ەكى ايعا جۋىق پەتروپاۆلدىڭ ساياجاي قوعامدارىن قالالىق پوليتسيا باسقارماسىنىڭ جەرگىلىكتى پوليتسيا قىزمەتى ءبولىمى كاۆالەريا ۆزۆودىنىڭ قىزمەتكەرلەرى كۇزەتۋدە. كارانتين شەكتەۋلەرى الىنۋىنا جانە اۋا رايىنىڭ جىلىنۋىنا بايلانىستى كۇزەت باعىتتارى كوبەيدى.
قازىر «زارەچنىي» مەن «نوۆوپاۆلوۆكا» كەنتتەرىندەگى بارلىق ساياجاي قوعامدارى اتتى اسكەر كۇزەتىنىڭ اۋقىمىنا ەندى. «ولاردىڭ مىندەتى – باۋ-باقشالاردا جاياۋ جانە اۆتوپاترۋلدەردىڭ ءوتۋى قيىن ايماقتاردا قوعامدىق ءتارتىپتى قامتاماسىز ەتۋ. ۇرلىق بولدىرماۋ ءۇشىن ولار ساياجاي قوعامدارىنىڭ توراعالارىمەن جانە كۇزەتشىلەرىمەن بايلانىس جاسايدى, بوگدە ادامداردى نازارعا الادى, ءتۇرلى قۇقىق بۇزۋشىلىقتارعا جول بەرمەۋ بويىنشا ساياجايشىلارمەن پروفيلاكتيكالىق اڭگىمە جۇرگىزەدى», دەيدى سقو پد باستىعىنىڭ ءبىرىنشى ورىنباسارى, پوليتسيا پولكوۆنيگى قانات ايتباەۆ.
كەيبىر ساياجايشىلاردىڭ قالدىقتاردى, قاۋ شوپتەردى جاعۋى ۇرەي تۋعىزادى. ءبىر-ەكى كۇن بۇرىن «ۆەسنيانكا» قاۋىمداستىعىنا ءورت ءسوندىرۋ جاساقتارىن شاقىرتۋعا تۋرا كەلدى. ساياجاي يەسى بىلتىرعى قۋراعان ءشوپتى جاعامىن دەپ ءۇي-جايسىز قالا جازدادى. سونىمەن قاتار, پوليتسەيلەر ساياجايشىلاردىڭ تىنىشتىعىن بۇزاتىن ماسكۇنەمدەردى دە ۇستاپ, ءتيىستى جەرگە جەتكىزەدى. جۇمىستىڭ تاعى ءبىر باعىتى – اباتتاندىرۋ قاعيدالارىن ساقتاۋ, ستيحيالى قوقىس ورىندارىنىڭ پايدا بولۋىنا جول بەرمەۋ. كاۆالەريستەر وسىنداي فاكتىلەردى ساياجايشىلارمەن جانە قاۋىمداستىق توراعالارىمەن بىرلەسىپ تەكسەرەدى.
ساياجايشىلار وزدەرىنىڭ تىنىشتىعى مەن ساۋلىعىن كۇزەتىپ جۇرگەن اتتى پوليتسەيلەرگە ريزا. بالالار دا ولاردىڭ قىلىعىن قىزىقتاپ, كەيدە اتقا مىنگىزۋدى ءوتىنىپ جۇرەدى.
سولتۇستىك قازاقستان وبلىسى