كوروناۆيرۋستىڭ كەسىرىنەن توقتاتىلعان تەننيسشىلەر اراسىنداعى جارىستاردىڭ قاي كەزدە جالعاساتىنى 10 ماۋسىمدا وتەتىن Zoom-كونفەرەنتسيادان كەيىن بەلگىلى بولادى.
جىلدىڭ باسىنان اياعىنا دەيىن ۇزدىكسىز ءوتىپ تۇراتىن ءتۇرلى تۋرنيرلەر پاندەميا سالدارىنان توقتاتىلعاننان كەيىن ەڭ كوپ بايبالام سالعان ءداپ وسى تەننيسشىلەر ەدى. ءار كۇن سايىن «تابىس كوزىنەن ايىرىلدىق», «جاعدايىمىز مۇشكىل», «ەندى قالاي كۇن كورەمىز؟» دەپ جىلارمان بولدى. ولاردىڭ جانايقايىن ەستىگەن نوۆاك دجوكوۆيچ, رودجەر فەدەرەر, رافاەل نادال سىندى ساڭلاقتار ورتاڭ قول ويىنشىلارعا قارجىلاي كومەك كورسەتۋ ماقساتىندا ارنايى قايىرىمدىلىق قورىن قۇرۋ جونىندە باستاما كوتەردى. بۇل يدەيانى كوپشىلىك قولداسا, كەيبىرەۋلەر قارسىلىق ءبىلدىردى. بۇل ءىستىڭ نەمەن اياقتالعانى بىزگە بەيمالىم, بىراق ءبىر بىلەتىنىمىز قيىن-قىستاۋ كەزەڭدە ءبىر-ءبىرىن قولداعان تەننيسشىلەردىڭ اۋىزبىرلىگى مىقتى ەكەن.
Zoom-كونفەرەنتسيادان كەيىن سولتۇستىك امەريكا مەن ەۋروپا قۇرلىعىندا وتەتىن بىرقاتار ءىرى حالىقارالىق تۋرنيرلەردىڭ مەرزىمى انىقتالادى. ودان كەيىن ويىنشىلار «ۇلكەن دۋلىعا» ساناتىنداعى جارىستارعا دايىندىقتى باستايدى.