قاجەتتى بارلىق ۆەتەريناريالىق پرەپاراتتار الىنىپ, اۋداندارداعى ۋاقىتشا ساقتاۋ ورىندارىنا جەتكىزىلگەن. اۋداندارداعى ۆەتەريناريالىق كاسىپورىنداردا پرەپاراتتاردى ۋاقىتشا ساقتايتىن قويمالار دا بار. دياگنوستيكالىق زەرتتەۋلەرگە جۇرگىزىلگەن تالداۋ بويىنشا مالدار اراسىندا سوزىلمالى برۋتسەللەز اۋرۋىنا شالدىعۋ جىلدان جىلعا تومەندەۋدە.
دەي تۇرعانمەن, جاز مەزگىلى كەلە سالىسىمەن كەنەگە قارسى جۇمىستار قىزا تۇسەدى. «كونگو-قىرىم گەمورراگيالىق قىزباسىنىڭ تابيعي وشاعىندا ورنالاسقان تاراز قالاسى جانە بايزاق, جامبىل, تالاس, مويىنقۇم, سارىسۋ اۋداندارىنىڭ ەلدىمەكەندەرىندە اۋرۋدىڭ الدىن الۋ شارالارى جۇيەلى تۇردە جىل سايىن جۇرگىزىلەدى. جىل سايىن وبلىس اكىمدىگىنىڭ القا وتىرىسىندا اتالعان اۋرۋ بويىنشا ەپيزووتيالىق جانە ەپيدەميولوگيالىق جاعداي قارالىپ, وبلىس اكىمىنىڭ قاۋلىسىمەن تابيعي وشاقتا اتقارىلاتىن ءىس-شارالار جوسپارى بەكىتىلەدى. كەنەگە قارسى ءىس-شارالار جىل باسىندا الدىن الا جوسپارلانعان جوسپارعا سايكەس جانە تابيعي ورتاداعى كەنەنىڭ بەلسەندىلىگىنە قاراي كوكتەم مەزگىلىندە ەكى كەزەڭدە, كۇز مەزگىلىندە ءبىر رەت جۇرگىزىلەدى. بيىلعى جىلى وبلىس اۋماعىندا بايزاق اۋدانىندا 4, جامبىلدا 2, مويىنقۇمدا 12, تالاستا 8, سارىسۋدا 18 جانە تاراز قالاسىندا 5, بارلىعى 49 ەلدىمەكەنگە زالالسىزداندىرۋ جۇمىستارى جۇرگىزىلۋدە», دەيدى جامبىل وبلىستىق ۆەتەريناريا باسقارماسى باسشىسىنىڭ مىندەتىن اتقارۋشى قاناتبەك قارتاباەۆ.
اعىمداعى جىلى وبلىستىق بيۋدجەتتەن كەشەندى ءىس-شارالاردى وتكىزۋگە ارنالعان كەنەگە قارسى دەزينفەكتسيالىق ءدارى-دارمەكتەر ساتىپ الۋعا 78 ميلليون 484 مىڭ تەڭگە قاراجات بولىنگەن. مالدار مەن مال قورالارىن دەزينفەكتسيالىق دارىلەۋ جۇمىستارىن جۇرگىزۋ ءۇشىن جەرگىلىكتى بيۋدجەتتەن 57 ميلليون 270 مىڭ تەڭگە بولىنگەن. بۇگىندە كوكتەمگى ءبىرىنشى كەزەڭنىڭ جۇمىستارى ەندەميالىق اۋدانداردا تولىق اياقتالعان. ناتيجەسىندە, كولەمى 4 403 610 شارشى مەتر بولاتىن 16228 قورا-جاي جانە كولەمى 232 089 شارشى مەتر بولاتىن 273 بۋفەرلىك ايماق زالالسىزداندىرىلىپ, بارلىعى 556448 باس اۋىل شارۋاشىلىعى جانۋارلارى كەنەگە قارسى دارىلەنگەن. قازىرگى تاڭدا, ەكىنشى كەزەڭىنىڭ جۇمىستارى جۇرگىزىلۋدە ەكەن. «تابيعي وشاقتاعى ەپيزووتيالىق-ەپيدەميولوگيالىق جاعدايدى تۇراقتى تۇردە ۇستاپ, اۋرۋ دەڭگەيىن تومەندەتۋ شارالارىن جۇرگىزۋدە ۆەتەريناريا جانە مەديتسينا, جەرگىلىكتى اكىمشىلىكتەردىڭ قىزمەتكەرلەرىمەن بىرگە تۇرعىنداردىڭ دا ءوز ۇلەستەرىن قوسۋى ارقىلى ءىس-شارالارعا وڭ سەپتىگىن تيگىزۋدە. وبلىستىڭ مەكەمەلەرىمەن تۇرعىندار اراسىندا سانيتارلىق اعارتۋ جۇمىستارى تۇراقتى تۇردە جۇرگىزىلۋدە», - دەيدى قاناتبەك قارتاباەۆ.
جامبىل وبلىسى