شايبالى حوككەي تۋرالى جازاتىن ايگىلى ەۋروپالىق Hockeyarchives.info باسىلىمى وسى ماۋسىمدا ءتاۋىر ونەر كورسەتكەن ەۋروپانىڭ ەڭ ۇزدىك 250 كومانداسىنىڭ رەيتينگىن جاساپ شىقتى.
قۇرلىقتىق حوككەي ليگاسىندا (قحل) باق سىنايتىن ەلوردانىڭ «بارىس» كلۋبى بىرىنشىلىكتىڭ بيىلعى ماۋسىمىندا شىعىس كونفەرەنتسياسىندا ەكىنشى ورىنعا تۇراقتاپ, چەرنىشەۆ ديۆيزيوندا توپ جاردى. سونىمەن قاتار گاگارين كۋبوگىنىڭ شيرەك فينالىنا دەيىن جەتكەن ەدى. وسىنداي ايتۋلى جەتىستىگىنەن كەيىن جەرلەستەرىمىز ەۋروپالىق باسىلىمنىڭ رەيتينگىندە 9-ورىننان كورىندى. وتكەن جىلمەن سالىستىرعاندا «بارىس» ون ساتى جوعارىلاعان جانە توپ-10 كوماندانىڭ قاتارىنا كىرگەن تاريحتاعى العاشقى قازاقستان كلۋبى اتاندى.
«بارىستان» بولەك تىزىمدە قازاقستاندىق كوماندالاردان «سارىارقا» 171-ورىندا بولسا, «تورپەدو» – 181-ءشى, «ارلان» – 201-ءشى, «ەرتىس» – 216-شى, «الماتى» – 221-ءشى, «بەيبارىس» – 234-ءشى ساتىعا جايعاسقان. رەيتينگتىڭ كوشىن ماسكەۋدىڭ تسسكا كلۋبى باستاپ تۇر. ەكىنشى ورىندا شۆەتسيانىڭ «لۋلەو» كومانداسى بولسا, العاشقى ۇشتىكتى قازاننىڭ «اك بارس» كلۋبى تۇيىندەدى.