ەلىمىزدىڭ مەملەكەتتىك رامىزدەرى كۇنىنە وراي, تاراز قالاسىنداعى «جاستار» اللەياسىندا «ەلتاڭبام – ەلدىگىم, كوك تۋىم – تەڭدىگىم!» اتتى پاتريوتتىق اكتسياسى اياسىندا اۆتو-موتو-ۆەلوشەرۋ ۇيىمداستىرىلدى.
مەرەكەلىك شەرۋگە قاتىسۋشىلار «جاستار» اللەياسىنداعى «ساحنا» الاڭشاسىنان جەلتوقسان كوشەسىنە ءتۇسىپ, ودان ءارى تولە بي, جامبىل داڭعىلدارى ارقىلى د.قوناەۆ, س.سەيفۋللين, ب.مومىش ۇلى, تاۋكە حان كوشەلەرىمەن قازاقستان رەسپۋبليكاسىنىڭ تۇڭعىش پرەزيدەنتى ساياباعىنا دەيىنگى جولدى ءجۇرىپ ءوتتى. تۇڭعىش پرەزيدەنت ساياباعىندا «ەلتاڭبام – ەلدىگىم, كوك تۋىم – تەڭدىگىم!» اتتى اكتسيا جالعاسىن تاۋىپ, ءبىر مەزگىلدە مەملەكەتتىك گيمن ورىندالدى. اتالعان اكتسياعا جامبىل وبلىستىق توتەنشە جاعدايلار دەپارتامەنتى №2 ءورت ءسوندىرۋ ءبولىمىنىڭ, تاراز قالالىق پوليتسيا باسقارماسىنىڭ, «قازفوسفات» جاۋاپكەرشىلىگى شەكتەۋلى سەرىكتەستىگى «جاڭا جامبىل فوسفور زاۋىتى» مەكەمەسىنىڭ جانە وزگە دە مەكەمەلەردىڭ قىزمەتكەرلەرى قاتىستى. سونداي-اق, «قاسيەتتى كوكبايراعى ەلىمنىڭ!» اتتى اكتسياسى اياسىندا تاراز قالاسىنداعى كوپقاباتتى تۇرعىن ۇيلەردىڭ قاسبەتتەرىنە مەملەكەتتىك تۋ ءىلىندى.
سونىمەن قاتار مەملەكەتتىك رامىزدەر كۇنىنە وراي, تاراز مەملەكەتتىك پەداگوگيكالىق ۋنيۆەرسيتەتىنىڭ اۋلاسىندا «كوك تۋدىڭ جەلبىرەگەنى» اتتى پاتريوتتىق سالتاناتتى جيىن ءوتتى. ۋنيۆەرسيتەت رەكتورى ەرجان امىربەك ۇلى اتالعان وقۋ ورداسىنىڭ ۇجىمىن جانە ستۋدەنتتەردى ايتۋلى مەرەكەمەن قۇتتىقتاپ, بولاشاقتا دا ەلدىڭ تاتۋلىعىن تۋ ەتىپ, ابىرويىن اسقاقتاتاتىن بۇگىنگى جاستار ەكەنىن اتاپ ءوتتى. شارا بارىسىندا ۋنيۆەرسيتەت ستۋدەنتتەر «ەلىم مەنىڭ», «كوك تۋدىڭ جەلبىرەگەنى» اتتى پاتريوتتىق اندەردى شىرقادى. سونىمەن قاتار, اتالعان وقۋ ورنىندا قازاق تىلىنەن بولەك, اعىلشىن, تۇرىك, قىتاي, كورەي, فرانتسۋز تىلدەرىندە ءبىلىم الىپ جۇرگەن جاستار سول تىلدە جينالعانداردى قۇتتىقتادى.
جامبىل وبلىسى