29 قاڭتارداعى ەل پرەزيدەنتى ن.ءا.نازارباەۆتىڭ جولداۋىنا رۋحاني قولداۋ رەتىندە وبلىستىق “ابۋد حاميد قاتتاني” مەشىتىندە كەڭەيتىلگەن ءماجىلىس بولىپ ءوتتى. وعان اۋدان, قالا يمامدارى قاتىستى. ءداستۇرلى جولداۋدىڭ كەڭ كولەمدە ناسيحاتتالۋىنا, سونداي-اق اۋدان, قالا مەشىتتەرىمەن قاتار, اۋىل وكرۋگى, ەلدى مەكەن مەشىتتەرىندە جۇما نامازدارىنىڭ ۋاعىزدارى ارقاۋ بولۋدا.
وسى جولداۋ اياسىندا قالا مەشىتتەرىندە يمامدار اراسىندا ارنايى ءماجىلىس وتكىزىلدى. كەزدەسۋ بارىسىندا ەلباسىنىڭ كەزەكتى جولداۋىنداعى ءومىر, ءبىلىم, عىلىم, ساياسات, ەل ىشىندەگى ءبىرلىك-بەرەكە, ۇلتتار مەن ۇلىستار اراسىنداعى تاتۋ-ءتاتتى ءومىردى قالىپتاستىرۋ جانە نىعايتۋ, ت.ب وزەكتى ماسەلەلەر تۋرالى جان-جاقتى ايتىلدى.
ەل حالقىنىڭ 70 پايىزدان استامى مۇسىلماندار ەكەنى بەلگىلى. قاسيەتتى قۇران كارىمنىڭ حۋجرات سۇرەسىندەگى 10 اياتىندا: “شىن مانىندە مۇسىلماندار ءبىر-ءبىرىنە باۋىر”. حازرەتى مۇحاممەد (س.ع.س.) پايعامبارىمىز دا حاديس ءشارىپتەرىندە “مۇسىلمان – مۇسىلمانعا باۋىر”, دەيدى.
مەشىتتەردەگى ۋاعىزداردا ەلىمىزدەگى ەتنوستاردىڭ ءبىرلىگى مەن ىنتىماعىنا ۇلكەن ءمان بەرىلەدى. ويتكەنى, ىنتىماعى مەن بىرلىگى كۇشتى ەل عانا قانداي قيىندىقتى بولسا دا جەڭەدى. اللاعا ءشۇكىر, وتپەلى كەزەڭنىڭ قيىنشىلىقتارى ارتتا قالدى. ەل ەكونوميكاسى اياعىنان تۇرىپ كەلەدى. حالىقتىڭ تۇرمىس جاعدايى مەن ءال-اۋقاتى دا بىرتىندەپ جاقسارا تۇسۋدە.
بىزدەر – ءدىن وكىلدەرى دە جاس مەملەكەتىمىزدىڭ تاۋەلسىزدىك جولىنداعى ۇلى مۇراتتارىنان تىس قالا المايمىز. وسىعان بايلانىستى قازىرگى تاڭدا, اسىرەسە, ەلدىڭ رۋحىن كوتەرىپ, وتانشىلدىق سەزىمىن وياتۋ, كۇشەيتۋ قاجەت. ءسويتىپ, اسىل ءدىنىمىز ارقىلى دا ەرتەڭگى كۇنگە – قازاق ەلىنىڭ بولاشاعىنا, ۇلتتىق بىرلىگىمىزدى نىعايتۋعا قىزمەت ەتە الامىز.
بىزدەر يسلام ءدىنىن ءتۇرلى ساياسي ماقساتقا پايدالانعىسى كەلەتىندەرگە جول بەرمەي, ءارى ولاردىڭ جەتەگىندە كەتپەي, ءبىرتۇتاس قازاقستان ءۇشىن جۇمىلا جۇدىرىق بولىپ, دىندەر اراسىنداعى ءتۇسىنىستىككە, ۇنقاتىسۋعا جول اشىپ, جىكشىلدىك پەن فاناتيزمگە توسقاۋىل بولۋىمىز كەرەك. سوندا ءبىزدى الار جاۋ بولمايتىندىعى ءسوزسىز.
ەلىمىز بەن ەلباسىمىز امان بولىپ, قازاقستاندا ماڭگىلىك تىنىشتىق, بەرەكە-بىرلىك ورناۋىن اللا تاعالا ءناسىپ ەتسىن!
احمەتجان قاجى كەرىمبەك,
قازاقستان مۇسىلماندارى ءدىني باسقارماسىنىڭ وقو بويىنشا وكىل يمامى.